ଡ୍ରାଇଭରମାନଙ୍କୁ ୭ଲକ୍ଷ ଜୋରିମାନା ଓ୧୦ବର୍ଷ ଜେଲଦଣ୍ଡ ଭଳି କଳା ଆଇନ୍ ବିରୁଦ୍ଧରେ କଟକରେ ଶୋଭଯାତ୍ରା ଓ ସଭା
#କଟକ(ଏନ୍.ଏମ୍.): ଭାରତୀୟ ନ୍ୟାୟ ସଂହିତା ୨୦୨୩ ନାମରେ ପୁରୁଣା ଆଇନ୍କୁ ପରିବର୍ତ୍ତନ କରି କେନ୍ଦ୍ର ବିଜେପି ସରକାର ମୋଟର ଦୁର୍ଘଟଣା ଜନିତ କେଶରେ ହିଟ ଆଣ୍ଡ ରନରେ ଡ୍ରାଇଭରମାନଙ୍କୁ ୧୦ ବର୍ଷ ଜେଲଦଣ୍ଡ ଓ ୭ ଲକ୍ଷ ଟଙ୍କା ଜୋରିମାନା ଦେବାକୁ ହେବ ବୋଲି ନୂଆ ଆଇନ କରିଛନ୍ତି । ମାତ୍ର ପୂର୍ବ ଆଇନ୍ରେ ଭାରତୀୟ ଦଣ୍ଡବିଧି ଆଇନ ୩୦୪ (କ) ଦଫା ଅନୁସାରେ ମୋଟର ଦୁର୍ଘଟଣାରେ ମୃତ୍ୟୁ ହେଲେ ସମ୍ପୃକ୍ତ ଡ୍ରାଇଭରକୁ ଦୁଇ ବର୍ଷ ଜେଲଦଣ୍ଡର ବ୍ୟବସ୍ଥା ଥିଲା । କେନ୍ଦ୍ର ସରକାରଙ୍କ ନୂଆ ଆଇନ୍ ଡ୍ରାଇଭିଙ୍ଗ ଲାଇସେନସ ଥିବା ସବୁ ବର୍ଗର ଡ୍ରାଇଭରମାନଙ୍କ ପାଇଁ ଲାଗୁ କରାଯାଇଛି ଯାହାକି ଅତ୍ୟନ୍ତ ଉଦବେଗର ବିଷୟ ଅଟେ । ଯଦିଓ ସଡ଼କ ଦୁର୍ଘଟଣା ପାଇଁ କେବଳ ମୋଟର ଚାଳକ (ଡ୍ରାଇଭର)ମାନଙ୍କୁ ଦାୟୀ କରାଯାଇପାରିବ ନାହିଁ । ତେଣୁ ଏଭଳି ବିଚିତ୍ର ଦଣ୍ଡ ବ୍ୟବସ୍ଥା ବିରୁଦ୍ଧରେ ସାରା ଦେଶର ଡ୍ରାଇଭର ମହାସଂଘ ଏବଂ ପରିବହନ ଫେଡ଼େରେସନମାନଙ୍କ ତରଫରୁ ଷ୍ଟିୟରିଙ୍ଗ ଛାଡ଼ ଡାକରା ପରିପ୍ରେକ୍ଷୀରେ ଆଜି କଟକରେ ଡ୍ରାଇଭରମାନେ ସ୍ୱତଃସ୍ଫୂର୍ତ୍ତ ଭାବରେ ଆନ୍ଦୋଳନରେ ଯୋଗ ଦେଇଥିବାରୁ କଟକରୁ ବସ ଚଳାଚଳ ସ୍ୱାଭାବିକ ହୋଇପାରିନାହିଁ । ଟାକ୍ସି ଓ ଅଟୋଚାଳକମାନେ ଏହି ଧର୍ମଘଟରେ ସାମିଲ ହୋଇଛନ୍ତି । ଆଜି ଦିନ ୧୧ ଘଟିକା ସମୟରେ କଟକ ମୋଟର କର୍ମଚାରୀ ୟୁନିୟନ (ସି.ଆଇ.