ଅନୁଭବ ବର୍ଷା ମାମଲାର ତ୍ୱରିତ ଶୁଣାଣି ଆବେଦନ
ଜୁଲାଇ ୩୧ ସୁଦ୍ଧା ସାକ୍ଷ୍ୟଗ୍ରହଣ ଶେଷ ପାଇଁ ହାଇକୋର୍ଟଙ୍କ ନିର୍ଦ୍ଦେଶ

#କଟକ(ଏନ୍‌.ଏମ୍‌.): କଟକର ପରିବାର ଅଦାଲତରେ ଅନୁଭବ-ବର୍ଷା ଛାଡପତ୍ର ମାମଲାର ଶୁଣାଣି ବିଳମ୍ବ ହେଉଥିବା ଦର୍ଶାଇ ଏ ସଂକ୍ରାନ୍ତୀୟ ମାମଲାର ହାଇକୋର୍ଟରେ ଶୁଣାଣି ହୋଇଯାଇଛି । ଅନୁଭବଙ୍କ ପକ୍ଷରୁ ଆଗତ ଆବେଦନର ଶୁଣାଣି କରି ହାଇକୋର୍ଟର ମୁଖ୍ୟ ବିଚାରପତି ଡ. ଏସ୍‌. ମୁରଲୀଧର୍‌ଙ୍କ ଖଣ୍ଡପୀଠ ଜୁଲାଇ ୩୧ ସୁଦ୍ଧା ବର୍ଷାଙ୍କ ସାକ୍ଷ୍ୟଗ୍ରହଣ ଶୋଷ କରିବାକୁ କଟକର ପାରିବାରିକ ଅଦାଲତକୁ ନିର୍ଦ୍ଦେଶ ଦେଇଛନ୍ତି । ଏଥିସହିତ ସାକ୍ଷ୍ୟଗ୍ରହଣ ଶେଷର ୩ମାସ ମଧ୍ୟରେ ମାମଲାର ରାୟ ପ୍ରକାଶ କରିବାକୁ ହାଇକୋର୍ଟ ପାରିବାରିକ ଆଦେଶ ଦେଇଛନ୍ତି । ଅନ୍ୟପକ୍ଷରେ କଟକର ପାରିବାରିକ ଅଦାଲତରେ ଅନୁଭବ-ବର୍ଷା ଛାଡପତ୍ର ମାମଲାର ବିଳମ୍ବ ହେଉଥିବା ଦର୍ଶାଇ ଏହାକୁ ଖୋର୍ଦ୍ଧା ପାରିବାରିକ ଅଦାଲତକୁ ସ୍ଥାନାନ୍ତର କରିବା ପାଇଁ ଅନୁଭବଙ୍କ ପକ୍ଷରୁ ହାଇକୋର୍ଟରେ ଆବେଦନ କରିଥିଲେ । ଏଥିରେ ଅନୁଭବ କଟକର ପାରିବାରିକ ଅଦାଲତ ବର୍ଷାଙ୍କ ପ୍ରତି ଅହେତୁକ ଅନୁକମ୍ପା ପ୍ରଦର୍ଶନ କରୁଥିବା ଦର୍ଶାଇଥିଲେ । ବିଶେଷ କରି ପାରିବାରିକ ଅଦାଲତ ଜାଣିଶୁଣି ବର୍ଷାଙ୍କ ସାକ୍ଷ୍ୟଗ୍ରହଣରେ ମହଲତ ଦେଉଥିବା ଅଭିଯୋଗ କରିଥିଲେ । ତେବେ ଖୋର୍ଦ୍ଧା ପାରିବାରିକ ଅଦାଲତକୁ ମାମଲା ସ୍ଥାନାନ୍ତର ପାଇଁ ଅନୁଭବଙ୍କ ପକ୍ଷରୁ କରାଯାଇଥିବା ଆବେଦନକୁ ଅଗ୍ରାହ୍ୟ କରି ଦେଇଛନ୍ତି । ସୂଚନାଥାଉକି ଅଭିନେତା ତଥା ସାଂସଦ ଅନୁଭବ ମହାନ୍ତି ତାଙ୍କ ଅଭିନେତ୍ରୀ ପତ୍ନୀ ବର୍ଷା ପ୍ରିର‌୍ୟଦଶିୟନୀଙ୍କୁ ଛାଡପତ୍ର ଦେବାକୁ ଦିଲ୍ଲୀର ପଟିଆଲା କୋର୍ଟରେ ଏକ ମାମଲା ରୁଜୁ କରିଥିଲେ । ଶ୍ରୀ ମହାନ୍ତି ତାଙ୍କ ଆବେଦନରେ ଦର୍ଶାଇଥିଲେ ଯେ, ଉଭୟ ଗତ ୨୦୧୪ ଫେବ୍ରୁଆରୀ ୮ ତାରିଖରେ ହିନ୍ଦୁ ରିତୀ ନିତୀ ଅନୁସାରେ ଉଭୟ ପରିବାରର ସହମତିକ୍ରମେ ଏହି ବିବାହ ଅନୁଷ୍ଠିତ ହୋଇଥିଲା । ବିଭିନ୍ନ ବିବାଦରୁ ଗତ ୨୦୧୯ ମଇ ୧ ତାରିଖଠାରୁ ଉଭୟ ଅଲଗା ରହୁଥିଲେ । ବର୍ଷାଙ୍କ ଆବେଦନ ଆଧାରରେ ପରବର୍ତ୍ତୀ ସମୟରେ ପଟିଆଲା କୋର୍ଟରୁ ଏହି ମାମଲା କଟକର ପାରିବାରିକ ଅଦାଲତକୁ ସ୍ଥାନାନ୍ତର ହୋଇଥିଲା । ସୁପ୍ରିମ୍‌କୋର୍ଟଙ୍କ ଏହି ମାମଲାରେ ୬ମାସ ମଧ୍ୟରେ ଏହାର ଶୁଣାଣି ଶେଷ କରିବାକୁ ନିର୍ଦ୍ଦେଶ ଦେଇଥିଲେ । କଟକର ପାରିବାରିକ ଅଦାଲତରେ ଏହି ମାମଲାରେ ଅନୁଭବଙ୍କୁ ଜେରା ଶେଷ ହୋଇଥିବାବେଳେ ବର୍ଷାଙ୍କୁ ଜେରା ଚାଲିଛି ।