ପଶ୍ଚିମବଙ୍ଗ ବାଣ ବିସ୍ଫୋରଣର ମୁଖ୍ୟଅଭିଯୁକ୍ତ କଟକରୁ ଗିରଫ: ଘରୋଇ ନର୍ସିଂହୋମରେ ହେଉଥିଲା ଚିକିତ୍ସା
#କଟକ (ଏନ୍.ଏମ୍.): ପଶ୍ଚିମବଙ୍ଗ ବାଣ ବିସ୍ଫୋରଣର ମୁଖ୍ୟ ଅଭିଯୁକ୍ତ କଟକ ସହରରୁ ଗିରଫ ହୋଇଛି । ଏକ ଘରୋଇ ନର୍ସିଂହୋମରେ ଚିକିତ୍ସିତ ହେଉଥିବା ବେଳେ ସେ ଧରାପଡ଼ିଛି । କମିଶନରେଟ୍ ପୁଲିସ୍ ସହାୟତାରେ ପଶ୍ଚିମବଙ୍ଗ ପୁଲିସ୍ ଚଢ଼ଉ କରି ମୁଖ୍ୟଅଭିଯୁକ୍ତ ଓ ତା’ର ଦୁଇ ସହଯୋଗୀଙ୍କୁ ଗିରଫ କରିଥିବା ଜଣାପଡ଼ିଛି । ଓଡ଼ିଶା ସୀମା ପଶ୍ଚିମବଙ୍ଗ ରାଜ୍ୟର ପୂର୍ବ ମେଦିନପୁର ଅଞ୍ଚଳରେ ଭାନୁ ବାଗ୍ ଓ ତାଙ୍କ ପୁଅ ବେଆଇନ୍ ବାଣ ଫ୍ୟାକ୍ଟ୍ରି ଚଲାଇଥିଲେ । ସେହି ଫ୍ୟାକ୍ଟ୍ରିରେ ଏକ ବଡ଼ ଧରଣର ବିସ୍ଫୋରଣ ହୋଇଥିଲା । ଫଳରେ ୯ ଜଣଙ୍କ ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଥିଲେ । ବିସ୍ଫୋରଣରେ ଭାନୁ ବାଗ ନିଜେ ମଧ୍ୟ ଗୁରୁତର ଆହତ ହୋଇଥିଲେ । ସେଠାରେ ଚିକିତ୍ସା ହେଲେ ଧରା ପଡ଼ିଯିବେ, ସେହି ଭୟରେ ସେ ନିଜର ପୁଅ ଓ ଜଣେ ସମ୍ପର୍କୀୟଙ୍କ ସହ କଟକ ପଳାଇ ଆସି ଏଠାରେ ଏକ ଘରୋଇ ନର୍ସିଂହୋମରେ ଚିକିତ୍ସିତ ହେଉଥିଲେ । ଫଳରେ ବାଣ ବିସ୍ଫୋରଣ ଘଟଣାର ତନାଘନା କରିବା ବେଳେ ପଶ୍ଚିମବଙ୍ଗ ପୁଲିସ୍ ଫ୍ୟାକ୍ଟ୍ରି ମାଲିକ୍ଙ୍କ ପତ୍ତା ପାଇନଥିଲା । ସେ ଓଡ଼ିଶାର କଟକରେ ଆତ୍ମଗୋପନ କରିଥିବା ପୁଲିସ୍ ସନ୍ଦେହ କରିଥିଲା । ତେଣୁ ପଶ୍ଚିମବଙ୍ଗ ପୁଲିସ୍ କଟକ କମିଶନରେଟ୍ ପୁଲିସର ସହାୟତା ଲୋଡ଼ିଥିଲା । ଏହା ପରେ ତତ୍ପର ହୋଇଥିଲା କଟକ କମିଶନରେଟ୍ ପୁଲିସ୍ । କଟକରେ ଆତ୍ମଗୋପନ କରିଥିବା ଭାନୁ, ତା’ ପୁଅ ଓ ସମ୍ପର୍କୀୟଙ୍କ ଧରିବା ପାଇଁ ଉଦ୍ୟମ ଆରମ୍ଭ କରିଥିଲା । ଆଜି ପଶ୍ଚିମବଙ୍ଗ ଓ କମିଶନରେଟ୍ ପୁଲିସ୍ ମିଳିତ ଭାବେ ଏକ ଘରୋଇ ନର୍ସିଂହୋମରେ ଚଢ଼ାଉ କରି ଚିକିତ୍ସାଧୀନ ଅବସ୍ଥାରେ ଥିବା ଭାନୁକୁ ଧରିଥିଲା । ଏଥିସହ ତା’ର ପୁଅ ଓ ସମ୍ପର୍କୀୟଙ୍କୁ ଧରିଥିଲା । ତେବେ ବାଣ ବିସ୍ଫୋରଣରେ ଭାନୁ ଗୁରୁତର ହୋଇ ଚିକିତ୍ସିତ ହୋଇଥିବାରୁ ତାଙ୍କୁ ପଶ୍ଚିମବଙ୍ଗ ପୁଲିସ୍ ନେଇ ପାରିନଥିଲା । ବର୍ତ୍ତମାନ ସେଠାରେ ତାଙ୍କର ଚିକିତ୍ସା ଚାଲିଛି । ତେବେ ଗିରଫ ଅନ୍ୟ ଦୁଇ ଜଣଙ୍କ ଭିତରୁ ଜଣଙ୍କୁ ପୁଲିସ୍ ପଶ୍ଚିମବଙ୍ଗରେ ସ୍ଥାନୀୟ ମାଜିଷ୍ଟ୍ରେଟ୍ଙ୍କ ସାମ୍ନାରେ ହାଜର କରାଯାଇଛି । ଅନ୍ୟ ଜଣଙ୍କୁ ଗିରଫ କରି ପଶ୍ଚିମବଙ୍ଗ ପୁଲିସ ଓଡ଼ିଶା ପୁଲିସ୍ ହେବାଜତରେ ଛାଡ଼ିଥିବା ସୂଚନା ଦେଇଛନ୍ତି କଟକ ଡିସିପି ପିନାକ ମିଶ୍ର । ଡିସିପିଙ୍କ କହିବା ଅନୁସାରେ କୌଣସି ସମ୍ୱେଦନଶୀଳ ମାମଲାରେ ସମ୍ପୃକ୍ତ ଥିବା ବ୍ୟକ୍ତି ଚିକିତ୍ସା ହେବା ପାଇଁ ଆସିଲେ, ମେଡ଼ିକାଲ୍ କର୍ତ୍ତୃପକ୍ଷ ପୁଲିସକୁ ଖବର ଦେବା କଥା । କିନ୍ତୁ ଏ କ୍ଷେତ୍ରରେ ସେମିତି କିଛି ହୋଇନାହିଁ । ସମ୍ପୃକ୍ତ ବ୍ୟକ୍ତି ଚିକିତ୍ସିତ ହେଉଥିଲେ ମଧ୍ୟ ଆମ ପାଖରେ କୌଣସି ଖବର ନଥିଲା । ଏହା ଉପରେ ତଦନ୍ତ କରାଯିବ ବୋଲି ଡିସିପି ଶ୍ରୀ ମିଶ୍ର କହିଛନ୍ତି ।