ବେଆଇନ ଲଘୁ ଖଣିଜ କାରବାର ଉପରେ ଜିଲ୍ଲାପ୍ରଶାସନର ଦୃଢ଼ କାର୍ଯ୍ୟାନୁଷ୍ଠାନ

କଟକ(ଏନ୍‌.ଏମ୍‌.): କଟକ ଜିଲ୍ଲାରେ ଏବେ ବେଆଇନ ଲଘୁ ଖଣିଜ କାରବାର ବଢ଼ିବାରେ ଲାଗିଛି। ଜିଲ୍ଲାରେ ଚୋରା ପଥର ସହିତ ବେଆଇନ ବାଲି ଚାଲଣ ମଧ୍ୟ ବୃଦ୍ଧି ପାଉଥିବାବେଳେ ସ୍ଥାନୀୟ ପୁଲିସ ପ୍ରଶାସନ ନିରବଦ୍ରଷ୍ଟା ସାଜିଛି। ଏପରିକି ଏସବୁ କାରବାରରେ ଲିପ୍ତ ଅସାଧୁ ବ୍ୟକ୍ତିମାନଙ୍କ ସହିତ ପୁଲିସ ପ୍ରଶାସନର ମଧୁଚନ୍ଦ୍ରିକା ଚାଲିଛି ବୋଲି ଏବେ ବୁଦ୍ଧିଜୀବୀ ମହଲରେ ଚର୍ଚ୍ଚା। କଟକ ଜିଲ୍ଲାର କମିଶନରେଟ ପୁଲିସ ଓ ଗ୍ରାମାଞ୍ଚଳ ପୁଲିସ ବରିଷ୍ଠ ଅଧିକାରୀଙ୍କ ଜାଣତରେ ଏସବୁ ଚାଲିଛି ବୋଲି ବିଭିନ୍ନ ମହଲରେ ଶୁଣିବାକୁ ମିଳିଛି। ଏପରିକି ପଥରମାଫିଆ, ବାଲିମାଫିଆମାନଙ୍କୁ ସୁରକ୍ଷା ଦେବା ପାଇଁ ପୁଲିସ ମିଥ୍ୟା ମାମଲା କରିବା ସହ ଏସବୁ ଉପରେ ରୋକ ଲଗାଇବାକୁ ଚାହୁଁଥିବା ବ୍ୟକ୍ତିଙ୍କୁ ସାବାଡ଼ କରିବା ପାଇଁ ଆଗେଇ ଆସିଛି ବୋଲି ଆଲୋଚନା ମଧ୍ୟ ହେଉଛି। କଟକ ଜିଲ୍ଲାର ବିଭିନ୍ନ ସ୍ଥାନରେ ବେଆଇନ ଲଘୁଖଣିଜ ଚୋରା ଚାଲଣ ହେଉଥିବାବେଳେ ସ୍ଥାନୀୟ ପୁଲିସ ପ୍ରଶାସନ, ତହସିଲ ଅଧିକାରୀ ତଥା ବିଭାଗୀୟ ଲଘୁଖଣିଜ ବିଭାଗ ଜାଣି ପାରୁନଥିବା ଅତ୍ୟନ୍ତ ଦୁର୍ଭାଗ୍ୟ ଜନକ। କଟକ ଜିଲ୍ଲାରେ ଏବେ ବେଆଇନ ମାଙ୍କଡ଼ାପଥର, ମୋହରମ ଆଦି ଖୋଳାଯାଉଥିବାବେଳେ ସେସବୁ ଅଞ୍ଚଳରେ ଗୋଟିଏ ଗୋଟିଏ କୃତ୍ରିମ ହ୍ରଦ ସୃଷ୍ଟି ହୋଇଛି। ଫଳରେ ଆଗାମୀ ଦିନରେ ପରିବେଶ ସନ୍ତୁଳନରେ ବିଭ୍ରାଟ ସୃଷ୍ଟି ହେବାର ଆଶଙ୍କା ରହିଛି। ଏପରିକି ଏହି ମାଫିଆମାନଙ୍କ ସହ ପୁଲିସ ପ୍ରଶାସନ ଓ ରାଜନେତାମାନେ ହାତ ମିଳାଇ ସେମାନଙ୍କୁ ସୁରକ୍ଷା ଦେଉଥିବା ଅଭିଯୋଗ ଉଠିବା ପରେ ଏବେ ଜିଲ୍ଲାପ୍ରଶାସନ କାର୍ଯ୍ୟାନୁଷ୍ଠାନ ନେବା ଆରମ୍ଭ କରିଛି। ନଦୀରୁ ବେଆଇନ ବାଲି ଚାଲଣ ଚାଲିଥିବାବେଳେ ଏନେଇ ସରକାର ରାଜସ୍ୱ ହରାଉଥିବା ଦେଖିବାକୁ ମିଳିଛି। ସେହିଭଳି ପଥର ଖାଦନଗୁଡ଼ିକୁ ଅନୁମତି ଦିଆଯିବା ପରେ ଉକ୍ତ ଅଞ୍ଚଳ ଭବିଷ୍ୟତରେ କି ବିପର୍ଯ୍ୟୟର ସମ୍ମୁଖୀନ ହେବ ତାହା ଭୂତତ୍ତ୍ୱ ବିତ୍‌ଙ୍କୁ ମଧ୍ୟ ଚିନ୍ତାରେ ପକାଇଛି। ପୁନଶ୍ଚ ଜିଲ୍ଲାରେ ବେଆଇନ ଲଘୁ ଖଣିଜ କାରବାରକୁ ରୋକିବା ନିମନ୍ତେ ଜିଲ୍ଲାପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ନେବା ଆରମ୍ଭ କରିଛି। ସୂଚନା ଅନୁଯାୟୀ, ଆଠଗଡ଼ ତହସିଲ ଅନ୍ତର୍ଗତ ପାଟେଣୀ ଗାଁ ମୌଜାରେ ଜନୈକ ମୁଷ୍ଟିମେୟ ବ୍ୟକ୍ତି ଏକ ପାଚେରୀ ଆଢୁଆଳରେ ବେଆଇନ ବାଲି ବିକ୍ରୀ କରିଚାଲିଥିଲେ। ସ୍ଥାନୀୟ ଲୋକଙ୍କୁ ନାଲି ଆଖି ଦେଖାଇ, ଏହି ବ୍ୟକ୍ତି ଜଣକ ମହାନଦୀରୁ ବେଆଇନ ବାଲି ଉତ୍ତୋଳନ କରିବା ସହ ଚଢ଼ା ଦରରେ ବାହାରେ ବିକ୍ରୀ କରୁଥିଲେ। ଏହାକୁ ବିରୋଧ କରି ସ୍ଥାନୀୟ ଲୋକମାନେ ଜିଲ୍ଲା ପ୍ରଶାସନ ନିକଟରେ ଅଭିଯୋଗ କରିଥିଲେ। ତେବେ ଅଭିଯୋଗ ପାଇବା ପରେ ଏ ସଂକ୍ରାନ୍ତରେ ଜିଲ୍ଲା ଖଣି ଅଧିକାରୀଙ୍କ ତଦନ୍ତ ରିପୋର୍ଟ ଆଧାରରେ ଆଠଗଡ଼ ଉପଜିଲ୍ଲାପାଳ ପ୍ରହଲ୍ଲାଦ ନାରାୟଣ ଶର୍ମା ସରକାରୀ ଜମିରେ ବେଆଇନ ଭାବେ ଗଢ଼ାଯାଇଥିବା ପାଚେରୀକୁ ଭାଙ୍ଗିବା ନିମନ୍ତେ ଆଦେଶ ଜାରି କରିଥିଲେ। ଆଦେଶ ମୁତାବକ ସରକାରୀ କାର୍ଯ୍ୟାନୁଷ୍ଠାନ ସମ୍ମୁଖୀନ ହେବା ପୂର୍ବରୁ ଭୟ ବସତଃ ବ୍ୟକ୍ତି ଜଣକ ନିଜେ ହିଁ ରାତାରାତି ପାଚେରୀକୁ ଭାଙ୍ଗିଦେଇଥିଲେ। ବେଆଇନ ଲଘୁ ଖଣିଜ କାରବାର ଉପରେ ଆଗାମୀ ଦିନରେ ଏହିଭଳି ଭାବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି।