ନିଶାଦ୍ରବ୍ୟ ସେବନର ଆଡ୍ଡାସ୍ଥଳୀ ପାଲଟିଛି ନୂଆପାଟଣା କଲେଜ
#ଆଠଗଡ଼(ଏନ୍.ଏମ୍.): ନିଶାଦ୍ରବ୍ୟ ସେବନର ଆଡ୍ଡାସ୍ଥଳୀ ପାଲଟିଛି ନୂଆପାଟଣା କଲେଜ । ସନ୍ଧ୍ୟା ହେଲେ କଲେଜ ଭିତରେ ଚାଲୁଛି ନିଶାଦ୍ରବ୍ୟ ସେବନ । କିଛି ଅସାମାଜିକ ବ୍ୟକ୍ତିମାନେ କଲେଜ ଭିତରେ ନିଶାଦ୍ରବ୍ୟ କରୁଥିବା ନଜରକୁ ଆସିଛି । କଲେଜରେ ଆବଶ୍ୟକୀୟ ପାଚେରୀ ନଥିବାରୁ ଏଭଳି ବେଆଇନ କାର୍ଯ୍ୟ ନିମନ୍ତେ ନିଶାଡ଼ିମାନେ ଅବାଧରେ ମହାବିଦ୍ୟାଳୟରେ ପ୍ରବେଶ କରୁଥିବା ଅଭିଯୋଗ ହୋଇଛି । ଯେଉଁଠି ଦିନରେ ଶହ ଶହ ଛାତ୍ରଛାତ୍ରୀଙ୍କ ଚରିତ୍ର ଗଠନ କରୁଥିବା ଏହି ଶିକ୍ଷାନୁଷ୍ଠାନଟି ରାତିରେ ପାଲଟିଯାଉଛି ଅସାମାଜିକଙ୍କ ଭୂସ୍ୱର୍ଗ । ଏ ନେଇ ନା ପ୍ରଶାସନ ନା ବିଭାଗୀୟ କର୍ତ୍ତୃପକ୍ଷ ଆଖିବୁଜିଦେଇଥିବା ଭଳି ସଂଗୀନ ଅଭିଯୋଗ ଉଠିଛି । ଅନ୍ୟପକ୍ଷରେ ତିଗିରିଆ ନୂଆପାଟଣା ମହାବିଦ୍ୟାଳୟରେ ଅନେକ ସମସ୍ୟା ରହିଛି । ଏଠାରେ ନା ଅଛି ପାଚେରୀ ନା ଅଛି ସାଇକେଲ୍ ଷ୍ଟାଣ୍ଡ । ଅସୁବିଧା ସମ୍ପର୍କରେ ମହାବିଦ୍ୟାଳୟ କର୍ତ୍ତୃପକ୍ଷ ଉପରିସ୍ଥ ବାବୁଙ୍କ ଦୃଷ୍ଟି ଆକର୍ଷଣ କରିବା ସହ ଛାତ୍ରଛାତ୍ରୀ ମାନଙ୍କ ଠାରୁ ତାଙ୍କର ଅସୁବିଧା ସମ୍ପର୍କରେ ମତାମତ ନେଇ ସମାଧାନ କରିବାକୁ ଛାତ୍ରଛାତ୍ରୀମାନେ ଦାବି କରିଛନ୍ତି । ପୁନଶ୍ଚ ଏହି ମହାବିଦ୍ୟାଳୟ ପରିଚାଳନା ନିମନ୍ତେ ଯେଉଁ କମିଟି ଗଠନ ହୋଇଛି ତାହାର କଲେଜ ପ୍ରତି ରହିଥିବା ଦାୟିତ୍ୱକୁ ନେଇ ଅଞ୍ଚଳବାସୀ ଅଙ୍ଗୁଳି ନିର୍ଦ୍ଦେଶ କରିଛନ୍ତି । ଏହି ଶିକ୍ଷାନୁଷ୍ଠାନର ବିକାଶ କ୍ଷେତ୍ର କମିଟି କ’ଣ କରୁଛି ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ । ବର୍ଷସାରା ବର୍ଷ ଖରା, ବର୍ଷା ଓ ଶୀତରେ ପଦାରେ ପଡୁଛି ଛାତ୍ରଛାତ୍ରୀଙ୍କ ଗାଡି ଓ ସାଇକେଲ୍ । ମହାବିଦ୍ୟାଳୟ ପରିସରକୁ ଗାଈଗୋରୁଙ୍କ ସହିତ ନିଶାଡ଼ିମାନଙ୍କ ଅବାଧ ପ୍ରବେଶରୁ ସୁରକ୍ଷା ପାଇଁ ତ୍ୱରିତ ବ୍ୟବସ୍ଥା ଗ୍ରହଣ କରିବା ନିମନ୍ତେ ଅଞ୍ଚଳବାସୀଙ୍କ ପକ୍ଷରୁ ଦାବି ହୋଇଛି ।