ମହାଶିବରାତ୍ରୀ ପାଇଁ କମ୍ପୁଛି ଶୈବପୀଠ
କଟକ(ଏନ୍.ଏମ୍.): ଓଁ ତତ୍ପୁରୁଷାୟ ବିଦ୍ମହେ ମହାଦେବାୟ ଧୀ ମହି ତନ୍ନୋ ରୁଦ୍ରୋ ପ୍ରଚୋଦୟାତ। ଆଜି ହେଉଛି ପବିତ ମହାଶିବ ରାତ୍ରୀ। ବର୍ଷକରେ ୧୨ଟି ଶିବରାତ୍ରୀ ପଡ଼ୁଥିବାବେଳେ ଆଜି ମହାଶିବରାତ୍ରି। ଏହି ତିଥିରେ ବ୍ରତ ରଖିବା ସହ ପ୍ରଭୁ ଭୋଳାଶଙ୍କରଙ୍କୁ ପୂଜା ଆରଧନା କଲେ ମନସ୍କାମନା ପୂରଣ ହୁଏ ବୋଲି ଶ୍ରଦ୍ଧାଳୁଙ୍କ ବିଶ୍ୱାସ ରହିଛି। ଆଜି ବିଳମ୍ବିତ ରାତିରେ ବାବା ଭୋଳାଙ୍କରଙ୍କ ମହାଦୀପ ପ୍ରଜ୍ଜ୍ୱଳନ କରାଗଲେ ସଂସାରର ଅମା ଅନ୍ଧାର ଦୂର ହୁଏ ବୋଲି ପୌରାଣିକ ମତ ମଧ୍ୟ ରହିଛି। ଏହି ଅବସରରେ ପ୍ରଭୁ ଭୋଳାଶଙ୍କର ସ୍ୱତନ୍ତ୍ର ପୂଜା କରିଥିଲେ ଶ୍ରଦ୍ଧାଳୁ। ରାଜ୍ୟର ପ୍ରତ୍ୟେକ ଶୈବ ପୀଠ ଶ୍ରଦ୍ଧାଳୁଙ୍କ ଆଗମନରେ ହୋଇ ଉଠିଥିଲା ଜନସମୁଦ୍ର। ଶ୍ରଦ୍ଧାଳୁମାନେ ଧୂପ ଦୀପ ଦେଇ ଏହି ମନ୍ଦିରରେ ମହାଦେବଙ୍କୁ ଆରଧନା କରିବା ସହ ପୂଜକ ଭକ୍ତଙ୍କ ଠାରୁ କ୍ଷୀର ଫୁଲ ଚଢ଼ାଇ ପାଦୁକ ନେଉଥିବା ଦେଖିବାକୁ ମିଳିଥିଲା।
ଦିନ ତମାମ ଶିବ ଭଗବାନଙ୍କ ପୂଜାର୍ଚ୍ଚନାରେ ଶ୍ରଦ୍ଧାଳୁମାନେ ମଜ୍ଜିଥିବାବେଳେ ସଂଧ୍ୟାର ୪ପ୍ରହର ଯାକ ଜାଗର ପୂଜା କରିଥିଲେ। ପ୍ରଥମ ପ୍ରହର ପୂଜାରେ ପ୍ରଭୁ ଶିବ ଶଙ୍କରଙ୍କ ରଜ ଗୁଣରେ ପୂଜା କରାଯାଇଥିବା ବେଳେ ଦୁଗ୍ଧସ୍ନାନ କରାଯାଇ ତ୍ରିଶାଖା ବେଲ ପତ୍ରରେ ପୂଜାର୍ଚ୍ଚନା କରାଯାଇଥିଲା। ସେହିପରି ପରବର୍ତ୍ତୀ ଦ୍ୱିତୀୟ ପ୍ରହରରେ ତମ ଗୁଣରେ ପୂଜାର୍ଚ୍ଚନା ହୋଇଥିଲା। ଏହା ମହାଦେବଙ୍କର ଅଘୋରୀ ସ୍ୱରୂପ ହୋଇଥିବାରୁ ଶିବ ଲିଙ୍ଗରେ ଦହି, ପୁଷ୍ପ ଓ ବେଲପତ୍ର ଅର୍ପଣ କରାଯାଇ ପୂଜାର୍ଚ୍ଚନା କରାଯାଇଥିଲା। ସେହିପରି ବିଳମ୍ବିତ ରାତ୍ରିରେ ଭୋଳାନାଥଙ୍କୁ ବାମଦେବ ସ୍ୱରୂପରେ ପୂଜାକରାଯିବା ସହ ଲିଙ୍ଗରେ ଘୃତ ଘର୍ଷଣ କରାଯିବା ପରେ ଭୋଗରାଗ ହୋଇ ରୁଦ୍ରାଭିଷେକ ହୋଇଥିଲା। ରାତ୍ରର ଶେଷ ପ୍ରହରରେ ଶିବଶଙ୍କରଙ୍କ ଗୁଣାତୀତ ପୂଜାର୍ଚ୍ଚନା କରାଯାଇଥିଲା। ଏହା ପ୍ରଭୁଙ୍କର ଧାତୁ ସ୍ୱରୂପ ହୋଇଥିବାରୁ ମହୁ ଘର୍ଷଣ କରାଯିବା ସହ ପୁଷ୍ପ ଓ ତ୍ରିଶାଖା ବେଲପତ୍ର, ଅର୍ଘ୍ୟ ଆଦି ଅର୍ପଣ କରାଯାଇ ପୂଜାର୍ଚ୍ଚନା ହୋଇଥିଲା। ଶ୍ରଦ୍ଧାଳୁଙ୍କ ସଂକୀର୍ତ୍ତନର ତାଳେ ତାଳେ ଶିବପଞ୍ଚାକ୍ଷର ଓ ଶିବରଞ୍ଜନୀ ଗାନ କରି ମନ୍ଦିର ଶିଖରକୁ ମହାଦୀପ ଉଠିବାପରେ ବ୍ରତ ସମାପନ ହୋଇଥିଲା। କଟକ ସହର ସମେତ ଜିଲ୍ଲାର ବିଭିନ୍ନ ଶୈବ ପୀଠରେ ମଧ୍ୟ ଶିବରାତ୍ରି ମହାଆଡ଼ମ୍ବର ସହକାରରେ ପାଳିତ ହୋଇଥିଲା।
ଏହି ଅବସରରେ ଜଗତପୁରସ୍ଥିତ କୃଷ୍ଣେଶ୍ୱର ମନ୍ଦିରରେ ଶ୍ରଦ୍ଧାଳୁଙ୍କ ପ୍ରବଳ ସମାଗମ ହୋଇଥିଲା। ତେବେ ଶ୍ରଦ୍ଧାଳୁଙ୍କୁ ସୁରକ୍ଷା ପାଇଁ ବିଭିନ୍ନ ପଦକ୍ଷେପ ନିଆଯାଇଥିବାବେଳେ ଗଜାନନ ସେବା ସମିତି ପକ୍ଷରୁ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ଶ୍ରଦ୍ଧାଳୁମାନଙ୍କୁ ପାନୀୟ ଜଳ ବିତରଣ କରାଯାଇଥିଲା। ଏହି କାର୍ଯ୍ୟକ୍ରମକୁ ସଭାପତି ହରିହର ପଣ୍ଡା, ସମ୍ପାଦକ କାହ୍ନୁଚରଣ ପଣ୍ଡା, ସମୀର ସେଠୀ, ରୁଦ୍ରନାରାୟଣ ଦାଶ ପ୍ରମୁଖ ପରିଚାଳନା କରିଥିଲେ।