ନାର୍ଯ୍ୟ ଦାବିପୂରଣରେ ବୈମାତୃକ ମନୋଭାବ ପ୍ରତିବାଦରେ ବିଦ୍ୟୁତ ଇଞ୍ଜିନିୟରଙ୍କ ମହମବତୀ ଶୋଭାଯାତ୍ରା: ୧୫ରୁ ରିଲେ ଅନଶନ ପାଇଁ ଚେତାବନୀ

#ଭୁବନେଶ୍ୱର(ଏନ୍‌.ଏମ୍‌.): ବର୍ଷ ବର୍ଷ ଧରି ଅବହେଳା ଓ ଉପେକ୍ଷାର ଶିକାର ହୋଇ ଆସୁଥିବା ବିଦ୍ୟୁତ୍ ଇଞ୍ଜିନିୟର ଓ ଅଫିସରଙ୍କ ଆନ୍ଦୋଳନ ଏବେ ତୀବ୍ର ରୂପ ନେଇଛି । ଦୁଇ ସପ୍ତାହ ଧରି ଐତିହାସିକ ଅବିଚାର ବିରୁଦ୍ଧରେ ରାଜ୍ୟର ସମସ୍ତ ବିଦ୍ୟୁତ୍ ଉତ୍ପାଦନ କେନ୍ଦ୍ର, ଗ୍ରିଡ ସବଷ୍ଟେସନ, ରାଜ୍ୟ ବିଦ୍ୟୁତ୍ ଭାଗ କେନ୍ଦ୍ର ଓ ସମସ୍ତ ଅଫିସ ସମ୍ମୁଖରେ ସନ୍ଧ୍ୟାରେ ପ୍ରତିବାଦ ଜାରି ରହିଛି । ତଥାପି ବିଭାଗୀୟ କର୍ତ୍ତୃପକ୍ଷ, ସରକାରଙ୍କ ଉଦାସିନତା ପ୍ରତିବାଦରେ ଓପିଟିସିଏଲ, ଓପିଜିସ, ଓଏଚପିସି ଓ ଚାରିଟି ବିଦ୍ୟୁତ୍ ବଣ୍ଟନ ନିଗମର ଇଞ୍ଜିନିୟର ଓ ଅଫିସରମାନେ ମହମବତୀ ଧରି ରାଜ୍ୟ ବ୍ୟାପି ଶୋଭା ଯାତ୍ରା ଅନୁଷ୍ଠିତ ହୋଇଥିଲା । ଜରୁରୀ କାଳୀନ ଓ ବିପଦ ସଙ୍କୁଳ କାର୍ଯ୍ୟ ପାଇଁ, ଭାରତ ବର୍ଷର ଅନ୍ୟ ରାଜ୍ୟରେ ମିଳୁଥିବା ଉଚ୍ଚ ବେତନ, ସମୟ ଭିତ୍ତିକ ପଦୋନ୍ନତିରୁ ସେମାନଙ୍କୁ ବଞ୍ଚିତ କରାଯାଇଛି । ଅନ୍ୟର ରାଜ୍ୟ ଓ କେନ୍ଦ୍ରୀୟ ନିଗମର ଦ୍ୱାହି ଦେଇ, ନିର୍ଦ୍ଦେଶକମାନେ ଉଚ୍ଚ ବେତନ ନେଉଛନ୍ତି କିନ୍ତୁ ଇଞ୍ଜିନିୟର ଓ ଅଫିସରମାନଙ୍କୁ ସମାନ ସୁବିଧାରୁ ବଞ୍ଚିତ କରୁଛନ୍ତି । ରାଜ୍ୟ ସରକାର ଇଞ୍ଜିନିୟର ଓ ଅଫିସର ମାନଙ୍କ ମୂଳ ପଦବୀ ହିତୀୟ ଶ୍ରେଣୀରୁ ପ୍ରଥମ ଶ୍ରେଣୀକୁ ୨୦୧୩ ରୁ ଉନ୍ନୀତ କରିଥିଲେ ମଧ୍ୟ ବିଦ୍ୟୁତ୍ ନିଗମ ଗୁଡିକରେ ଅଦ୍ୟାବଧି ଲାଗୁ କରାଯାଇ ନାହିଁ । ରାଜ୍ୟ ସରକାର ଦୃତ ପଦୋନ୍ନତି ପାଇଁ ୨୦୨୧ରୁ କ୍ୟାଡ଼ର ରିଷ୍ଟ୍ରକଚରିଂ କରିସାରି ଥିଲେ ମଧ୍ୟ, ବିଦ୍ୟୁତ୍ ନିଗମଗୁଡିକରେ ତାହା ଅଦ୍ୟାବଧି କରା ଯାଉନାହିଁ । ଚାକିରୀରେ ଥାଇ ମୃତ୍ୟୁ ବରଣ କଲେ, ଚାକିରୀ ପରିବର୍ତ୍ତେ ମାତ୍ର ୧୦ଲକ୍ଷ ଟଙ୍କା ଧରାଇ ଦେଇ ବିଦ୍ୟୁତ ନିଗମ କର୍ତ୍ତୃପକ୍ଷ ଚୁପ ହୋଇ ବସିପଡ଼ିବା ଦୁର୍ଭାଗ୍ୟ ଜନକ । ଏପରିକି ଇଞ୍ଜିନିୟରଙ୍କୁ ମ୍ୟାନେଜର ପରିବର୍ତ୍ତେ ଇଞ୍ଜିନିୟର ନାମକରଣ କରାଯିବା ଦାବିକୁ ମଧ୍ୟ ଉପେକ୍ଷା କରା ଯାଉଛି । ଘରୋଇ ପରିଚାଳନାରୁ ମୁକ୍ତ ହେବାର ବର୍ଷ କେଇଟା ନହେଉଣୁ, ଲାଭରେ ଚାଲି ଥିବା ଓପିଜିସିକୁ ପୁଣି ଥରେ ଘରୋଇ କରଣ କରା ଯାଉଛି । ଜାତୀୟସ୍ତରରେ କ୍ରମାଗତ ଭାବେ ଉତ୍କର୍ଷତା ପୁରସ୍କାର ପାଉଥିବା ଓପିଟିସିଏଲକୁ ଟିବିସିବି ଓ ଆସେଟ ମନିଟାଇଜେସନ ଆଳରେ ଘରୋଇ ମାଲିକାନାକୁ ଦେଇ ଦେବାର ମସୁଧା ମଧ୍ୟ ଚାଲିଛି । ଭାରତ ବର୍ଷର କୌଣସି ରାଜ୍ୟ ବିଦ୍ୟୁତ କ୍ଷେତ୍ରକୁ ଘରୋଇ କରଣ କରିନଥିବାବେଳେ, ଓଡ଼ିଶା ବିଦ୍ୟୁତ୍ କ୍ଷେତ୍ରରେ ବିଭିନ୍ନ ପରୀକ୍ଷା ନିରୀକ୍ଷା ଚାଲୁ ରହିଛି । ଟାଟା ବିଦ୍ୟୁତ୍ ବଣ୍ଟନ କ୍ଷେତ୍ରକୁ ଅଧ୍ୟଗ୍ରହଣ କଲା ପରେ, ଇଞ୍ଜିନିୟର ଓ ଅଫିସରଙ୍କ ଦୁର୍ଦ୍ଦଶା ବଢ଼ି ଯାଇଛି । ସମସ୍ତ ପଦବୀ କ୍ୟାଡ଼ର ବାହାରେ ସୃଷ୍ଟି କରି ମୂଳ ଇଞ୍ଜିନିୟର ଓ ଅଫିସରଙ୍କୁ ପଦୋନ୍ନତିରୁ ବଞ୍ଚିତ କରା ଯାଉଛି । ମୂଳ କ୍ୟାଡ଼ର ଏବେ ଅସ୍ଥିତ୍ୱ ହରାଇ ବାକୁ ଯାଉଛି । କ୍ରମାଗତ ଭାବେ ନିଗମ କର୍ତ୍ତୃପକ୍ଷ ଓ ସରକାରଙ୍କ ଦୃଷ୍ଟି ଆକର୍ଷଣ କଲା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନହେବାରୁ ଏଭଳି ପ୍ରତିବାଦ ଜାରି ରହିଛି । ତେବେ ତିନି ଦିନ ମହମବତୀ ଶୋଭାଯାତ୍ରା ପରେ, ୧୫ ତାରିଖରୁ ଗ୍ରୀଡ଼କୋ ଓ ଓପିଟିସିଏଲ ଅଫିସ ସମ୍ମୁଖରେ ରିଲେ ସତ୍ୟାଗ୍ରହ କରାଯିବ ବୋଲି ନିଷ୍ପତ୍ତି ହୋଇଛି । ତେବେ ଏହି ବିକ୍ଷୋଭରେ ଅଲ ଓଡ଼ିଶା ପାୱାର ଇଞ୍ଜିନିୟର୍ସ ଫେଡେରେସନର କର୍ମକର୍ତ୍ତମାନେ ନେତୃତ୍ୱ ନେଇଥିବା ଫେଡେରେସନ ମହାସଚିବ ବ୍ରହ୍ମପ୍ରକାଶ ପାଇଟାଳ ସୂଚନା ଦେଇଛନ୍ତି ।