ସରକାରୀ ବିଦ୍ୟାଳୟ ମୁଖ୍ୟ ଗେଟ ପଡ଼ି ନାବାଳ ମୃତ୍ୟୁ
#ଆଠଗଡ଼ (ଏନ୍.ଏମ୍.): ଆଠଗଡ଼ ବ୍ଲକ ଆଙ୍କୁଲା ସତ୍ୟ ବାଦୀ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟର ମୁଖ୍ୟ ଗେଟ ଭାଙ୍ଗି ପଡିବାରୁ ଜଣେ ନାବାଳକର ମୃତ୍ୟୁ ଘଟିଛି । ଆଙ୍କୁଲା ଗ୍ରାମର କାର୍ତ୍ତିକ ନାଏକ ନିଜର ବୃତ୍ତି ପାଇଁ ସପରିବାର କଟକରେ ରହୁନ୍ତି । ଆଜି ସେ ନିଜ ଗାଁ ଆଙ୍କୁଲାକୁ ଆସିଥିବା ବେଳେ ତାଙ୍କର ୭ ବର୍ଷ ପୁଅ ଚିକୁ ନାଏକ ନିଜର ଦୁଇ ଜଣ ସାଙ୍ଗଙ୍କ ସହ ଗ୍ରାମ ପ୍ରାଥମିକ ବିଦ୍ୟାଳୟକୁ ଖେଳିବାକୁ ଯାଇଥିଲେ । ଆଜି ବିଦ୍ୟାଳୟ ଛୁଟି ଥିବାରୁ ବିଦ୍ୟାଳୟ ବନ୍ଦ ରହିଥିଲା । ମାତ୍ର ବିଦ୍ୟାଳୟ ଗେଟ୍ଟି ଖୋଲା ରହିଥିଲା । ପିଲାମାନେ ଖେଳ ସାରି ଅପରାହ୍ନ ୫ ଟା ସମୟରେ ଘରକୁ ଫେରିବା ପାଇଁ ଆସୁଥିବା ବେଳେ ବିଦ୍ୟାଳୟ ଗେଟ୍ର ଗୋଟିଏ ପାର୍ଶ୍ୱ ଲୁହା ଗ୍ରୀଲ ସେମାନଙ୍କ ଉପରେ ପଡ଼ିଯାଇଥିଲା । ଫଳରେ ଘଟଣା ସ୍ଥଳରେ ଚିକୁ ନାଏକ ଉପରେ ଗେଟ୍ଟି ମାଡିବସିଥିବା ବେଳେ ଅନ୍ୟ ଦୁଇ ଶିଶୁ ଅଳ୍ପକେ ରକ୍ଷା ପାଇଯାଇଥିଲେ । ତେବେ ଚିକୁ ଉପରେ ଗେଟ ଗ୍ରୀଲ ପଡ଼ିଯିବାରୁ ସେ ଗୁରୁତର ହୋଇ ପଡ଼ିଥିଲେ । ତେବେ ତାଙ୍କୁ ସଂଗେସଂଗେ ମୋଟର ସାଇକେଲ ଯୋଗେ ଆଠଗଡ଼ ଡାକ୍ତରଖାନାକୁ ନିଆ ଯାଇଥିଲେ ମଧ୍ୟ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ । ତେବେ ଚିକୁର ମୃତ୍ୟୁପରେ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଥିବାବେଳେ ଅନ୍ୟ ଅଭିଭାବକମାନେ ମଧ୍ୟ ତାଙ୍କ ପିଲାଙ୍କୁ ଉକ୍ତ ସ୍କୁଲୁକୁ ଛାଡ଼ିବାକୁ ଅନିଚ୍ଛା ପ୍ରକାଶ କରୁଛନ୍ତି । ତେବେ ଏ ନେଇ ଆଠଗଡ଼ ଥାନାରେ ଅପମୃତ୍ୟୁ ମାମଲା ୯/୨୩ ଅନୁସାରେ ମାମଲା ରୁଜୁ କରି ତଦନ୍ତ ଆରମ୍ଭ କରାଯାଇଛି ବୋଲି ସବ ଇନିସପେକ୍ଟର ବିଶ୍ୱଜିତ ଜେନା ପ୍ରକାଶ କରିଛନ୍ତି ।