ଶିକ୍ଷକ ଅଭାବ ନେଇ ବିଦ୍ୟାଳୟ ଆଗରେ ଧାରଣା ଦେଲେ ଛାତ୍ରଛାତ୍ରୀ

#ଆଠଗଡ଼(ଏନ୍‌.ଏମ୍‌.): ସମ୍ପ୍ରତି ରାଜ୍ୟରେ ସରକାର ଶିକ୍ଷାର ଉନ୍ନତିକରଣ ପାଇଁ ଯେଉଁ ଉଦ୍ୟମ କରୁଛନ୍ତି ତାହା କେବଳ ଲୋକ ଦେଖାଣିଆ ବୋଲି ଅଭିଭାବକଙ୍କ ମହଲରେ ଅଭିଯୋଗ ହେଉଛି । ଗୋଟିଏ ପଟେ ଶିକ୍ଷାର ବିକାଶ ନିମନ୍ତେ ଭିତ୍ତିଭୂମିର ଉନ୍ନତିକରଣ କରିବା ନିମନ୍ତେ ମୋ ସ୍କୁଲ ଯୋଜନା କରାଯାଇଥିବାବେଳେ ଛାତ୍ରଛାତ୍ରୀମାନଙ୍କୁ ସରକାରୀ ସ୍କୁଲ ପ୍ରତି ଆକୃଷ୍ଟ କରିବା ନିମନ୍ତେ ପୋଷାକ ବିତରଣ, ପୁସ୍ତକ ପ୍ରଦାନ ଆଦି କରୁଛନ୍ତି । ଏଥି ସହିତ ମଧ୍ୟାହ୍ନ ଭୋଜନ ମଧ୍ୟ ଦିଆଯାଉଛି । ମାତ୍ର ଶିକ୍ଷାର ପ୍ରକୃତ ଭିତ୍ତିଭୂମି କୁହାଯାଉଥିବା ଶିକ୍ଷକଙ୍କ ଅଭାବକୁ ସରକାର ଦୂର କରି ପାରିନଥିବା ଦୁର୍ଭାଗ୍ୟଜନକ ବୋଲି ଅଭିଭାବକମାନେ ମତ ଦେଉଛନ୍ତି । ଗୋଟିଏ ପଟେ ପ୍ରତି ୩୦ ଛାତ୍ରଛାତ୍ରୀରେ ଜଣେ ଶିକ୍ଷକ ରହିବାର ବ୍ୟବସ୍ଥା ଥିବାବେଳେ ଏହା କେବଳ କାଗଜକଲମରେ ବୋଲି ଚର୍ଚ୍ଚା ହେଉଛି । ସମ୍ପ୍ରତି ବିଭିନ୍ନ ସ୍କୁଲକୁ ରୂପାନ୍ତରିକରଣ କରିବା ବେଳେ ଅନେକ ଛୋଟ ଛୋଟ ଶିକ୍ଷାନୁଷ୍ଠାନକୁ ଉଚ୍ଛେଦ କରି ଗୋଟିଏ ଗୋଟିଏ ସ୍କୁଲରେ ମିଶାଇ ଦିଆଗଲା; ମାତ୍ର ଶିକ୍ଷକଙ୍କ ଅଭାବ ଯୋଗୁଁ ଏବେ ଶିକ୍ଷାଦାନ ବିପର୍ଯ୍ୟସ୍ତ ହେଉଥିବା କୁହାଯାଉଛି । ତେବେ ସ୍କୁଲରେ ଆବଶ୍ୟକ ସଂଖ୍ୟକ ଶିକ୍ଷକ ନଥିବାବେଳେ ସେଠାରୁ ଶିକ୍ଷକଙ୍କୁ ଅନ୍ୟତ୍ର ବଦଳିକରାଯିବାକୁ ନେଇ ଛାତ୍ରଛାତ୍ରୀ ଓ ଅଭିଭାବକଙ୍କ ମହଲରେ ଅସନ୍ତୋଷ ଦେଖିବାକୁ ମିଳିଛି । କଟକ ଜିଲ୍ଲାର ଆଠଗଡ଼ ବ୍ଳକ୍ ଅନ୍ତର୍ଗତ ମଞ୍ଚେଶ୍ୱର୍ ଗ୍ରାମରେ ଥିବା