ଲକ୍ଷାଧିକ ଟଙ୍କାର ଚୋରା ବିଦ୍ୟୁତ୍ ସାମଗ୍ରୀ ଜବତ,୨ ଗିରଫ
#ଚୌଦ୍ୱାର(ଏନ୍.ଏମ୍.): ଚୌଦ୍ୱାର ଥାନା ଅନ୍ତର୍ଗତ ୧୭ନମ୍ବର ୱାର୍ଡ଼ ନୂଆସାହିରେ ବିଦ୍ୟୁତ୍ ସାମଗ୍ରୀ ଚୋରି ଘଟଣାରେ ପୁଲିସ୍ ୨ଜଣଙ୍କୁ ଗିରଫ କରିବା ସହ ବିପୁଳ ପରିମାଣର ଚୋରି ସାମଗ୍ରୀ ଜବତ କରିଛି । ଏହି ଜବତ ସାମଗ୍ରୀ ମଧ୍ୟରେ ପ୍ରାୟ ୧୩୦କେଜି ଓଜନର ୫ବଣ୍ଡଲ ବିଦ୍ୟୁତ୍ ତାର ଓ ୨ ବଣ୍ଡଲ ଇଲେକ୍ଟ୍ରି କେବୁଲ ଜବତ ହୋଇଛି । ତେବେ ଏହି କାର୍ଯ୍ୟରେ ବ୍ୟବହୃତ ଓଡି୦୫ ବିଡି ୮୮୨୫ ନମ୍ବର ବିଶିଷ୍ଟ ଏକ ଟାଟା ଏସି ଗାଡ଼ିକୁ ମଧ୍ୟ ପୁଲିସ ଜବତ କରିଥିବା ଜଣାପଡ଼ିଛି । ସୂଚନା ଯୋଗ୍ୟ ଯେ, ସ୍ଥାନୀୟ କପାଳେଶ୍ୱର ନୂଆସାହିରେ ବେଆଇନ୍ ଭାବେ ବିଦ୍ୟୁତ୍ ସାମଗ୍ରୀ ଚୋରା ଚାଲାଣ ହେଉଥିଲା । ତେବେ ଏ ନେଇ ପୁଲିସ ବିଶ୍ୱସ୍ତସୂତ୍ରରୁ ଖବର ପାଇ ଅଚାନକ ଚଢ଼ାଉ କରିଥିଲା । ଥାନା ଅଧିକାରୀ ବିଶ୍ୱରଞ୍ଜନ ସାହୁଙ୍କ ନିର୍ଦ୍ଦେଶକ୍ରମେ ଏକ ପୁଲିସ୍ ଟିମ୍ ଘଟଣା ସ୍ଥଳରେ ଚଢ଼ାଉ କରି ସମସ୍ତ ସାମଗ୍ରୀ ସହ ଚୌଦ୍ୱାର ଥାନା କପାଳେଶ୍ୱର ନୂଆସାହିର ଗଣେଶ୍ୱର ଜେନା ଏବଂ କଟକ କିଶନନଗର ଥାନା ଅନ୍ତର୍ଗତ ମହମ୍ମଦପୁର ଅଞ୍ଚଳର ପଞ୍ଚାନନ ଦଳେଇ ଓରଫ ବାପିକୁ ଗିରଫ୍ କରିଛି । ଅଭିଯୁକ୍ତ ଗଣେଶ୍ୱର ଏହି ସମସ୍ତ ସାମଗ୍ରୀ ପଞ୍ଚାନନ ଠାରୁ କିଣିଥିବା ନେଇ ପୁଲିସ୍ ଜାଣିବା ପରେ କେସ୍ ନଂ.୩୯୩ରେ ମାମଲା ରୁଜୁକରି ଅଭିଯୁକ୍ତ ଦ୍ୱୟଙ୍କୁ କୋର୍ଟଚାଲାଣ କରାଯାଇଥିବା ଜଣାପଡ଼ିଛି ।