ଟି.ୟୁ), ଓଡ଼ିଶା ମୋଟର ଚାଳକ ସଂଘ ଓ ଡ୍ରାଇଭର ମହାସଂଘ ପକ୍ଷରୁ ମିଳିତ ଭାବରେ ଏକ ଶୋଭାଯାତ୍ରା ବାହାରି ମୁଖ୍ୟରାସ୍ତା ପରିକ୍ରମା କରି କଳା ଆଇନ ପ୍ରତ୍ୟାହାର କରିବାକୁ ଦାବି କରି ସ୍ଲୋଗାନମାନ ଦେଇ ଚାଲିଥିଲେ । ବାଦାମବାଡ଼ି ଗଣେଶ ମନ୍ଦିର ନିକଟରେ ଅନୁଷ୍ଠିତ ଏକ ପଥପ୍ରାନ୍ତ ସଭାରେ କର୍ମଚାରୀ ୟୁନିୟନର ସମ୍ପାଦକ ଶିଶିର ଲେଙ୍କା ସଭାପତିତ୍ୱ କରିଥିଲେ । ଉପସଭାପତି ବଦ୍ରି ନାରାୟଣ ଦାସ, ସହସମ୍ପାଦକ ଗଗନ ପରିଡ଼ା, କୃଷ୍ଣଚନ୍ଦ୍ର ଦାସ, ଓଡ଼ିଶା ମୋଟର ଚାଳକ ସଂଘର ଜିଲ୍ଲା ସଭାପତି ଦେବେନ୍ଦ୍ର ବେହେରା ପ୍ରମୁଖ ବକ୍ତବ୍ୟ ରଖି ଧର୍ମଘଟ ସଫଳ ହୋଇଥିବାରୁ ସମସ୍ତଙ୍କୁ ଅଭିନନ୍ଦନ ଜଣାଇ ବକ୍ତବ୍ୟ ରଖିବା ସହିତ କଳା ଆଇନ ପ୍ରତ୍ୟାହାର ନହେବା ପର୍ଯ୍ୟନ୍ତ ଆନ୍ଦୋଳନ ଚାଲୁ ରହିବ ବୋଲି ଘୋଷଣା କରିଥିଲେ । ଅନ୍ୟମାନଙ୍କ ମଧ୍ୟରେ ଓଡ଼ିଶା ମୋଟର ଚାଳକ ସଂଘର ଜିଲ୍ଲା ସମ୍ପାଦକ ସୁବାସ ଚନ୍ଦ୍ର ପାତ୍ର, ସହସମ୍ପାଦକ ବିକ୍ରମ ନାଥ ଶର୍ମା, ଡ୍ରାଇଭର ମହାସଂଘର ଜିଲ୍ଲା ସଭାପତି ରଞ୍ଜନ ଜେନା, ଜିଲ୍ଲା ସମ୍ପାଦକ ଆରତ ଗଣ୍ଠିଆ, ସହସମ୍ପାଦକ ଅନିଲ ବାରିକ, ଜଗନ୍ନାଥ ବେହେରା, ଅଜୟ ଦାସ, ମନୋଜ ମଲ୍ଲିକ ଏବଂ କଟକ ମୋଟର କର୍ମଚାରୀ ୟୁନିୟନ ତରଫରୁ ଉପସଭାପତି ହୀରାଲାଲ ପଣ୍ଡା, କୋଷାଧ୍ୟକ୍ଷ ବିଭୂତି ଭୂଷଣ ରାଉତ, ଅନ୍ୟତମ ନେତା ଅଚ୍ୟୁତ ଖୁଣ୍ଟିଆ, ଶ୍ରୀକାନ୍ତ ଛାଟୋଇ, ସୋମନାଥ ସାହୁ, ରଘୁନାଥ ବାରିକ, ରାକେଶ ରାଉତ ପ୍ରମୁଖ ସଂଘର ଶତାଧିକ ସଦସ୍ୟ ଆନ୍ଦୋଳନରେ ଉପସ୍ଥିତ ଥିଲେ ।