ଧବଳେଶ୍ୱର ସରକାରୀ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବକୁ ନେଇ ଛାତ୍ର ଛାତ୍ରୀ ବିଦ୍ୟାଳୟ ଫାଟକ ଆଗରେ ଧାରଣା ବସିଥିବା ଘଟଣା ଶିକ୍ଷା ବ୍ୟବସ୍ଥାର ବିପର୍ଯ୍ୟୟକୁ ଇଙ୍ଗିତ କରୁଛି । ତେବେ ଏହି ବିଦ୍ୟାଳୟର ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଥିବାବେଳେ ପାଖାପାଖି ୨୦୦ ରୁ ଅଧିକ ଛାତ୍ର ଛାତ୍ରୀ ପାଠ ପଢନ୍ତି । କିନ୍ତୁ ସମୁଦାୟ ୪ଜଣ ଶିକ୍ଷକରେ ଏହି ବିଦ୍ୟାଳୟଟି ଚାଲେ । ଯେଉଁଠି ସରକାରୀ ନିୟମ ଅନୁସାରେ ପ୍ରତି ୩୦ଜଣ ପିଲାରେ ଜଣେ ଶିକ୍ଷକ ରହିବା ଆବଶ୍ୟକ ତେବେ ଏତେ ସଂଖ୍ୟକ ପିଲାରେ ଏତେ କମ ଶିକ୍ଷକ ରହିଛନ୍ତି । ଏନେଇ ଅଭିଭାବକ ଓ ଛାତ୍ର ଛାତ୍ରୀ ମାନେ ବାରମ୍ୱାର ଆଠଗଡ଼ ଶିକ୍ଷା ଅଧିକାରୀ ଓ ଅନ୍ୟାନ୍ୟ ବିଭାଗକୁ ଅବଗତ କରିଥିଲେ ମଧ୍ୟ ଏହାର ସୁଫଳ ମିଳିନାହିଁ । ବରଂ ଜଣେ ଶିକ୍ଷକଙ୍କୁ ଅନ୍ୟତ୍ର ବଦଳି କରାଗଲା । ତେଣୁ ବାଧ୍ୟ ହୋଇ ଆଜି ଛାତ୍ରଛାତ୍ରୀ ବିଦ୍ୟାଳୟ ଆସି ମୁଖ୍ୟ ଫାଟକ ଆଗରେ ବସି ଶିକ୍ଷକ ଅଭାବ ପୁରଣ କରିବା ନିମନ୍ତେ ଦାବି କରିଛନ୍ତି । ତେବେ ଏହି ବିଦ୍ୟାଳୟଟି ରାଜ୍ୟର ସମସ୍ତ ବିଦ୍ୟାଳୟ ଠାରୁ ଭିନ୍ନ କାରଣ ଏଠାରେ କାର୍ଯ୍ୟ ଦିବସ ଅର୍ଥାତ ସୋମବାର ବିଦ୍ୟାଳୟ ବନ୍ଦ ରହିଥିବାବଳେ ଛୁଟିଦିନ ଅର୍ଥାତ ରବିବାର ଦିନ ବିଦ୍ୟାଳୟରେ ପାଠ ପଢାଯାଏ । ତେବେ ଏହି ସ୍କୁଲ ପ୍ରତି ସରକାର ବୈମାତୃକ ମନୋଭାବ ପ୍ରଦର୍ଶନ କରୁଥିବା ଅଭିଭାବକମାନେ ପ୍ରକାଶ କରିଛନ୍ତି । ତେବେ ଛାତ୍ରଛାତ୍ରୀ ଓ ଅଭିଭାବକଙ୍କ ଦାବିକୁ ସରକାର କେବେ ସମାଧାନ କରୁଛନ୍ତି ତାହା ସମୟକୁ ଅପେକ୍ଷା ।