ସାମ୍ବାଦିକ ବନବିହାରୀ ମହାନ୍ତି ସମ୍ମାନ ପାଇବେ ସୁଧାଂଶୁ ମୋହନ ଆଚାର୍ଯ୍ୟ


କଟକ(ଏନ୍‌.ଏମ୍‌.): ଚଳିତ ବର୍ଷର ମର୍ଯ୍ୟାଦାଜନକ ସାମ୍ବାଦିକ ବନବିହାରୀ ମହାନ୍ତି ସ୍ମୃତି ସମ୍ମାନ ପାଇବେ ଯୁବ ସାମ୍ବାଦିକ ସୁଧାଂଶୁ ମୋହନ ଆଚାର୍ଯ୍ୟ। ବନବିହାରୀ ମହାନ୍ତି ଫାଉଣ୍ଡେସନ ଓ କଟକ ପ୍ରେସ୍‌କ୍ଲବ ପକ୍ଷରୁ ଏନେଇ ଆଜି ଘୋଷଣା କରାଯାଇଛି। ଶ୍ରୀ ଆଚାର୍ଯ୍ୟ ୧୪ବର୍ଷରୁ ଉର୍ଦ୍ଧ୍ୱକାଳ ରାଜ୍ୟର ବିଭିନ୍ନ ପ୍ରମୁଖ ଓଡ଼ିଆ ସମ୍ବାଦପତ୍ରରେ ସ୍ୱଚ୍ଛ, ନିରପେକ୍ଷ ତଥା ମୂଲ୍ୟଭିତ୍ତିକ ସମ୍ବାଦ ପରିବେଷଣ କରିଆସିଛନ୍ତି। ସାମ୍ବାଦିକତା ପ୍ରତି ବୃତ୍ତଗତ ନିଷ୍ଠା, ଅଙ୍ଗିକାରବଦ୍ଧତା ପାଇଁ ତାଙ୍କୁ ଏହି ମର୍ଯ୍ୟାଦାଜନକ ସମ୍ମାନ ପ୍ରଦାନ କରିବା ଲାଗି ଫାଉଣ୍ଡେସନ୍‌ର ଚୟନ କମିଟି ପକ୍ଷରୁ ଆୟୋଜିତ ଏକ ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି। ଆସନ୍ତା ୨୪ ତାରିଖ ସନ୍ଧ୍ୟାରେ ଚୌଧୁରୀବଜାରସ୍ଥିତ ପ୍ରେସ୍‌କ୍ଲବର ସମ୍ମିଳନୀ କକ୍ଷରେ ପାଉଣ୍ଡେସନ୍ ଓ ପ୍ରେସ୍‌କ୍ଲବର ମିଳିତ ଆନୁକୁଲ୍ୟରେ ଏକ ଭବ୍ୟ ଉତ୍ସବ ଅନୁଷ୍ଠିତ ହେବ। ଏହି ଉତ୍ସବରେ ଶ୍ରୀ ଆଚାର୍ଯ୍ୟଙ୍କୁ ଉକ୍ତ ସମ୍ମାନ ପ୍ରଦାନ କରାଯିବ। ପୁରସ୍କାର ସ୍ୱରୂପ ୫ହଜାର ଟଙ୍କା, ମାନପତ୍ର, ଉପଢୌକନ ଓ ସ୍ମୃତିଫଳକ ପୂର୍ବକ ଏହି ସମ୍ମାନ ତାଙ୍କୁ ପ୍ରଦାନ କରାଯିବ। ଏହି ଉତ୍ସବରେ ମୁଖ୍ୟଅତିଥି ଭାବେ ଗୃହ ନିର୍ମାଣ ଓ ନଗର ଉନ୍ନୟନ, ସାଧାରଣ ଉଦ୍ୟୋଗ ମନ୍ତ୍ରୀ ଡା.କୃଷ୍ଣ ଚନ୍ଦ୍ର ମହାପାତ୍ର, ସମ୍ମାନନୀୟ ଅତିଥି ଭାବେ ବାରବାଟୀ-କଟକ ବିଧାୟିକା ଇଂ.ସୋଫିଆ ଫିର୍ଦ୍ଦୋଷ, ମୁଖ୍ୟବକ୍ତା ଭାବେ ସୂଚନା କମିଶନର ସୁଶାନ୍ତ କୁମାର ମହାନ୍ତି ଯୋଗଦେବେ ବୋଲି ଫାଉଣ୍ଡେସନ୍‌ର ମ୍ୟାନେଜିଂ ଟ୍ରଷ୍ଟି ଲକିପ୍ରଜ୍ଞା ପ୍ରତିଷ୍ଠିତ ମହାନ୍ତି, ଟ୍ରଷ୍ଟି ତଥା ସାମ୍ବାଦିକ ଆଲୋକ ନାୟକ,ବରିଷ୍ଠ ସାମ୍ବାଦିକ ପ୍ରଦୀପ ସାହୁ ଜଣାଇଛନ୍ତି।

By admin

Leave a Reply

Your email address will not be published. Required fields are marked *