ବକ୍ସଡ୍ରେନ କାର୍ଯ୍ୟ ତ୍ୱରାନ୍ୱିତ ନେଇ ସିଏମସିର ଗୁରୁତ୍ୱପୂର୍ଣ୍ଣ ବୈଠକ: ଡିସେମ୍ବର ୧୦ରେ ଭଙ୍ଗାଯିବ ବକ୍ସିବଜାର, ବଜ୍ରକବାଟି କଲ୍ଭର୍ଟ
#କଟକ(ଏନ୍.ଏମ୍.): କଟକ ସହରରେ ଚାଲୁଥିବା ଜଳ ମଳ ନିଷ୍କସନ ପ୍ରକଳ୍ପ (ଜାଇକା)ର ବକ୍ସ ଡ୍ରେନ୍ କାର୍ଯ୍ୟ ନିର୍ମାଣ ଶେଷ ପାଇଁ ପ୍ରଶାସନ ପକ୍ଷରୁ ଅଧିକ ତତ୍ପରତା ପ୍ରକାଶ ପାଇଛି । ଆଜି ଏ ସମ୍ପର୍କରେ ସିଏମସି ଚୌଧୁରୀବଜାରସ୍ଥିତ ବିଜୁ ଭବନରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା । ସିଏମସି କମିଶନର ନିଖିଲ ପୱନ କଲ୍ୟାଣଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ବକ୍ସ ଡ୍ରେନ୍ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ସକାଶେ ଆଲୋଚନା ହେବା ସହ ବକ୍ସିବଜାର ଓ ବଜ୍ରକବାଟିସ୍ଥିତ ମୁଖ୍ୟ ଡ୍ରେନର କଲ୍ଭର୍ଟକୁ ଡିସେମ୍ବର ୧୦ରେ ଭାଙ୍ଗି ଦିଆଯାଇ ନବ ନିର୍ମିତ ବକ୍ସ ଡ୍ରେନ୍ ସହିତ ମିଶାଇ ଦିଆଯିବ ବୋଲି ନିଷ୍ପତି ଗ୍ରହଣ କରାଯାଇଛି । ଯୁଦ୍ଧକାଳୀନ ଭିତ୍ତିରେ ଜାଇକା ଯନ୍ତ୍ରୀମାନେ ଏହି କାର୍ଯ୍ୟ ଜାନୁଆରୀ ୧୪ ସୁଦ୍ଧା ଶେଷ କରିବେ । ଜନସାଧାରଣଙ୍କ ଗମନା ଗମନ ସୁବିଧା ପାଇଁ ଉଭୟ ସ୍ଥାନରେ ଅସ୍ଥାୟୀ ପାଦଚଲା ପୋଲ ନିର୍ମାଣ କରାଯିବ । ଏହି ୟୁଟିଲିଟି ସିଫ୍ଟିଙ୍ଗ୍ କାର୍ଯ୍ୟ ଧାର୍ଯ୍ୟ ସମୟ ମଧ୍ୟରେ ଶେଷ କରାଯିବ ବୋଲି ୱାଟକୋ ଜିଏମ (ଡ୍ରେନେଜ୍) ଅଚ୍ୟୁତ ବିଜୟ ନନ୍ଦ ସୂଚନା ଦେଇଛନ୍ତି । ଏହି ୟୁଟିଲିଟି ସିଫ୍ଟିଙ୍ଗ୍ କାର୍ଯ୍ୟ ତ୍ୱରାନ୍ୱିତ କରିବା ସକାଶେ ବିଭିନ୍ନ ବିଭାଗୀୟ ଅଧିକାରୀଙ୍କ ସହାୟତା ଲୋଡାଯାଇଛି । ୱାଟ୍କୋ, ବିଏସଏନଏଲ, ଟ୍ରାଫିକ, ସିଏମସି, ଟିପିସିଓଡିଏଲ ଅଧିକାରୀମାନେ ଉପରୋକ୍ତ ଦୁଇଟି କଲ୍ଭର୍ଟଅଞ୍ଚଳ ପରିଦର୍ଶନ କରି ଉକ୍ତ ସ୍ଥାନର ସ୍ଥିତି ଓ କାର୍ଯ୍ୟର ଅଗ୍ରଗତି ସମ୍ପର୍କରେ ଏକ ରିପୋର୍ଟ ପ୍ରସ୍ତୁତ କରି ବକ୍ସ ଡ୍ରେନ ଦାୟିତ୍ୱରେ ଥିବା ମୁଖ୍ୟ ସିଏମସି କମିଶନର ଶ୍ରୀ କଲ୍ୟାଣଙ୍କ ନିକଟରେ ଆସନ୍ତା ଶୁକ୍ରବାରରେ ଦାଖଲ କରିବେ । ଗୃହ ଓ ନଗର ଉନ୍ନୟନ ସଚିବ ଜି. ମାଥିଭାଥାନାନ ନଭେମ୍ବର ୧୦ରେ କଟକରେ ପହଞ୍ଚି ବକ୍ସିବଜାର, ଗହ୍ମାଡିଆ, ଫ୍ରେଣ୍ଡସକଲୋନୀ ଓ ପ୍ରଫେସରପଡା ଅଞ୍ଚଳ ପରିଦର୍ଶନ କରି ଜାରି ରହିଥିବା ୨,୫୯୦ ମିଟରର ବକ୍ସ ଡ୍ରେନ ନିର୍ମାଣ କାର୍ଯ୍ୟର ସମୀକ୍ଷା କରିବା ସହ ଫେବୃଆରୀ ସୁଦ୍ଧା କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦେଇଥିଲେ । ଆଜି ଏହି ବୈଠକରେ ସିଏମସି କମିଶନର ଶ୍ରୀ କଲ୍ୟାଣଙ୍କ ସମେତ ପିଡବ୍ଲ୍ୟୁଡି ଅଧୀକ୍ଷଣ ଯନ୍ତ୍ରୀ ପ୍ରଭାସ ମାଝି, ୱାଟକୋର ଜିଏମ ଦେବବ୍ରତ ମହାନ୍ତି, ୱାଟକୋ ଜିଏମ(ଡ୍ରେନେଜ) ଅଚ୍ୟୁତ ବିଜୟ ନନ୍ଦ, ସିଏମସି ସିଟି ଇଂଜିନିୟର ଅତନୁ ସାମନ୍ତ, ସିଏମସି ନିର୍ବାହୀ ଯନ୍ତ୍ରୀ ଦିବ୍ୟରଞ୍ଜନ ତ୍ରିପାଠୀ, ଅତିରିକ୍ତ ଡିସିପି ଅନୀଲ ମିଶ୍ର, ଟ୍ରାଫିକ ଏସିପି ସୁଶାନ୍ତ କୁମାର ସିଂହଙ୍କ ସମେତ ବିଏସଏନଏଲ ଓ ଜିଓର ଅଧିକାରୀ ଏବଂ ସହରର କେବୁଲ ଅପରେଟରମାନେ ଯୋଗ ଦେଇଥିଲେ ।