ଢେଙ୍କାନାଳ କାମାକ୍ଷାନଗରରେ ବିଜେଡି ନେତାଙ୍କୁ ଗୁଳିମାଡ଼: କଟକର ଏକ ଘରୋଇ ହସ୍ପିଟାଲରେ ଭର୍ତ୍ତି
ଢେଙ୍କାନାଳ(ଏନ୍.ଏମ୍.): ପୁଣି ରାଜନୈତିକ ବ୍ୟକ୍ତିବିଶେଷଙ୍କୁ ଉପରୁ ଗୁଳିମାଡ଼ । ପୂର୍ବତନ ମନ୍ତ୍ରୀ ନବ ଦାସଙ୍କ ଗୁଳିକାଣ୍ଡ ଘଟଣାର ତଦନ୍ତ ଶେଷ ହୋଇନଥିବାବେଳେ ପୁନର୍ବାର ଢେଙ୍କାନାଳରେ ଫୁଟିଲା ଗୁଳି । ସେ ପୁଣି ଜଣେ ବିଜେଡି ନେତା । ତେବେ ବିଜେଡି ନେତାମାନଙ୍କ ଉପରୁ ଗୁଳି ଚଳାଇବା ଘଟଣା ରାଜ୍ୟବାସୀଙ୍କୁ ଚକିତ କରିଛି । ତେବେ ବିଜେଡି ନେତାମାନେ କାହିଁକି ଟାର୍ଗେଟକୁ ଆସୁଛନ୍ତି ସେ ନେଇ ସୃଷ୍ଟି ହୋଇଛି ଅନେକ ସମାହିତ ପ୍ରଶ୍ନ । ସୂଚନା ଅନୁଯାୟୀ ଢେଙ୍କାନାଳ ଜିଲ୍ଲା କାମାକ୍ଷାନଗରର ବିଜେଡି ନେତା କାହ୍ନୁଚରଣ ସାହୁଙ୍କୁ ଗୁଳିମାଡ଼ ହୋଇଛି । ତାଙ୍କ ହାତ ଓ ଜଙ୍ଘରେ ଗୁଳି ବାଜିଛି । ଗୁଳିକାଣ୍ଡ ପରେ କାହ୍ନୁଙ୍କ ପ୍ରଥମେ ସ୍ଥାନୀୟ କାମାକ୍ଷାନଗର ଡାକ୍ତରଖାନାକୁ ନିଆଯାଇଥିବାବେଳେ ତାଙ୍କୁ କଟକର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ଜଣାପଡ଼ିଛି ।
ମିଳିଥିବା ସୂଚନା ଅନୁଯାୟୀ ଗତକାଲି (ବୁଧବାର) ବିଳମ୍ବିତ ରାତିରେ ଏଭଳି ଘଟଣା ଘଟି ଯାଇଛି । କାହ୍ନୁଚରଣ କାରରେ ଘରକୁ ଫେରୁଥିବା ବେଳେ କାମାକ୍ଷାନଗର ମେନରୋଡ ସ୍ଥିତ ମା’ ତାରିଣୀ ଅଳଙ୍କାର ଦୋକାନ ସାମ୍ନାରେ ତାଙ୍କୁ ୩ଜଣ ଦୁବୃର୍ତ୍ତ ଏକ ବାଇକରେ ଆସ ଗୁଳି କରି ଫେରାର ହୋଇ ଯାଇଥିଲେ । ପ୍ରତ୍ୟେକ୍ଷ ଦର୍ଶୀଙ୍କ ସୂଚନା ଅନୁଯାୟୀ ଉକ୍ତ ଅଳଙ୍କାର ଦୋକାନ ସାମ୍ନାରେ ୩ଜଣ ଦୁବୃର୍ତ୍ତ ବାଇକରେ ଆସି କାହ୍ନୁଚରଣଙ୍କ କାର ଆଗରେ ବାଇକ ରଖିଦେଇଥିଲେ । ତେବେ କେହି କିଛି ବୁଝିବା ଆଗରୁ ସେମାନେ କାର କାଚକୁ ଭାଙ୍ଗି ଗୁଳି କରିଥିଲେ । ୨ରାଉଣ୍ଡ ଗୁଳି ମାରିବା ପରେ ଦୁବୃର୍ତ୍ତମାନେ ଘଟଣାସ୍ଥଳରେ ଫେରାର ହୋଇ ଯାଇଥିଲେ । ତେବେ ପ୍ରଶ୍ନ ଉଠୁଛି କିଏ ଓ କାହିଁକି କାହ୍ନୁଚରଣଙ୍କ ଉପରକୁ ଗୁଳି କଲେ । ଅନ୍ୟପକ୍ଷରେ କାହ୍ନୁଚରଣ ଜଣେ ଲୋକପ୍ରିୟ ବିଜେଡି ନେତା ହୋଇଥିବାବେଳେ ଠିକାଦାରୀ ମଧ୍ୟ କରିଥାନ୍ତି । ତେଣୁ ରାଜନୀତିକ ଶତ୍ରୁତାରୁ ନା ଠିକାଦାରୀକୁ ନେଇ ଏହି ଗୁଳିକାଣ୍ଡ ଘଟିଛି, ତାହା ସ୍ପଷ୍ଟ ହୋଇ ନାହିଁ । ଏହି ଘଟଣାକୁ କାମାକ୍ଷାନଗର ପୁଲିସ ଗୁରୁତର ସହ ନେଇ ତଦନ୍ତ କରୁଛି । ଘଟଣାସ୍ଥଳ ଆଖପାଖରେ ଲାଗିଥିବା ସିସିଟିଭି ଫୁଟେଜ ଗୁଡ଼ିକୁ ପୁଲିସ ଯାଞ୍ଚ କରୁଛି । ତେବେ ପୂର୍ବରୁ ବି ତାଙ୍କ ଉପରେ ଆକ୍ରମଣ ହୋଇଥିଲା । ଥରେ ଘର ସାମ୍ନାରେ ଥିବା ତାଙ୍କ କାର ଉପରକୁ ବୋମାମାଡ଼ କରାଯାଇଥିଲା । ସେହିପରି ଆଉ ଥରେ ଢେଙ୍କାନାଳ ସହରରେ ତାଙ୍କ କାରକୁ ଲକ୍ଷ୍ୟ କରି ଗୁଳି କରାଯାଇଥିଲା । ତେଣୁ ତାଙ୍କ ଉପରେ କାହାର ଟାର୍ଗେଟ ରହିଛି ସେ ନେଇ ପୁଲିସ ମଧ୍ୟ ମୁହଁ ଖୋଲିନଥିଲେ ମଧ୍ୟ ତଦନ୍ତ ପରେ ଘଟଣା ସାମ୍ନାକୁ ଆସିବ ବୋଲି ପୁଲିସ ପକ୍ଷରୁ ସୂଚନା ଦିଆଯାଇଛି ।