ମଧ୍ୟାହ୍ନ ପାଚିକା ସହାୟିକା ମାନଙ୍କୁ ସରକାରୀ କର୍ମଚାରୀ ମାନ୍ୟତା ଓ ସର୍ବନିମ୍ନ ମଜୁରୀ ଦାବିରେ ସଭା

#କଟକ(ଏନ.ଏମ୍‌.): ଏଆଇୟୁଟିୟୁସି ସହ ଅନୁବନ୍ଧିତ ବିଦ୍ୟାଳୟ ପାଚିକା ସହାୟିକା ସଂଘ ପକ୍ଷରୁ ସ୍ଥାନୀୟ ଗାନ୍ଧୀଭବନ ଠାରେ ପାଚିକା ସହାୟିକା ମାନଙ୍କ ଏକ ସଭା ଅନୁଷ୍ଠିତ ହୋଇଥିଲା । ପାଚିକାମାନଙ୍କୁ ସରକାରୀ କର୍ମଚାରୀ ମାନ୍ୟତା ଓ ମାସିକ ସର୍ବନିମ୍ନ ୨୬ ହଜାର ଟଙ୍କା ପ୍ରଦାନ କରିବା, ସ୍କୁଲ ପାଚିକା ମାନଙ୍କୁ ତାଙ୍କର ନିର୍ଧାରିତ କାମ ଛଡା ସ୍କୁଲରେ ଅନ୍ୟାନ୍ୟ କରମେ ନିୟୋଜିତ ବନ୍ଦକରିବା,୨୦୦୯ ଡିସେମ୍ବରରୁ ୨୦୧୨ ମାର୍ଚ ପର୍ଯ୍ୟନ୍ତ କାମ କରିଥିବା ସମସ୍ତ ପାଚିକା ସହାୟିକାଙ୍କ ନିର୍ଭୁଲ ତାଲିକା ପ୍ରସ୍ତୁତ କରି ମୃତକଙ୍କ ଉତ୍ତରାଧିକାରୀଙ୍କୁ ଓ ଅବସର ପ୍ରାପ୍ତ ପାଚିକାଙ୍କୁ ଏବଂ ବିଦ୍ୟାଳୟରୁ ବାଦ ପଡିଥିବା ପାଚିକାଙ୍କୁ ୨୮ମାସର ବର୍ଦ୍ଧିତ ବକେୟା ପାରିଶ୍ରମିକ ପ୍ରଦାନ କରିବା, କେନ୍ଦ୍ର ସରକାରଙ୍କ ଘୋଷଣା ଅନୁଯାୟୀ ୨୦୦୯ ଡିସେମ୍ବରରୁ ୨୦୦୭ ଡିସେମ୍ବର ପର୍ଯ୍ୟନ୍ତ ରାଜ୍ୟ ସରକାରଙ୍କର ୪୦% ଭାଗ ବକେୟା ପାରିଶ୍ରମିକ ପ୍ରଦାନ କରିବା, ସ୍କୁଲ ବନ୍ଦ, ମିଶ୍ରଣ ଫଳରେ ବାଦ ପଡିଥିବା ସମସ୍ତ ପାଚିକାଙ୍କୁ ଅନ୍ୟତ୍ର ନିଶ୍ଚିତ ନିଯୁକ୍ତି ଦେବା, ପିଲା ସଂଖ୍ୟା କମ ପାଇଁ ବନ୍ଦ ହୋଇଥିବା ପ୍ରାଥମିକ ବିଦ୍ୟାଳୟକୁ ତୁରନ୍ତ ଖୋଲାଯାଇ ଛଟେଇ ପାଚିକାମାନଙ୍କୁ ନିଯୁକ୍ତି ଦେବା, ପାଚିକା ମାନଙ୍କୁ ୧୦ ମାସ ପରିବର୍ତ୍ତେ ୧୨ ମାସର ପାରିଶ୍ରମିକ ପ୍ରଦାନ କରିବା, ୨୦୨୨ ମଇ ଜୁନ ମାସରେ କାମ କରିଥିବା ସମସ୍ତ ପାଚିକାଙ୍କୁ ପାରିଶ୍ରମିକ ପ୍ରଦାନ କରିବା, ପାଚିକା ସହାୟିକା ନିମନ୍ତେ କେନ୍ଦ୍ର ଓ ରାଜ୍ୟ ସରକାର ବଜେଟରେ ଆବଶ୍ୟକୀୟ ବ୍ୟୟ ବରାଦ କରିବା ଓ ଶ୍ରମିକ ବିରୋଧୀ ଶ୍ରମ କୋଡ୍ ବାତିଲ କରିବା ପ୍ରମୁଖ ଦାବିରେ ଏହି ସଭାରେ ଆନ୍ଦୋଳନ କରାଯିବାର ନିଷ୍ପତ୍ତି ଗ୍ରହଣ କରାଯାଇଛି । ସଂଘର ସଭାପତି ରାଜକିଶୋର ମଲ୍ଲିକ ଏହି ସଭାରେ ସଭାପତିତ୍ୱ କରଥିଲେ । ଏଆଇୟୁଟିୟୁସି ଜିଲ୍ଲା କୋଷାଧ୍ୟକ୍ଷ ଖଗେଶ୍ୱର ସେଠୀ ମୁଖ୍ୟବକ୍ତା ଭାବେ ଆଲୋଚନା କରିଥିଲେ । ଅନ୍ୟମାନଙ୍କ ମଧ୍ୟରେ ସଂଘର ସଂପାଦିକା ସ୍ୱାଧିନୀ ବେହେରା ସଂଗଠିକା ସିପ୍ରା ମହାନ୍ତି ଓ ଲାବଣ୍ୟପ୍ରଭା ଦାସ ପ୍ରମୁଖ ବକ୍ତବ୍ୟ ରଖିଥିଲେ । ଆସନ୍ତା ଅଗଷ୍ଟ ୫ତାରିଖରେ ଶ୍ରମିକ ସଂଗଠନ ଏଆଇୟୁଟିୟୁସି ପ୍ରତିଷ୍ଠାତା ସଭାପତି ଶିବଦାସ ଘୋଷଙ୍କ ଜନ୍ମ ଶତବର୍ଷ ସମାବେଶ ଅନୁଷ୍ଠିତ ହେବାକୁ ଯାଉଛି । ଏହି କାର୍ଯ୍ୟକ୍ରମରେ ସଂଘର ସମସ୍ତ ସଦସ୍ୟ ଓ ଶ୍ରମଜୀବୀ ଜନଗଣ ଯୋଗ ଦେବା ପାଇଁ ସଭାରେ ଗୃହିତ ହୋଇଥିଲା ।