ସର୍ଭିସ ପ୍ରୋଭାଇଡର କର୍ମଚାରୀଙ୍କୁ ଠକୁଛି ଠିକାସଂସ୍ଥା
ସିଏମସି ସମ୍ମୁଖରେ ବିକ୍ଷୋଭ ସହ କମିଶନରଙ୍କୁ ସ୍ମାରକପତ୍ର

#କଟକ(ଏନ୍‌.ଏମ୍‌.): କଟକ ମହାନଗର ନିଗମରେ ସର୍ଭିସ ପ୍ରୋଭାଇଡରରେ କାର୍ଯ୍ୟକରୁଥିବା କର୍ମଚାରୀମାନଙ୍କୁ ଠକୁଛି ଠିକା ସଂସ୍ଥା । ମାସମାସ ଧରି କର୍ମଚାରୀମାନଙ୍କୁ କାମ କରାଇ ବେତନ ଓ ଅନ୍ୟାନ୍ୟ ପ୍ରାପ୍ୟ ଠିକ୍ ସମୟରେ ନଦେବା ପ୍ରତିବାଦରେ ଆଜି କର୍ମଚାରୀମାନେ ସିଏମସି ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ସିଏମସି କମିଶନରଙ୍କୁ ଏକ ସ୍ମାରକପତ୍ର ପ୍ରଦାନ କରିଛନ୍ତି । ସୂଚନା ଯୋଗ୍ୟ ଏହିକି ଯେ, ସିଏମସି ପକ୍ଷରୁ ଜେପିଏନ (ଜଗନ୍ନାଥ ପ୍ରସାଦ ନର୍ସରୀ) ଏଜେନ୍ସି ମାଧ୍ୟମରେ କଟକ ସହରର ବିଭିନ୍ନ କାର୍ଯ୍ୟରେ ନିୟୋଜିତ ଥିବା କର୍ମଚାରୀମାନଙ୍କୁ ଠିକ୍ ଭାବେ ପ୍ରାପ୍ୟ ମିଳୁନାହିଁ । ପରିମଳ, ପାର୍କ ଆଦି ରକ୍ଷଣାବେକ୍ଷଣ, ସିକ୍ୟୁରିଟି ସହ ସ୍ୱାସ୍ଥ୍ୟ ବିଭାଗରେ କାର୍ଯ୍ୟରତ ଅସ୍ଥାୟୀ ସର୍ଭିସ ପ୍ରୋଭାଇଡର କର୍ମଚାରୀମାନେ ଏ ନେଇ ସମ୍ପୃକ୍ତ ସଂସ୍ଥାକୁ ବାରମ୍ବାର ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନଥିବା କର୍ମଚାରୀମାନେ ପ୍ରକାଶ କରିଛନ୍ତି । ଏପରିକି ୩ମାସ ଧରି ସେମାନଙ୍କୁ ବେତନ ଦିଆଯାଇ ନଥିବାବେଳେ ମାସମାସ ଧରି ସେମାନଙ୍କ ଇପିଏଫ ଓ ଇଏସଆଇ ଡିପୋଜିଟ କରାଯାଉନାହିଁ । ଫଳରେ କର୍ମଚାରୀମାନେ ସେମାନଙ୍କ ମୌଳିକ ଅଧିକାରରୁ ବଞ୍ଚିତ ହେବା ସହ ଦୟନୀୟ ଅବସ୍ଥାରେ କାଳାତିପାତ କରୁଛନ୍ତି । ଏ ନେଇ ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ ବାରମ୍ବାର ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ନମିଳିବାରୁ ଆଜି ବାଧ୍ୟ ହୋଇ ସିଏମସି କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । କର୍ମଚାରୀମାନେ ଠିକାସଂସ୍ଥା ଅଧିନରେ କାର୍ଯ୍ୟକରୁଥିଲେ ମଧ୍ୟ ସେମାନେ ସିଏମସିର ହିଁ କାର୍ଯ୍ୟ କରୁଛନ୍ତି । ତେଣୁ ସିଏମସି କମିଶନର ତାଙ୍କୁ ନ୍ୟାୟ ପ୍ରଦାନ କରନ୍ତୁ ବୋଲି କର୍ମଚାରୀମାନେ ଦାବି କରିଛନ୍ତି । ତେବେ କର୍ମଚାରୀଙ୍କୁ ଅଭିଯୋଗକୁ ଶୁଣିବା ପରେ ସିଏମସି କମିଶନର ତୁରନ୍ତ ସେମାନଙ୍କ ସମସ୍ୟାର ସମାଧାନ କରିବା ନିମନ୍ତେ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେବାରୁ କର୍ମଚାରୀଙ୍କ ବିକ୍ଷୋଭ ପ୍ରତ୍ୟାହୃତ ହୋଇଥିଲା ।