ଆଇପିଏଲ: ପ୍ଲେ ଅଫ୍ ଦୌଡ଼ରୁ ପଞ୍ଜାବ ବାଦ
#ଧର୍ମଶାଳା(ଏନ୍.ଏମ୍.): ଆଇପିଏଲର ଏହି ସଂସ୍କରଣର ପ୍ଲେ ଅଫ୍ ଦୌଡ଼ରୁ ପଞ୍ଜାବ କିଙ୍ଗସ ଏକାଦଶ ବାଦ ପଡ଼ିଛି । ଆଜି ଅନୁଷ୍ଠିତ ଟୁର୍ଣ୍ଣାମେଣ୍ଟର ୬୩ତମ ମ୍ୟାଚରେ ଦିଲ୍ଲୀ କ୍ୟାପିଟାଲ୍ସ ପଞ୍ଜାବକୁ ୧୫ରନରେ ପରାସ୍ତ କରିଛି । ଫଳରେ ଏହି ଟୁର୍ଣ୍ଣାମେଣ୍ଟରେ ଆଦୌ ଟାଇଟଲ ହାସଲ କରି ନଥିବା ପଞ୍ଜାବକୁ ପୁଣି ନିରାଶ ହେବାକୁ ପଡ଼ିଛି । ଦିଲ୍ଲୀ କ୍ୟାପିଟାଲ୍ସ ଏହି ମ୍ୟାଚରେ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୨ ୱିକେଟ ହରାଇ ୨୧୩ରନ କରିଥିଲା । ଏହାର ଜବାବଦରେ ଲିଆମ ଲିଭିଙ୍ଗଷ୍ଟୋନଙ୍କ ୯୪ରନର ବିସ୍ଫୋରକ ଇନିଂସ ସତ୍ତ୍ୱେ ଦିଲ୍ଲୀ ଦଳ ୮ ୱିକେଟ ହରାଇ ୧୯୮ରନରେ ସୀମିତ ରହି ଯାଇଥିଲା । ଏହି ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ପଞ୍ଜାବ ଦ୍ୱିତୀୟ ଓଭରର ପ୍ରଥମ ବଲରେ ଅଧିନାୟକ ଶିଖର ଧୱନଙ୍କ ୱିକେଟ ହରାଇଥିଲା । ଏହାପରେ ପ୍ରଭସିମରନ ସିଂ ଓ ଅଥର୍ବ ତାଡ଼େ ଭଲ ବ୍ୟାଟିଂ କରିଥିଲେ । ତେବେ ଦୁହେଁ ଦ୍ୱିତୀୟ ୱିକେଟ ପାଇଁ ୬.୩ ଓଭରରୁ ୫୦ରନ ସଂଗ୍ରହ କରିଥିଲେ । ଏହି ସ୍କୋରରେ ପ୍ରଭସିମରନ ୨୨ରନ କରି ଆଉଟ ହୋଇଥିଲେ । ପରବର୍ତ୍ତୀ ସମୟରେ ଅଥର୍ବ ଓ ଲିଭିଙ୍ଗଷ୍ଟୋନ ୧୫ ଓଭରରେ ଦଳୀୟ ସ୍କୋରକୁ ୧୨୮ରେ ପହଞ୍ଚାଇଥିଲେ । ମାତ୍ର ଅଥର୍ବ ଆଘାତ ଜନିତ କାରଣରୁ ଆଉଟ ହୋଇ ପାଭିଲିୟନ ଫେରିଥିଲେ । ପରେ ଲିଭିଙ୍ଗଷ୍ଟୋନ ବଡ଼ ସର୍ଟ ଖେଳି ଦଳକୁ ବିଜୟୀ କରିବାକୁ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ । ଲିଭିଙ୍ଗଷ୍ଟୋନ ୪୮ ବଲରୁ ୯ଛକା ଓ ୫ ଚୌକା ସହାୟତାରେ ୯୪ରନ କରି ଇନିଂସର ଶେଷ ବଲରେ ଆଉଟ ହୋଇଥିଲେ । ଦିଲ୍ଲୀର ଫିଲ୍ଡରମାନେ ପ୍ରାଥ ଅଧ ଡଜନ ରନଆଉଟ ଓ ଏତିକି କ୍ୟାଚ ମିସ କରିଥିଲେ ।
ପୂର୍ବରୁ ଟସ ହାରି ଦିଲ୍ଲୀ ପ୍ରଥମେ ବ୍ୟାଟିଂ କରିଥିଲା । ଅଧିନାୟକ ଡେଭିଡ ୱାର୍ଣ୍ଣରଙ୍କ ସହ ପୃଥ୍ୱୀ ଶ’ ଇମ୍ପାକ୍ଟ ପ୍ଲେୟାର ଭାବେ ବ୍ୟାଟିଂ କରିବାକୁ ଆସିଥିଲେ । ତେବେ ଖରାପ ଫର୍ମ ସହ ଲଢ଼େଇ କରି ପ୍ରଥମ କେତୋଟି ମ୍ୟାଚ ପରେ ପ୍ଲେଇଁ ଏକାଦଶରୁ ବାଦ ପଡ଼ିଥିବା ପୃଥ୍ୱୀ କିନ୍ତୁ ଏହି ମ୍ୟାଚରେ ଦମଦାର ପ୍ରଦର୍ଶନ କରିଥିଲେ । ଦୁହେଁ ପ୍ରଥମ ୱିକେଟ ପାଇଁ ୧୦ ଓଭରରୁ ୯୪ରନ ସଂଗ୍ରହ କରିଥିଲେ । ଏହି ସ୍କୋରରେ ୱାର୍ଣ୍ଣର ୩୧ ବଲରୁ ୪୬ରନ କରି ଆଉଟ ହୋଇଥିଲେ । ପରେ ଦଳୀୟ ସ୍କୋର ୧୪୮ ବେଳେ ପୃଥ୍ୱୀ ୩୮ବଲରୁ ୫୪ରନ କରି ଆଉଟ ହୋଇଥିଲେ । ତେବେ ରିଲି ରଶୋ ଓ ଫିଲ ସଲ୍ଟ ବିସ୍ଫୋରକ ବ୍ୟାଟିଂ କରି ଆଉ ୱିକେଟ ପଡ଼ିବାକୁ ଦେଇ ନଥିଲେ । ପଳରେ ଦିଲ୍ଲୀ ନିର୍ଦ୍ଧାରିତ ଓଭରରେ ମାତ୍ର ୨ ୱିକେଟ ହରାଇ ୨୧୩ରନ ସଂଗ୍ରହ କରିଥିଲା । ପ୍ଲେ ଅଫରୁ ଦିଲ୍ଲୀ ପୂର୍ବରୁ ବାଦ ପଡ଼ିଥିବାବେଳେ ଦିଲ୍ଲୀର ଏହି ବିଜୟ ପଞ୍ଜାବ ପାଇଁ ମଧ୍ୟ ମହଙ୍ଗା ପଡ଼ିଲା । ରଶୋଙ୍କୁ ମ୍ୟାନ ଅଫ ଦି ମ୍ୟାଚ ଭାବେ ପୁରସ୍କୃତ କରାଯାଇଥିଲା ।