ଫକିରମୋହନ ବିଶ୍ୱବିଦ୍ୟାଳୟ ଏବଂ ନନ୍ଦି ଫାଉଣ୍ଡେସନ ମଧ୍ୟରେ ଏମଓୟୁ ସ୍ୱାକ୍ଷର

ବାଲେଶ୍ୱର(ଏନ୍‌.ଏମ୍‌.): ନ୍ୟାକ ତରଫରୁ “ଏ’ ଗ୍ରେଡର ମାନ୍ୟତା ପାଇବା ପରେ ନୂଆପାଢୀ ସ୍ଥିତ ଫକୀରମୋହନ ବିଶ୍ୱବିଦ୍ୟାଳୟର ପିଜି କେନ୍ଦ୍ରୀୟ କାର୍ଯ୍ୟାଳୟ ସମ୍ମିଳନୀ କକ୍ଷ ଠାରେ ବିଶ୍ୱବିଦ୍ୟାଳୟ ସହ ନନ୍ଦି ଫାଉଣ୍ଡେସନ ଏକ ବୁଝାମଣାପତ୍ର ସ୍ୱାକ୍ଷର ସମାରୋହ ବୈଠକ ଅନୁଷ୍ଠିତ ହୋଇଯାଇଛି । କାର୍ଯ୍ୟକ୍ରମର ସଞ୍ଚାଳକ, ଛାତ୍ର କଲ୍ୟାଣ ନିର୍ଦ୍ଦେଶକ ଡକ୍ଟର ନିହାର ରଞ୍ଜନ ରାଉତ ଏହି କାର୍ଯ୍ୟକ୍ରମ ସମ୍ପର୍କିତ ସୂଚନା ଏବଂ ଅତିଥିମାନଙ୍କ ପରିଚୟ ପ୍ରଦାନ କରିବା ସହ ସମସ୍ତଙ୍କୁ ସ୍ୱାଗତ କରିଥିଲେ । ପିଜି କାଉନସିଲର ଅଧ୍ୟକ୍ଷ ପ୍ରଫେସର ସବ୍ୟସାଚୀ ପଟ୍ଟନାୟକ ବୈଠକକୁ ସମ୍ବୋଧନ କରି ଛାତ୍ରଛାତ୍ରୀମାନଙ୍କ ବ୍ୟକ୍ତିତ୍ୱ ଓ ପ୍ରତିଭାର ବିକାଶକୁ ପ୍ରଧାନ୍ୟ ଦେଇ ‘ମହିନ୍ଦ୍ରା ପ୍ରାଇଡ୍ କ୍ଲାସ’ ନାମକ ସ୍ୱଳ୍ପ ମିଆଦି ତାଲିମ ଶ୍ରେଣୀ ନନ୍ଦି ଫାଉଣ୍ଡେସନ ସହଯୋଗରେ ଆରମ୍ଭ କରାଯାଇଥିବା ନେଇ କହିଥିଲେ । ବିଶ୍ୱବିଦ୍ୟାଳୟର କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ କାର୍ଯ୍ୟକ୍ରମର ଶୁଭାରମ୍ଭ ହୋଇଥବା ବେଳେ “ସମ୍ପ୍ରତି ଚାକିରି ଏବଂ ସୃଜନଶୀଳତା ଜଗତ ଜ୍ଞାନ ସହ ବ୍ୟକ୍ତିତ୍ୱ ବିକାଶ ଏବଂ ଯୋଗାଯୋଗ ଦକ୍ଷତା ପ୍ରତିପାଦନ କରିବାର ଆବଶ୍ୟକତା ବିଶେଷ ଜରୁରୀ ହୋଇଯାଇଛି’ ବୋଲି ନିଜ ଅଭିଭାଷଣରେ କହିଥିଲେ । ଏହି କାର୍ଯ୍ୟକ୍ରମଟିର ଉଦ୍ଦେଶ୍ୟକୁ ସଫଳ ରୂପାୟନ କରିବାକୁ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ । ନନ୍ଦି ଫାଉଣ୍ଡେସନର ରାଜ୍ୟ ସଂଯୋଜକ ମୁନମୁନ ସିଂ ଏହି କାର୍ଯ୍ୟକ୍ରମର ମୂଳ ଲକ୍ଷ୍ୟ ଛାତ୍ରଛାତ୍ରୀଙ୍କ ଚାକିରି ଭିତ୍ତିକ ପ୍ରସ୍ତୁତି ଓ ସାମୁହିକ ବିକାଶରେ ସହାୟକ ହେବ ବୋଲି ଉଲ୍ଲେଖ କରିଥିଲେ । ସେ ନନ୍ଦି ଫାଉଣ୍ଡେସନ୍ ଏବଂ ମହିନ୍ଦ୍ରା ପ୍ରାଇଡ୍ କ୍ଲାସ ବିଷୟରେ ଏକ ଭିଡିଓ ଉପସ୍ଥାପନା କରିଥିଲେ । ଏଥିସହ ନନ୍ଦି ଫାଉଣ୍ଡେସନର କର୍ମକର୍ତ୍ତା ତାରାକ ନାଥ ଭୁନିଆ ଓ ଅଧ୍ୟାପକ ପ୍ରଶିକ୍ଷକ ସଞ୍ଜୟ ମିଶ୍ର, ଅଂଶୁମାନ ମିଶ୍ର ଏହି ତାଲିମ କାର୍ଯ୍ୟକ୍ରମର ଏକ ସଂକ୍ଷିପ୍ତ ବିବରଣୀ ଦେବା ସହ ଏହି ତାଲିମ ପରେ ଛାତ୍ରଛାତ୍ରୀ ନିଜନିଜ ଦକ୍ଷତା ଏବଂ ସାମର୍ଥ୍ୟକୁ ଆହୁରି ପ୍ରଭାବ ଯୁକ୍ତ କରିବାରେ ସକ୍ଷମ ହୋଇପାରିବେ ବୋଲି ଆଶାବ୍ୟକ୍ତ କରିଥିଲେ । କାର୍ଯ୍ୟକ୍ରମରେ ବିଶ୍ୱବିଦ୍ୟାଳୟର ସି.ଓ.ଏଫ ମାନସ କୁମାର ପାତ୍ରଙ୍କ ସମେତ ଶିକ୍ଷକ, ଅଣଶିକ୍ଷକ କର୍ମଚାରୀ ଓ ବହୁସଂଖ୍ୟାରେ ଛାତ୍ରଛାତ୍ରୀ ମାନେ ଉପସ୍ଥିତ ରହିଥିଲେ । ବିଶ୍ୱବିଦ୍ୟାଳୟର ଜନସମ୍ପର୍କ ଅଧିକାରୀ ଶର୍ମିଷ୍ଠା ମହାରଣା ଧନ୍ୟବାଦ ଅର୍ପଣ କରିଥିଲେ ।