୨୦୨୪ ସାଧାରଣ ନିର୍ବାଚନ ପାଇଁ ବଢ଼ୁଛି ରାଜନୈତିକ ଉଷ୍ମତା
ଚୌଦ୍ୱାର-କଟକ ଶାସକ ଦଳରେ ଏବେ ଚାଲିଛି ପ୍ରତିଯୋଗିତା, ଅପେକ୍ଷାରେ ଆଶାୟୀ ପାର୍ଥୀ
#ଚୌଦ୍ୱାର(ଏନ୍.ଏମ୍.): ଆଉ ମାସ କେଇଟା ପରେ ରାଜ୍ୟରେ ହେବ ସାଧାରଣ ନିର୍ବାଚନ । ଏଥି ପାଇଁ ଚାଲିଛି ଘନଘନ ପ୍ରସ୍ତୁତି । ନିର୍ବାଚନ ପରିଚାଳନା ନିମନ୍ତେ ପ୍ରଶାସନିକସ୍ତରରେ ପ୍ରସ୍ତୁତି ଚାଲିଥିବାବେଳେ ରାଜନୈତିକ ଶିବିରରେ ମଧ୍ୟ ଅଙ୍କକଷା ଆରମ୍ଭ ହୋଇଛି । ତେବେ ଏଥର ବିଭିନ୍ନ ନିର୍ବାଚନ ମଣ୍ଡଳୀ ମଧ୍ୟରେ ୯୧ନମ୍ବର ବିଧାନସଭା ଅର୍ଥାତ ଚୌଦ୍ୱାର କଟକ ବିଧାନସଭା ନିର୍ବାଚନ ମଣ୍ଡଳୀ ବେଶ ଚର୍ଚ୍ଚାରେ ରହିଛି । ଏଠାରେ ବିଶେଷ କରି ଶାସକ ଦଳ ବିଜେଡି ସହିତ ବିଜେପି, କଂଗ୍ରେସ ସହ ସ୍ୱାଧୀନ ପ୍ରାର୍ଥୀଙ୍କ ପ୍ରତିଦ୍ୱନ୍ଦିତା ହୋଇଥାଏ । ତେବେ ୨୦୨୪ ସାଧାରଣ ନିର୍ବାଚନ ନେଇ ବିଭିନ୍ନ ମହଲରେ ଚର୍ଚ୍ଚା ହେଉଛି । ବିଜେପିରେ ୩ରୁ ୪ଜଣ ଆଶାୟୀ ରହିଥିବାବେଳେ କଂଗ୍ରେସରୁ ମଧ୍ୟ ୩ଜଣ ଆଶାୟୀ ଅଣ୍ଟାଭିଡିଛନ୍ତି । ଅନ୍ୟପକ୍ଷରେ ରାଜନେତାମାନେ ନିଜର ଭାବମୂର୍ତ୍ତୀ ଅକ୍ଷୁର୍ଣ୍ଣ ରଖିବାରେ ବିଫଳ ହୋଇଥିବାରୁ ଏବେ ଭୋଟର କାହାକୁ ମତଦାନ କରିବେ ସେ ନେଇ ଦ୍ୱନ୍ଦ ଉପୁଜିଛି । ଅନ୍ୟପକ୍ଷରେ ଶାସକ ବିଜେଡି ଦଳ ବିଭିନ୍ନ ଜନହିତକର ଯୋଜନା ନେଇ ନିର୍ବାଚନ ବୈତରଣୀ ପାର ହେବାକୁ ଉଦ୍ୟମ କରୁଥିବାବେଳେ ସ୍ଥାନୀୟ ରାଜନେତାମାନଙ୍କ ଅପାରଗତା ଯୋଗୁଁ ଏହି ନିର୍ବାଚନ ମଣ୍ଡଳୀରେ ଅସନ୍ତୋଷ ବଢ଼ିବାରେ ଲାଗିଛି । ସେହିଭଳି ଆଗକୁ ନିର୍ବାଚନ ଆସୁଥିବାରୁ ଚୌଦ୍ୱାର-କଟକ ନିର୍ବାଚନ ମଣ୍ଡଳୀରେ ଶାସକ ଦଳର ବହୁ ଆଶାୟୀ ପ୍ରାର୍ଥୀ ମୁଣ୍ଡ ଟେକିଛନ୍ତି । ଏହି ନିର୍ବାଚନ ମଣ୍ଡଳୀରେ ୨ଥର ପ୍ରଭାତ ରଞ୍ଜନ ବିଶ୍ୱାଳ ବିଧାୟକ ହୋଇଥିବାବେଳେ ଏବେ ତାଙ୍କ ପୁଅ ସୌଭିକ ବିଶ୍ୱାଳ ବିଧାୟକ ଅଛନ୍ତି । ମାତ୍ର ଏବେ ଦଳରେ ସାଂଗଠନିକ ବ୍ୟବସ୍ଥାରେ ବହୁ ତ୍ରୁଟି ବିଚ୍ୟୁତି ଯୋଗୁଁ ବହୁ ଅସନ୍ତୁଷ୍ଟ ଆଶାୟୀ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହେବାକୁ ଅଣ୍ଟା ଭିଡିଲେଣି । ଏବେ ମୁଖ୍ୟମନ୍ତ୍ରୀ ଓ ଫାଇପ-ଟି ଅଧ୍ୟକ୍ଷଙ୍କ ଫଟୋ ସହ ବିଧାୟକଙ୍କ ଫଟୋ ଥାଇ ବ୍ୟାନର ବହୁ ମାତ୍ରାରେ ଝୁଲୁଥିବାବେଳେ ସମାନ୍ତରାଳ ଭାବେ ରୂପାଲୀ ଲେଙ୍କାଙ୍କ ବ୍ୟାନରରେ ମଧ୍ୟ ମୁଖ୍ୟମନ୍ତ୍ରୀ ଓ ଫାଇପ-ଟି ଅଧ୍ୟକ୍ଷଙ୍କ ଫଟୋ ମଧ୍ୟ ଦେଖିବାକୁ ମିଳିଛି । ଏଥି ସହିତ ରୂପାଲୀ ଲେଙ୍କା ମଧ୍ୟ କଟକରେ ନିଜର ଶକ୍ତି ପ୍ରଦର୍ଶନ କରିସାରିଛନ୍ତି । ଏକ ବିରାଟ ପଟୁଆର ନେଇ କଲେଜଛକ ଠାରୁ ଯୋବ୍ରାଛକ ପର୍ଯ୍ୟନ୍ତ ଶୋଭାଯାତ୍ରାରେ ଯାଇ ପ୍ରବାଦ ପୁରୁଷ ବିଜୁପଟ୍ଟନାୟକଙ୍କ ପ୍ରତିମୂର୍ତ୍ତୀରେ ପୁଷ୍ପମାଲ୍ୟ ଅର୍ପଣ କରିଥିଲେ । ତେବେ ତାଙ୍କ ସହ ଯେଉଁ ଆଗଧାଡ଼ିର କର୍ମକର୍ତ୍ତାମାନେ ଥିଲେ ସେ ବିଷୟରେ ଆଲୋଚନା କଲେ ବିଭିନ୍ନ ଦିଗକୁ ଇଙ୍ଗିତ କରୁଛି । ଅର୍ଥାତ ଦିନେ ପୂର୍ବତନ ବିଧାୟକ ପ୍ରଭାତ ଓ ତାଙ୍କ ପୁଅ ସୌଭିକଙ୍କ ପାଇଁ ସଂଗଠନ ତିଆରି କରିବା ନିର୍ବାଚନ ଅଙ୍କ କଷିବା କ୍ଷେତ୍ରରେ ଆଗୁଆ ଥିବା କର୍ମୀମାନେ ଏବେ ରୂପାଲୀଙ୍କ ଶିବିରରେ ରହିଛନ୍ତି । ତେଣୁ ଏହାକୁ ବିଚାର କଲେ ପ୍ରଭାତ କିମ୍ବା ତାଙ୍କ ପୁଅ ସୌଭିକଙ୍କ ଠାରୁ ରୂପାଲୀଙ୍କ ଅଙ୍କ ଅଧିକ ଗୁରୁତ୍ୱ ବହନ କରିବ ବୋଲି ନିର୍ବାଚନ ସମୀକ୍ଷକମାନେ ମତ ଦେଉଛନ୍ତି । କେବଳ ସେତିକି ନୁହେଁ, ଏହି ଆସନରୁ ବିଜେଡିରେ ଟିକେଟ ନେଇ ଲଢ଼ିବା ପାଇଁ ବହୁ ଆଶାୟୀ ପ୍ରାର୍ଥୀମଧ୍ୟ ନିଜର ପ୍ରସ୍ତୁତି ଆରମ୍ଭ କରିଛନ୍ତି । ଏପରିକି ସେମାନଙ୍କୁ ତୁରନ୍ତ ସନ୍ତୁଷ୍ଟ କରାନଗଲେ ଆଗାମୀ ଦିନରେ ଆଶାୟୀମାନେ ସ୍ୱାଧୀନ ପ୍ରାର୍ଥୀଭାବେ ନିର୍ବାଚନ ରଣାଙ୍ଗନକୁ ଅବତୀର୍ଣ୍ଣ ହେବା ସହ ଶାସକ ଦଳର ପ୍ରାର୍ଥୀଙ୍କୁ ଅଡ଼ୁଆରେ ପକାଇବାର ଆଶଙ୍କା ମଧ୍ୟ ରହିଥିବା ଚର୍ଚ୍ଚା ହେଉଛି ।