ଡ୍ୟାମରେ ଗାଧୋଇବା ହେଲା କାଳ, ଚାଲିଗଲା ଦୁଇ ଜୀବନ
#ଚୌଦ୍ୱାର(ଏନ୍.ଏମ୍.): ସାଙ୍ଗମାନଙ୍କ ସହିତ ବଣଭୋଜି କରିବା ନିମନ୍ତେ ପର୍ଯ୍ୟଟନସ୍ଥଳୀକୁ ବୁଲିବାକୁ ଯିବା କାଳ ହୋଇଛି ଦୁଇ ବନ୍ଧୁଙ୍କ ପାଇଁ । ଏହି ଅବସରରେ ଡ୍ୟାମରେ ଗାଧୋଇବାକୁ ଯାଇ ୨ଜଣ ବନ୍ଧୁଙ୍କର ସଲିଳ ସମାଧି ହୋଇଯିବା ସମସ୍ତ ପର୍ଯ୍ୟଟକଙ୍କୁ ସ୍ତବ୍ଧ କରିଦେବା ସହ ଶୋକାକୂଳ ପରିସ୍ଥିତି ସୃଷ୍ଟି ହୋଇଛି । ଏଭଳି ଦୁଃଖଦ ଘଟଣା ଘଟିଛି ଟାଙ୍ଗୀ-ଚୌଦ୍ୱାର ବ୍ଲକ୍ ଅନ୍ତର୍ଗତ ମଙ୍ଗରାଜପୁର ପଞ୍ଚାୟତ ଡମଡମଣୀ ଡ୍ୟାମରେ । ଆଜି ଡ୍ୟାମରେ ୨ଜଣ ଛାତ୍ର ବୁଡ଼ି ପ୍ରାଣ ହରାଇଥିବାବେଳେ ୩ ଜଣଙ୍କୁ ଉଦ୍ଧାର କରାଯାଇଥିବା ଜଣାପଡ଼ିଛି । ସୂଚନାଥାଉକି, କଟକ ଷ୍ଟୁଆର୍ଟ ସାଇନ୍ସ କଲେଜର ୫ଜଣ ଛାତ୍ର ଡମଡମଣୀ ପୀଠକୁ ବୁଲିବା ପାଇଁ ଆସିଥିବାବେଳେ ନିକଟରେ ଥିବା ଡ୍ୟାମ୍ରେ ଗାଧୋଇବା ପାଇଁ ଯାଇଥିଲେ । କିନ୍ତୁ ଗୋଡ଼ ଖସିଯିବାରୁ ପ୍ରଥମେ ୨ଜଣ ଛାତ୍ର ପାଣି ଭିତରକୁ ଚାଲିଯାଇଥିବାବେଳେ ସେମାନଙ୍କୁ ବଞ୍ଚାଇବା ପାଇଁ ବାକି ୩ଜଣ ଛାତ୍ର ଜଣକ ପରେ ଜଣେ ଯାଇଥିଲେ ମଧ୍ୟ ସେମାନେ ସେ ପାଣି ଭିତରେ ପଶିଯାଇଥିବା ବେଳେ ସେମାନଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ସଙ୍ଗେ ସଙ୍ଗେ ୩ ଜଣ ଛାତ୍ରଙ୍କୁ ଉଦ୍ଧାର କରିଥିବା ବେଳେ ବାକି ୨ ଜଣ ଛାତ୍ରଙ୍କୁ ଉଦ୍ଧାର କରିପାରିନଥିଲେ । ଏହାପରେ ଅଗ୍ନିଶମ ବାହିନୀ ଓ ଚୌଦ୍ୱାର ଥାନାକୁ ଜଣାଇବା ପରେ ଘଟଣାସ୍ଥଳରେ ଅଗ୍ନିଶମ କର୍ମଚାରୀ ବହୁତ ସମୟ ଖୋଜାଖୋଜି କରିବା ପରେ ୨ଜଣ ଛାତ୍ରଙ୍କୁ ଉଦ୍ଧାର କରିଥିବା ବେଳେ ସେମାନଙ୍କର ମୃତ୍ୟୁ ହୋଇ ସାରିଥିଲା । ମୃତ ଛାତ୍ର ୨ଜଣ କଟକ ବିଡ଼ାନାସୀର ସ୍ୱତିକ ଶତପଥୀ ଓ ସ୍ୱୟଂସଙ୍କେତ ଦାସ ହୋଇଥିବା ବେଳେ ସେମାନେ ଷ୍ଟୁଆର୍ଟ ସାଇନ୍ସ କଲେଜରେ ଯୁକ୍ତ ଦୁଇ ଦ୍ୱିତୀୟ ବର୍ଷରେ ଅଧ୍ୟୟନ କରୁଥିଲେ ବୋଲି ଜଣାପଡ଼ିଛି । ମୃତ ଶରୀରକୁ ପୁଲିସ୍ ବ୍ୟବଚ୍ଛେଦ କରିବା ପାଇଁ କଟକ ବଡ଼ଡାକ୍ତରଖାନା ପଠାଇବା ସହ ତଦନ୍ତ ଜାରି ରଖିଥିବା ଜଣାପଡ଼ିଛି ।