ହାଇକୋର୍ଟରେ ନାଟମଣ୍ଡପ ମରାମତି ମାମଲା: ମରାମତି କାର୍ଯ୍ୟର ଅଗ୍ରଗତି ସମ୍ପର୍କରେ ତଥ୍ୟ ଦିଅ – ହାଇକୋର୍ଟ

#କଟକ(ଏନ୍‌.ଏମ୍‌.): ଶ୍ରୀମନ୍ଦିର ନାଟ ମଣ୍ଡପ ମରାମତି ସମ୍ପର୍କିତ ମାମଲାରେ ପ୍ରତ୍ନତତ୍ୱ ବିଭାଗକୁ ହାଇକୋର୍ଟ ରିପୋର୍ଟ ମାଗିଛନ୍ତି । ମରାମତି କାର୍ଯ୍ୟର ଅଗ୍ରଗତି ସମ୍ପର୍କରେ ପ୍ରତ୍ନତତ୍ୱ ବିଭାଗକୁ ସତ୍ୟପାଠ ଦାଖଲ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ଆଜି ହାଇକୋର୍ଟରେ ମାମଲାର ଶୁଣାଣିବେଳେ ଆମିକସ୍‌କ୍ୟୁରୀଙ୍କ ପକ୍ଷରୁ ରିପୋର୍ଟ ଦାଖଲ କରାଯାଇଛି । ଦାଖଲ ରିପୋର୍ଟରେ ଗତ ୧୭ ତାରିଖରୁ ନାଟ ମଣ୍ଡପ ମରାମତି କାର୍ଯ୍ୟ ଆରମ୍ଭ ହୋଇଥିବା ଦର୍ଶାଯାଇଛି । ହାଇକୋର୍ଟ ଏହି ମାମଲାରେ ଶ୍ରୀମନ୍ଦିର ପ୍ରଶାସନ, ଆମିକସ୍‌କ୍ୟୁରୀ ଓ ପ୍ରତ୍ନତିତ୍ତ୍ୱ ବିଭାଗ ନାଟ ମଣ୍ଡପ ମରାମତି କାର୍ଯ୍ୟର ଅଗ୍ରଗତି ସମ୍ପର୍କରେ ରିପୋର୍ଟ ଦାଖଲ କରିବାକୁ ଆଦେଶ ଦେଇଛନ୍ତି । ଆସନ୍ତା ୧୮ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ ବୋଲି ହାଇକୋର୍ଟ କହିଛନ୍ତି । ପୂର୍ବରୁ ହାଇକୋର୍ଟ ଏହି ମାମଲାରେ ମରାମତି କାର୍ଯ୍ୟର ଅଗ୍ରଗତି ସମ୍ପର୍କରେ ଆମିକସ୍‌କ୍ୟୁରୀଙ୍କୁ ୧୫ ଦିନିଆ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ । ସେହିପରି ମାମଲାର ଶୁଣାଣିବେଳେ ପ୍ରତ୍ୱତତ୍ତ୍ୱ ବିଭାଗ ପକ୍ଷରୁ ସତ୍ୟପାଠ ଦାଖଲ କରାଯାଇଥିଲା । ଏଥିରେ ଦର୍ଶାଯାଇଥିଲା ଯେ ଆସନ୍ତା ଜାନୁୟାରୀ ୨୦୨୪ ମସିହାରୁ ନାଟ ମଣ୍ଡପ ମରାମତି କାର୍ଯ୍ୟ ଆରମ୍ଭ କରାଯିବ । ଦୈନିକ ନାଟ ମଣ୍ଡପ ମରାମତି କାର୍ଯ୍ୟ ୬ ଘଣ୍ଟା ଲେଖାଏ କରାଗଲେ ୧୮୦ ଦିନରେ କାର୍ଯ୍ୟ ଶେଷ ହେବ । ମାତ୍ର ବିଭାଗର ଏପରି ସତ୍ୟପାଠ ଓ ପ୍ରସ୍ତାବ ଉପରେ ହାଇକୋର୍ଟ ଅସନ୍ତୋଷ ପ୍ରକାଶ କରି ଦର୍ଶାଇଥିଲେ ଯେ, ନାଟ ମଣ୍ଡପ ମରାମତି ଏକ ଗୁରୁତର ପ୍ରସଙ୍ଗ ହୋଇଥିବାରୁ ଏହାର ତୁରନ୍ତ ମରାମତି ଆବଶ୍ୟକ । ନଭେମ୍ବର ୧୬ ତାରିଖରୁ ମରାମତି କାର୍ଯ୍ୟ କରିବାକୁ ହାଇକୋର୍ଟ ପ୍ରତ୍ୱତତ୍ୱ ବିଭାଗକୁ କଡା ନିର୍ଦ୍ଦେଶ ଦେଇଥିଲେ । ମାମଲାର ଶୁଣାଣିବେଳେ କଣ ପାଇଁ ୨୦୧୭ ମସିହାରୁ ନାଟ ମଣ୍ଡପର ମରାମତି କାର୍ଯ୍ୟ ଶେଷ ହୋଇନାହିଁ ସେ ନେଇ ହାଇକୋର୍ଟ ଅସନ୍ତୋଷ ବ୍ୟକ୍ତ କରିଥିଲେ । ଶ୍ରୀମନ୍ଦିର ନାଟ ମଣ୍ଡପ ତୁରନ୍ତ ମରାମତି ପାଇଁ ହାଇକୋର୍ଟରେ ମାମଲାର ମୂଳ ଆବେଦନକାରୀ ଅଭିଷେକ୍ ଦାସଙ୍କ ପକ୍ଷରୁ ଏକ ମାମଲା ରୁଜୁ କରାଯାଇଛି । ଏଥିରେ ଶ୍ରୀମନ୍ଦିର ସୁରକ୍ଷା ପାଇଁ ନାଟ ମଣ୍ଡପର ମରାମତି ତୁରନ୍ତ ଆବଶ୍ୟକ ବୋଲି ଦର୍ଶାଯାଇଛି । ଗତ ଅଗଷ୍ଟ ୧୧ ତାରିଖରେ ଆମିକସ୍‌କ୍ୟୁରୀ ନାଟ ମଣ୍ଡର ମରାମତି ଆବଶ୍ୟକ ଥିବା ଦର୍ଶାଇ ଯେଉଁ ରିପୋର୍ଟ ପ୍ରଦାନ କରିଥିଲେ ତାକୁ ତୁରନ୍ତ କାର୍ଯ୍ୟକାରୀ କରିବାକୁ ଆବେଦନ କରାଯାଇଛି ।