ଆଇପିଏଲ: ପଞ୍ଜାବର ରୋମାଞ୍ଚକର ବିଜୟ

ଚେନ୍ନାଇ(ଏନ୍‌.ଏମ୍‌.): ଅନ୍ତିମ ଓଭରର ଅନ୍ତିମ ବଲରେ ସିକନ୍ଦର ରାଜା ୩ରନ ସଂଗ୍ରହ କରି ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ପଞ୍ଜାବ କିଙ୍ଗ୍ସ ଏକାଦଶକୁ ରୋମାଞ୍ଚକର ବିଜୟ ଭେଟି ଦେଇଛନ୍ତି । ଏହି ମ୍ୟାଚରେ ଚେନ୍ନାଇ ପ୍ରଥମେ ବ୍ୟାଟିଂ କରି ପଞ୍ଜାବ ବିପକ୍ଷରେ ୨୦୧ରନର ଟାର୍ଗେଟ ରଖିଥିଲା । ଏହାର ଜବାବରେ ପଞ୍ଜାବ ୬ ୱିକେଟ ହରାଇ ଏହି ଟାର୍ଗେଟକୁ ହାସଲ କରି ନେଇଥିଲା । ଅନ୍ତିମ ୨ ଓଭରରେ ପଞ୍ଜାବର ବିଜୟ ପାଇଁ ୨୨ରନ ଆବଶ୍ୟକ ରହିଥିବାବେଳେ ଦୁଇ ଅପରାଜିତ ବ୍ୟାଟ୍ସମ୍ୟାନ ରାଜା ଓ ଶହାରୁଖ ଖାନ ଏହାକୁ ସଂଗ୍ରହ କରିବାରେ ସଫଳ ହୋଇଥିଲେ । ପଞ୍ଜାବର ଦୁଇ ଓପନର ଅଧିନାୟକ ଶିଖର ଧୱନ ଓ ପ୍ରଭା ସିମରନ ସିଂ ପ୍ରାରମ୍ଭରୁ ଆକ୍ରମଣାତ୍ମକ ସଟ ଖେଳିଥିଲେ । ଦୁହେଁ ପ୍ରଥମ ୱିକେଟ ପାଇଁ ୪.୨ ଓଭରରୁ ୫୦ରନ ସଂଗ୍ରହ କରି ନେଇଥିଲେ । ଏହି ସମୟରେ ଅଧିନାୟକ ଧୱନ ୧୫ବଲରୁ ୨୮ରନ କରି ତୁଷାର ଦେଶପାଣ୍ଡେଙ୍କ ଶିକାର ବନିଥିଲେ । ତେବେ ଦଳୀୟ ସ୍କୋର ୮୧ ବେଳେ ପ୍ରଭାସିମରନ ୨୪ବଲରୁ ୨ଟି ଛକା ସହାୟତାରେ ୪୨ରନ କରି ଆଉଟ ହୋଇଥିଲେ । ଏହାପରେ ଶିଖରଙ୍କ ସ୍ଥାନ ପୂରଣ କରିବାକୁ ଆସି ଅଥର୍ବ ତାଡ଼େ ବିଫଳ ହୋଇଥିଲେ । ସେ ୧୭ବଲର ସମ୍ମୁଖୀନ ହୋଇ ମାତ୍ର ୧୩ରନ କରି ଦଳୀୟ ସ୍କୋର ୯୪ବେଳେ ରବିନ୍ଦ୍ର ଜାଡ଼େଜାଙ୍କ ଦ୍ୱାରା ଅଉଟ ହୋଇଥିଲେ । ମାତ୍ର ଦୁଇ ବିଦେଶୀ ଷ୍ଟାର ଲିୟମ ଲିଭିଙ୍ଗଷ୍ଟୋନ ଓ ସାମ କରଣ ଚମକ୍ରାର ବ୍ୟାଟିଂ ୫.