ପ୍ରାର୍ଥୀତ୍ୱ ଘୋଷଣା ପରେ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କଲେ ଧର୍ମେନ୍ଦ୍ର ଓ ସମ୍ବିତ

#ପୁରୀ(ଏନ୍‌.ଏମ୍‌.): ଆସନ୍ତା ସାଧାରଣ ନିର୍ବାଚନ ଯେତିକି ପାଖେଇ ପାଖେଇ ଆସୁଛି ନେତାମାନଙ୍କ ଜନସାଧାରଣଙ୍କ ହୃଦୟ ଜିତିବା ପାଇଁ ଉଦ୍ୟମ ସେତିକି ସେତିକି ବଢ଼ିବାରେ ଲାଗିଛି । କେବଳ ଜନସାଧାରଣଙ୍କ ହୃଦୟ ଜିତିବା ନୁହେଁ ବିଭିନ୍ନ ଦେବଦେବୀଙ୍କ ଆର୍ଶିବାଦ ନେବାକୁ ମଧ୍ୟ ଲମ୍ବା ଲାଇନ ଲାଗିଛି । କିଏ ମନ୍ଦିରରେ ପହଞ୍ଚି ଉନ୍ନତିକରଣ ପାଇଁ ପ୍ରତିଶ୍ରୁତି ଦେଉଛି ତ ଆଉ କିଏ ଦେବଦେବୀଙ୍କ ଦର୍ଶନ କରି ନିଜର ବିଜୟ ପାଇଁ କାମନା କରୁଥିବା ଦେଖିବାକୁ ମିଳିଛି । ତେବେ ଆଜି ପୁରୀରେ ମଧ୍ୟ ହେଭିୱେଟ ଦଳୀୟ ପ୍ରାର୍ଥୀଙ୍କୁ ଶ୍ରୀମନ୍ଦିରରେ ପହଞ୍ଚି ପ୍ରଭୁ ଜଗତନାଥଙ୍କ ଆର୍ଶିବାଦ କାମନା କରିଛନ୍ତି । ଲୋକସଭା ନିର୍ବାଚନ ପ୍ରାର୍ଥୀ ଘୋଷଣା ହେବା ପରେ ଆଜି ସକାଳେ ଶ୍ରୀମନ୍ଦିର ଯାଇ ମହାପ୍ରଭୁଙ୍କୁ ସପରିବାର ଦର୍ଶନ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେହିଭଳି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ମଧ୍ୟ ମହାପ୍ରଭୁଙ୍କୁ ଦର୍ଶନ କରିଛନ୍ତି । ଦୁଇ ନେତା ସକାଳୁ ସକାଳୁ ଶ୍ରୀମନ୍ଦିର ଯାଇ ଶ୍ରୀଜିଉଙ୍କୁ ଦର୍ଶନ କରିଛନ୍ତି । ଶ୍ରୀଜିଉଙ୍କ ଦର୍ଶନ କରିବା ପରେ ଧର୍ମେନ୍ଦ୍ର ପ୍ରଧାନ କହିଛନ୍ତି, ମୋର ପରମ ସୌଭାଗ୍ୟ, ଆଜି ଦୋଳ ପୂର୍ଣ୍ଣିମାରେ ମହାପ୍ରଭୁଙ୍କ ଦର୍ଶନ ପାଇଲି । ଲୋକସଭା ଓ ବିଧାନସଭା ନିର୍ବାଚନ ପାଇଁ ବିଗୁଲ ବାଜି ସାରିଛି । ମୋଦିଙ୍କ ଦୃଷ୍ଟି, ସଂକଳ୍ପ ଓ ଯୋଜନାକୁ ନେଇ ଆଗକୁ ବଢିବୁ । ଆଗାମୀ ୨୫ ବର୍ଷର ସ୍ୱପ୍ନକୁ ନେଇ ଘରକୁ ଘର ବୁଲିବୁ । ଓଡ଼ିଶାରେ ଏଥର ପରିବର୍ତ୍ତନ ନିଶ୍ଚିତ ହେବ । ମହାପ୍ରଭୁ ବି ନବକଳେବର ହୋଇ ପରିବର୍ତ୍ତନ ସ୍ୱୀକାର କରନ୍ତି । ଗୁଣ୍ଡୁଚି ମୂଷା ଭଳି ସମ୍ବଲପୁର ବିକାଶ ପାଇଁ କାମ କରିବି । ଏଥର ଡବଲ ଇଞ୍ଜିନ ସରକାର ହେବ । ଏଥର ସମ୍ବଲପୁରବାସୀ ତାଙ୍କୁ ଆଶୀର୍ବାଦ କରିବେ ବୋଲି ଶ୍ରୀ ପ୍ରଧାନ ଆଶା କରିଛନ୍ତି । ସେହିଭଳି ସମ୍ବିତ ପାତ୍ର କହିଛନ୍ତି, ଗତ ଥର ଅଳ୍ପ ବ୍ୟବଧାନରେ ରହିଯାଇଥିଲା । ମହାପ୍ରଭୁ କହିଥିଲେ, ଅଧିକ ତପସ୍ୟା କରିବାକୁ ପଡ଼ିବ । ତାଙ୍କର ଆଜ୍ଞା ପାଳନ କରି ମୁଁ ୫ ବର୍ଷ ଲୋକଙ୍କ ସହିତ ରହିଛି । ଜନ ପ୍ରତିନିଧି ପାଇଁ ଏହା ହିଁ ତପସ୍ୟା । ଏବେ ମହାପ୍ରଭୁ ଯାହା ଦେବେ, ତାକୁ ସ୍ୱୀକାର କରିବି ।