ଅଳ୍ପକେ ଦୁର୍ଘଟଣାରୁ ବର୍ତ୍ତିଲା ମେମୁ ଟ୍ରେନ୍, ବଞ୍ଚିଗଲା ଶତାଧିକ ଯାତ୍ରୀଙ୍କ ଜୀବନ
ବାଲେଶ୍ୱର (ଏନ୍.ଏମ୍.): ସମ୍ପ୍ରତି ଦେଶରେ ଏବେ ରେଳ ଦୁର୍ଘଟଣା ବଢ଼ିବାରେ ଲାଗିଛି । କେଉଁଟି ବଗିରେ ନିଆଁ ଲାଗି ଯାଉଛି ତ ଆଉ କେଉଁଠି ଲାଇନଚ୍ୟୁତ । ଏସବୁ ସମସ୍ୟା ଯୋଗୁଁ ଏବେ ଯାତ୍ରୀମାନେ ରେଳଯାତ୍ରା କରିବାକୁ ଭୟ କରୁଛନ୍ତି । ତେବେ ଆଜି ପୁଣି ରେଳ ବିଭାଗର ଦାୟିତ୍ୱ ହୀନତା ପଦାରେ ପଡ଼ିଛି । ଗତ ଜୁନ୍ ୨ତାରିଖ ସନ୍ଧ୍ୟାରେ ବାଲେଶ୍ୱର ଜିଲ୍ଲା ବାହାନଗାରେ ଘଟିଥିବା ରେଳ ଦୁର୍ଘଟଣା ମନରୁ ଲିଭି ନଥିବା ବେଳେ ଏକ ସମ୍ଭାବ୍ୟ ଦୁର୍ଘଟଣା ପରିସ୍ଥିତିକୁ ଆୟତ୍ତ କରିଛନ୍ତି ଲୋକପାଇଲଟ୍ । ଆଜି ଅପରାହ୍ନରେ ବାହାନଗା ରେଳଷ୍ଟେସନ ଠାରୁ ମାତ୍ର ୧୫ କିଲୋମିଟର ଦୂରରେ ଭଦ୍ରକ-ଖଡ଼ଗପୁର ମେମୁ ଟ୍ରେନ୍ ଦୁର୍ଘଟଣାରୁ ବର୍ତ୍ତିଯାଇଛି । ଫଳରେ ମେମୁ ଟ୍ରେନ୍ର ଯାତ୍ରୀଙ୍କ ଜୀବନ ସୁରକ୍ଷିତ ଅଛି । ଅପରାହ୍ନରେ ବାଲେଶ୍ୱର ଜିଲ୍ଲା ନୀଳଗିରି ରୋଡ୍ ବରୁଣସିଂ ଷ୍ଟେସନ ପାଖରେ ଏହି ଘଟଣା ଘଟିଛି । ଏହି ଟ୍ରେନ୍ କୌଣସି କାରଣରୁ ଲୁପ ଲାଇନରେ ପଶି ଯାଇଥିଲା । ତେବେ ସିଗନାଲ କିମ୍ବା ଟ୍ରାକର ତ୍ରୁଟି ଜଣା ପଡିନଥିବା ବେଳେ ଲୋକ ପାଇଲଟଙ୍କ ଉପସ୍ଥିତ ବୁଦ୍ଧି ଯୋଗୁଁ ହଜାର ହଜାର ଯାତ୍ରୀଙ୍କ ଜୀବନ ବଞ୍ଚି ଯାଇଛି । ନୀଳଗିରି ରୋଡ଼ରେ ଦୁଇ ଘଣ୍ଟାରୁ ଅଧିକ ସମୟ ଟ୍ରେନଟି ରହିଥିବା ବେଳେ ଲୋକ ପାଇଲଟ ଗାଡିକୁ ପଛକୁ ବ୍ରେକ କରି ପୁଣି ବାଲେଶ୍ୱର ଅଭିମୁଖେ ଯାଇଥିବା ଜଣାପଡ଼ିଛି । ଟ୍ରେନ୍ ଲୋକପାଇଲଟ୍ଙ୍କ କହିବା ମୁତାବକ ଟ୍ରାକ୍ ବିପରିତ ଦିଗକୁ କ୍ରାସ କରି ଯାଇଥିଲା । ଟ୍ରାକ୍ ନର୍ମାଲ ଲାଇନରେ ନଥିଲା । ତେବେ ଏଥିଯୋଗୁ ଦୁର୍ଘଟଣା ବା ଟ୍ରେନ୍ ଲାଇନ୍ ଚ୍ୟୁତ୍ ହୋଇନଥାଆନ୍ତା । ଏପରି ହୋଇଥିଲେ ଏହି ଟ୍ରେନ୍ ଯିବା ପରେ ପଛରେ ଆସୁଥିବା ଗାଡ଼ିଗୁଡ଼ିକ ପଛକୁ ପଛ ଯିବା ବିଳମ୍ୱ ହୋଇଥାଆନ୍ତା । ଟ୍ରେନ୍ ଟ୍ରାକରେ କ୍ଷତି ହୋଇଥାଆନ୍ତା । ତେଣୁ ସୁରକ୍ଷାକୁ ଦୃଷ୍ଟିରେ ରଖି ଟ୍ରେନକୁ ପଛକୁ ଅଣାଯାଇଥିଲା । ଟ୍ରେନ୍ ଟ୍ରାକ୍ କାମ କରିବା ବେଳେ କିଛି ଭୁଲଭାଲ କରିବା ଯୋଗୁ ଏହି ସମସ୍ୟା ହୋଇ ଥାଇପାରେ । ନୀଳଗିରି ରୋଡ଼ରେ ଦୁଇ ଘଣ୍ଟାରୁ ଅଧିକ ସମୟ ରହିଥିବାବେଳେ ଲୋକପାଇଲଟ ଟ୍ରେନ୍କୁ ପୁଣି ବାଲେଶ୍ୱର ପହଞ୍ଚାଇଛନ୍ତି । ବାଲେଶ୍ୱର ଠାରେ ଯାତ୍ରୀମାନେ ୪ନମ୍ବର ଟ୍ରାକରେ ଗାଡ଼ି ପହଞ୍ଚିବା ପରେ ଲୋକପାଇଲଟଙ୍କୁ ପୁଷ୍ପଗୁଛ ଦେଇ ସମ୍ବର୍ଦ୍ଧିତ କରିଛନ୍ତି ।