ସ୍ନାନ ମଣ୍ଡପରେ ଗାଧୋଇଲେ ଜଗତ ନାଥ: ଦର୍ଶନ ପାଇଁ ବଡ଼ଦାଣ୍ଡରେ ଶ୍ରଦ୍ଧାଳୁଙ୍କ ଲମ୍ବାଧାଡ଼ି

#ପୁରୀ (ଏନ୍‌.ଏମ୍‌.): ଶ୍ରୀକ୍ଷେତ୍ର ପୁରୀରେ ପବିତ୍ର ସ୍ନାନଯାତ୍ରା ଅନୁଷ୍ଠିତ ହୋଇଯାଇଛି । ସ୍ନାନବେଦିରୁ ଶ୍ରଦ୍ଧାଳୁଙ୍କୁ ପ୍ରଭୁ ଜଗତନାଥ ଦର୍ଶନ ଦେଇଛନ୍ତି । ଏଥିପାଇଁ ପୂର୍ବଦିନରୁ ପୁରୀ ସହରେ ସ୍ନାନଯାତ୍ରାର ଭିଡ଼ ଦେଖିବାକୁ ମିଳିଥିଲା । ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ବଡ଼ଦାଣ୍ଡ ବାରିକେଡ୍ ଦେଇ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଛନ୍ତି । ଏତେ ଭିଡ଼ ରହିଛି ଯେ ଶ୍ରଦ୍ଧାଳୁଙ୍କ ଧାଡ଼ି ମରିଚିକୋଟ ଛକ ଅତିକ୍ରମ କରିଛି । ସେପଟେ ନିଜେ ଏସ୍ପି ଡା. କେ. ବିଶାଳ ସିଂହ ଆଜି ନିଜେ ଘଟଣାସ୍ଥଳରେ ରହି ଭିଡ଼ ନିୟନ୍ତ୍ରଣ କରିଛନ୍ତି । ଶୃଙ୍ଖଳିତ ଦର୍ଶନ ପାଇଁ ନିଜେ ଧାଡ଼ିରେ ରହି ଭକ୍ତଙ୍କୁ ଛାଡ଼ିଛନ୍ତି । ସ୍ନାନ ଉତ୍ସବର ଅବ୍ୟବହିତ ପୂର୍ବରୁ ରାତିରେ ବାହୁଟକଣ୍ଟ ଓ ଚାରମାଳ ବନ୍ଧା ନୀତି ରହିଥିଲା । ବାହୁଟକଣ୍ଟ ପରେ କୋଠ ସୁଆଁସିଆମାନେ ରତ୍ନ ସିଂହାସନରେ ଚାରମାଳ ବାନ୍ଧିବା ପାଇଁ ପ୍ରବେଶ କରିଥିଲେ । ଚାରମାଳ ବାନ୍ଧି ସକାଳେ କୋଠ ସୁଆଁସିଆ ବାହାରିବା ପରେ ସେନାପଟା ଲାଗି ନୀତି ଆରମ୍ଭ ହୋଇଥିଲା । ଦଇତାପତି ସେବକମାନେ ପହଣ୍ଡିରେ ଶ୍ରୀଜିଉଙ୍କ ଅଙ୍ଗକୁ ଅକ୍ଷତ ରଖିବା ପାଇଁ ସେନାପଟା ଲାଗି ନୀତି ଶେଷ କରିଛନ୍ତି । ଏହି ଉପଲକ୍ଷେ ହଜାର ହଜାର ସଂଖ୍ୟାରେ ଭକ୍ତ ମହାପ୍ରଭୁଙ୍କ ଦର୍ଶନ କରିଥିଲେ । ସ୍ନାନ ପାଇଁ ବଡ଼ି ଭୋରୁ ଶ୍ରୀଜିଉମାନଙ୍କ ପହଣ୍ଡି ଆରମ୍ଭ ହୋଇଥିଲା । ସକାଳ ୭ଟା ସୁଦ୍ଧା ମହାପ୍ରଭୁ ବଳଭଦ୍ର ଓ ଦେବୀ ସୁଭଦ୍ରା ଓ ମହାପ୍ରଭୁ ଜଗନ୍ନାଥଙ୍କ ପହଣ୍ଡି ଚରାଯାଇ ଜିଉମାନଙ୍କୁ ସ୍ନାନ ବେଦୀରେ ଉପବିଷ୍ଟ କରାଯାଇଥିଲା । ଶ୍ରୀଜିଉମାନଙ୍କୁ ଧାଡ଼ି ପହଣ୍ଡିରେ ଅଣାଯାଇଥିଲା । ନୀତିକାନ୍ତି ଅନୁସାରେ ମହାପ୍ରଭୁଙ୍କୁ ୧୦୮ ଗରା ସୁବାସିତ ଜଳରେ ସ୍ନାନ କରାଯାଇଛି । ପୂର୍ବରୁ ସୁନାକୁଅ ବି ଶୋଧ ହୋଇ ହୋଇଥିଲା ।ସମସ୍ତେ ଯେଭଳି ଶୃଙ୍ଖଳାର ସହ ଦର୍ଶନ କରିପାରିବେ ଶ୍ରୀମନ୍ଦିର ପ୍ରଶାସନ ଓ ପୁଲିସ ପକ୍ଷରୁ ବ୍ୟବସ୍ଥା କରାଯାଇଛି । ଦୟଣାମାଳି ସେବକମାନେ ଏହି ଶୋଧ ନୀତି ସମ୍ପନ୍ନ କରିଛନ୍ତି । ପ୍ରତିବର୍ଷ ଭଳ ଦୟଣାମାଳି ସେବକମାନେ ସୁନା କୂଅର ମୁଦ ଖୋଲି ଏହାକୁ ଶୋଧ କରିଥିଲେ । କୂଅ ଭିତରେ ଥିବା ଅଳିଆ ଆବର୍ଜନା, ପଙ୍କ ଆଦିକୁ ସଫା କରିଥିଲେ । ପରେ ଚୁନ ପକାଇ କୂଅର ପାଣିକୁ ସଫା କରାଯାଇଥିଲା । ଏହାପରେ ଶୀତଳା ମନ୍ଦିର ସିଂହଙ୍କୁ ପ୍ରଥମେ ଏହି ଜଳରେ ସ୍ନାନ କରାଯାଇଥିଲା । ପରେ ଅଧିବାସ ନୀତି ସମ୍ପନ୍ନ ସହ ମହାପ୍ରଭୁଙ୍କ ପତନୀ କୂଅରେ ବାନ୍ଧି, ମୁଣ୍ଡିଆ ମାରି ସେବକମାନେ ଫେରିଥିଲେ । ଆସନ୍ତାକାଲି ସକାଳୁ ସୁନା ଗୋସେଇଁ ସେବକମାନେ ସୁନା କୂଅରୁ ୧୦୮ ଗରା ଜଳ କାଢ଼ି ଆନନ୍ଦବଜାର ପାଣିଘର ନିକଟରେ ରଖିଥିଲେ । ସେଥିରେ ଚନ୍ଦନ, କର୍ପୁର, ଚୁଆ ଆଦି ପକାଇ ପୂଜାର୍ଚ୍ଚନା ପରେ ଗରାବଡ଼ୁ ସେବକମାନେ ସ୍ନାନବେଦିକୁ ଏହି ଜଳକୁ ବିଜେ କରିଥିଲେ । ପରେ ପାଳିଆ ପୂଜାପଣ୍ଡା ଓ ପୁଷ୍ପାଳକ ସେବକମାନେ ଗରାବଡ଼ୁ ସେବକମାନଙ୍କ ଠାରୁ ଗରାରେ ନେଇଥିବା ଜଳକୁ ରୁପା ପିଙ୍ଗଣରେ ରଖି ଚତୁର୍ଦ୍ଧାମୂର୍ତ୍ତିକୁ ସ୍ନାନ କରାଇଥିଲେ ।