ସି.ଡି.ଏ ଠାରେ ପାନୀୟଜଳ ପ୍ରଦାନ କେନ୍ଦ୍ରର ଉଦ୍ଘାଟନ କଲେ କଟକ ମେୟର
କଟକ(ଏନ୍.ଏମ୍.): ମାର୍ଚ୍ଚ ଆରମ୍ଭ ନହେଉଣୁ ଏବେ ଅନୁଭୂତ ହେଉଛି ପ୍ରବଳ ଖରା। ଅସହ୍ୟ ଗରମ ସାଙ୍ଗକୁ ରାସ୍ତାଘାଟ ପାଲଟି ଯାଉଛି ତତଲା କଡେଇ। ତେଣୁ ଏବେ କଟକ ସହରରେ ଗ୍ରୀଷ୍ମ ପ୍ରଭାବ ଅନୁଭୂତ ହେଉଛି। ଏହି ପରିପ୍ରେକ୍ଷୀରେ ପଥଚାରୀ, ସ୍ଥାନୀୟ ବ୍ୟବସାୟୀମାନଙ୍କୁ ଗ୍ରୀଷ୍ମ ପ୍ରଭାବରୁ ରକ୍ଷା କରିବା ନିମନ୍ତେ ସିଡିଏ ଅଞ୍ଚଳରେ ପାନୀୟ ଜଳ ବିତରଣ କେନ୍ଦ୍ର ଉଦ୍ଘାଟିତ ହୋଇ ଯାଇଛି। ଉତ୍କଳ ଗ୍ରାମ୍ୟ ସ୍ୱରାଜ ତରଫରୁ ସି.ଡି.ଏ ସେକ୍ଟର -୭ ଠାରେ ଥିବା ପରିବା ଗଡ଼ା ନିକଟରେ ପାନୀୟ ଜଳ ବିତରଣ କାର୍ଯ୍ୟକ୍ରମରେ କଟକ ମେୟର ସୁବାସ ସିଂହ ମୁଖ୍ୟଅତିଥି ଭାବେ ଯୋଗଦେଇ ଏହାକୁ ଉଦ୍ଘାଟନ କରିଥିଲେ। ଏହି ଅବସରରେ ମେୟର ଶ୍ରୀ ସିଂହଙ୍କ ସହିତ ସ୍ଥାନୀୟ କର୍ପୋରେଟର ପ୍ରିୟମ୍ବଦା ସ୍ୱାଇଁ, ଆଇନଜୀବୀ ବିନୋଦ ପଣ୍ଡା, ଉତ୍କଳ ଗ୍ରାମ୍ୟ ସ୍ୱରାଜ ସଭାନେତ୍ରୀ ନିର୍ଝରଋଣୀ ମହାପାତ୍ର, ସମ୍ପାଦକ ଦୁଷ୍ମନ୍ତ ଦଳାଇ, କୋଷାଧ୍ୟକ୍ଷ ମଧୂସୁଧନ ଗୋଛୟତ, ଉତ୍କଳ ଗ୍ରାମ୍ୟ ସ୍ୱରାଜର ସମସ୍ତ ସଦସ୍ୟ, ସ୍ଥାନୀୟ ଯୁବବର୍ଗ ପ୍ରମୁଖ ଉପସ୍ଥିତ ଥିଲେ।