ଆଇପିଏଲ: କ୍ଲସେନଙ୍କ ଶତକ ବ୍ୟର୍ଥ: କୋହଲିଙ୍କ ଶତକ, ଟପ୍-୪ରେ ଆରସିବି
#ହାଇଦ୍ରାବାଦ(ଏନ୍.ଏମ୍.): ବିରାଟ କୋହଲିଙ୍କ ଶତକ ଓ ଅଧିନାୟକ ଫାଫ ଡୁପ୍ଲେସି ଅର୍ଦ୍ଧଶତକ ଜରିଆରେ ଆଇପିଏଲର ୬୫ତମ ମ୍ୟାଚରେ ରୟାଲ ଚ୍ୟାଲେଞ୍ଜର ବାଙ୍ଗାଲୋର ବିଜୟୀ ହୋଇଛି । ଏଥିସହିତ ଆରସିବି ପଏଣ୍ଟ ଟେବଲର ୪ର୍ଥ ସ୍ଥାନରେ ପହଞ୍ଚିବା ସହ ପ୍ଲେ ଅଫରେ ଦୌଡ଼ରେ ସାମିଲ ହୋଇଛି । ଆସନ୍ତା ୨୧ତାରିଖରେ ଆରସିବି ଅନ୍ତିମ ଲିଗ ମ୍ୟାଚରେ ଗୁଜୁରାଟ ଟାଇଟନ୍ସକୁ ଭେଟିବ । ଏହି ମ୍ୟାଚ ଆରସିବିର ପରବର୍ତ୍ତୀ ଭାଗ୍ୟ ନିର୍ଦ୍ଧାରଣ କରିବ । ତେବେ ଆଜି ଅନୁଷ୍ଠିତ ଏହି ମ୍ୟାଚରେ ସନରାଇଜର୍ସ ହାଇଦ୍ରାବାଦ ପ୍ରଥମେ ବ୍ୟାଟିଂ କରି ହେନରିଚ କ୍ଲାସେନଙ୍କ ଶତକ ଜରିଆରେ ନିର୍ଦ୍ଧାରିତ ଓଭରରେ ୫ ୱିକେଟ ହରାଇ ୧୮୬ରନ ସଂଗ୍ରହ କରିଥିଲା । ୧୮୭ରନର ବିଜୟ ଲକ୍ଷ୍ୟକୁ ପିଚ୍ଛା କରି ଆରସିବିର ଦୁଇ ଓପନର ବିରାଟ ଓ ଡୁପ୍ଲେସି ଚମକ୍ରାର ବ୍ୟାଟିଂ କରି ପ୍ରଥମ ୱିକେଟ ପାଇଁ ୧୭.୫ ଓଭରରୁ ୧୭୨ରନ ସଂଗ୍ରହ କରି ଦଳର ବିଜୟ ପଥ ପରିସ୍କାର କରିଥିଲେ । ଏହି ସ୍କୋରରେ ଶତକ ହାସଲ କରିଥିବା ବିରାଟ ୬୩ ବଲରୁ ୧୨ ଚୌକା ଓ ୪ଟି ଛକା ସହାୟତାରେ ୧୦୦ରନ କରି ଆଉଟ ହୋଇଥିଲେ । ଏହାପରେ ଡୁପ୍ଲେସି ମଧ୍ୟ ୪୭ ବଲରୁ ୭ ଚୌକା ଓ ଓ ୨ଟି ଛକା ସହାୟତାରେ ୭୧ରନ କରି ଆଉଟ ହୋଇଥିଲେ । ଅନ୍ତିମ ୧୦ ବଲରୁ ୧୦ରନ ଆବଶ୍ୟକ ଥିବାବେଳେ ଗ୍ଲେନ ମ୍ୟାକ୍ସୱେଲ(୫) ଓ ମିଚେଲ ବ୍ରେସୱେଲ(୪) ୪ଟି ବଲ ବାକି ଥାଇ ଏହି ରନ ସଂଗ୍ରହ କରି ନେଇଥିଲେ । ବିରାଟ ମ୍ୟାନ ଅଫ ଦି ମ୍ୟାଚ ହୋଇଥିଲେ ।
ଏହି ମ୍ୟାଚରେ ଆରସିବି ଟସ ଜିତି ବୋଲିଂ କରିବାକୁ ନିଷ୍ପତି ନେଇଥିଲା । ଏସଆରଏଚ ୨୮ରନରେ ପ୍ରଥମ ୩ଟି ୱିକେଟ ହରାଇଥିଲା । ମାତ୍ର କ୍ଲାସେନ ଅଧିକ ସମୟ ଷ୍ଟ୍ରାଇକରେ ରହି ଶତକ ହାସଲ କରି ଦଳକୁ ଭଲ ସ୍କୋରରେ ପହଞ୍ଚାଇ ପାରିଥିଲେ । କ୍ଲାସେନ ୫୧ ବଲରୁ ୮ ଚୌକା ଓ ୬ଟି ଛକା ସହାୟତାରେ ୧୦୪ରନ କରି ଆଉଟ ହୋଇଥିଲେ । ଅନ୍ୟମାନଙ୍କ ମଧ୍ୟରେ ହ୍ୟାରି ବ୍ରୁକ୍ ୨୭ ଓ ଅଧିନାୟକ ଆଇଡେନ ମାର୍କରାମ ୧୮ରନ କରିଥିଲେ । ଆରସିବି ପକ୍ଷରୁ ବ୍ରେସୱେଲ ୨ଟି ୱିକେଟ ନେଇଥିଲେ । ଏସଆରଏଚ ୧୩ ମ୍ୟାଚ ଖେଳି ୪ଟି ବିଜୟୀ ହୋଇ ମୋଟ ୮ ପଏଣ୍ଟ ସହ ପଏଣ୍ଟ ଟେବଲର ଶେଷ ସ୍ଥାନରେ ରହିଛି ।