୩ ଓଭରରୁ ୫୭ରନ ସଂଗ୍ରହ କରିବା ଫଳରେ ପଞ୍ଜାବର ବିଜୟ ପଥ ପରିଷ୍କାର ହୋଇଥିଲା । ଲିଭିଙ୍ଗଷ୍ଟୋନ ୨୪ବଲରୁ ୪୦ରନ କରି ଆଉଟ ହୋଇଥିଲେ । ଲିଭିଙ୍ଗଷ୍ଟୋନଙ୍କ ସ୍ଥାନ ପୂରଣ କରିବାକୁ ଆସି ଜିତେଶ ଶର୍ମା ୧୦ବଲରୁ ୨୧ରନ ସଂଗ୍ରହ କରିଥିଲେ । ସେହିଭଳି ସାମ କରଣ ୨୦ ବଲରୁ ୨୯ରନ କରିଥିବାବେଳେ ରାଜା ୭ ବଲରୁ ୧୩ରନ କରି ଓ ଶାହାରୁଖ ୨ରନ କରି ଅପରାଜିତ ରହିଥିଲେ । ଚେନ୍ନାଇ ପକ୍ଷରୁ ଦେଶପାଣ୍ଡେ ୪ ଓଭର ବୋଲିଂ କରି ୪୯ରନରେ ୩ଟି ଓ ରବିନ୍ଦ୍ର ଜାଡ଼େଜା ସମାନ ଓଭର ବୋଲିଂ କରି ୩୨ରନରେ ୨ଟି ୱିକେଟ ହାସଲ କରିଥିଲେ ।
ଏହି ମ୍ୟାଚରେ ମହେନ୍ଦ୍ର ସିଂ ଧୋନ ଟସ ଜିତି ବ୍ୟାଟିଂ ପାଇଁ ନିଷ୍ପତି ନେଇଥିଲେ । ଅଧିନାୟକଙ୍କ ନିଷ୍ପତିକୁ ଠିକ ପ୍ରମାଣିତ କରି ଦୁଇ ଓପନର ଋତୁରାଜ ଗାଏକ୍ୱାଡ଼ ଓ ଡେଭନ କନୱେ ପ୍ରଥମ ୱିକେଟ ପାଇଁ ୯.୪ ଓଭରରୁ ୮୬ରନ ସଂଗ୍ରହ କରିଥିଲେ । ଏହି ସମୟରେ ଗାଏକ୍ୱାଡ଼ ୩୧ବଲରୁ ୩୭ରନ କରି ଆଉଟ ହୋଇଥିଲେ । ଏହାପରେ କନୱେ ଓ ଶିବମ ଦୁବେ ଦଳୀୟ ସ୍କୋରକୁ ୧୩୦ରେ ପହଞ୍ଚାଇଥିଲେ । ଏହି ସ୍କୋରରେ ଶିବମ ୧୭ବଲରୁ ୨୮ରନ କରି ଆଉଟ ହୋଇଥିଲେ । ତେବେ କନୱେଙ୍କ ଅପରାଜିତ ୯୨ରନ ଓ ଶେଷ ଓଭରରେ ଧୋନିଙ୍କ ଦୁଇଟି ବିଶାଳ ଛକା ସହାୟତାରେ ଚେନ୍ନାଇ ନିର୍ଦ୍ଧାରିତ ଓଭରରେ ୪ ୱିକଟେ ହରାଇ ୨୦୦ରନ ସଂଗ୍ରହ କରିପାରିଥିଲା । ଏହି ମ୍ୟାଚରୁ ପଞ୍ଜାବ ୨ ପଏଣ୍ଟ ହାସଲ କରି ଟୁର୍ଣ୍ଣାମେଣ୍ଟରେ ଦଳର ପଏଣ୍ଟକୁ ୧୦ରେ ପହଞ୍ଚାଇ ଟେବଲର ୫ମ ସ୍ଥାନରେ ରହିଛି । ତେବେ ଚେନ୍ନାଇ ପୂର୍ବଭଳି ୪ର୍ଥ ସ୍ଥାନରେ ଅପରିବର୍ତ୍ତିତ ରହିଛି । ଅପରାଜିତ ୯୨ରନ ସଂଗ୍ରହ କରିଥିବା କନୱେ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଥିଲେ ।