ଚୌଦ୍ୱାର ପୁଲିସର ସଫଳତା: ଚୋରି ସାମଗ୍ରୀ ଜବତ ୨ଗିରଫ

News by Laxmiprya Jena

ଚୌଦ୍ୱାର(ଏନ୍‌.ଏମ୍‌.): ଚୌଦ୍ୱାର ଅଞ୍ଚଳରେ ଚୋରି ଡକାୟତି କରୁଥିବା ୨ଜଣ ଦୁବୃର୍ତ୍ତଙ୍କୁ ପୁଲିସ ଆଜି ଧରିବାରେ ସଫଳ ହୋଇଛି। ଏମାନେ କେବଳ ଚୌଦ୍ୱାର କାହିଁକି ଭୁବନେଶ୍ୱର ଅଞ୍ଚଳରୁ ମଧ୍ୟ ବାରମ୍ବାର ପୁଲିସ ଆଖିରେ ଧୁଳି ଦେଇ ଚୋରି, ରାହାଜାନି, ଡକାୟତି କରି ଫେରାର ହୋଇ ଯାଉଥିଲେ। ତେବେ ଚୌଦ୍ୱାର ଅଞ୍ଚଳରେ ଚୋରି କରିଥିବା ବେଳେ ସେମାନଙ୍କୁ ଚୌଦ୍ୱାର ପୁଲିସ ଧରି ସେମାନଙ୍କ ଠାରୁ ଚୋରି ସାମଗ୍ରୀ ଜବତ କରିଛି। ଯାହା ଫଳରେ ଚୌଦ୍ୱାର ପୁଲିସ ଅଞ୍ଚଳବାସୀଙ୍କ ବିଶ୍ୱାସ ଭାଜନ ହୋଇ ପାରିଛି। ପ୍ରାପ୍ତ ସୂଚନା ଅନୁଯାୟୀ, ଯାଜଭୈରବ ଗ୍ରାମର ଅସିତ କୁମାର ମହାପାତ୍ରଙ୍କ ଘରୁ ଗତ ଜାନୁଆରୀ ୨୪ ତାରିଖ ବିଳମ୍ବିତ ରାତିରେ କିଛି ଅପରାଧୀ ତାଙ୍କ ଛାତର ସିଡି ଦ୍ୱାର ଭାଙ୍ଗି ତାଙ୍କ ଘରେ ପ୍ରବେଶ କରି ଲାପଟପ୍‌, ୦୨ଟି ମୋବାଇଲ୍ ଫୋନ୍‌, ଅନ୍ୟାନ୍ୟ ଜିନିଷ ଚୋରି କରିଥିଲେ। ଏ ନେଇ ଶ୍ରୀ ମହାପାତ୍ର ଚୌଦ୍ୱାର ଥାନାରେ ଅଭିଯୋଗ କରିବା ପରେ ପୁଲିସ ଚୌଦ୍ୱାର ଥାନା କେସ୍ ନମ୍ବର ୫୧ ତାରିଖ ୨୫.୦୧.୨୦୨୫ ରେ ଏକ ମାମଲା କରିଥିଲେ। ଉକ୍ତ ରିପୋର୍ଟ ଉପରେ ୩୩୧(୪)/୩୦୫(କ)/୩(୫) ବିଏନ୍‌ଏସ୍ ଅନୁଯାୟୀ ଉପରୋକ୍ତ ମାମଲା ରୁଜୁ ହୋଇଛି। ଅଭିଯୁକ୍ତମାନଙ୍କ ମଧ୍ୟରେ ତପନ ମହାନ୍ତି ଓରଫ ପୁହାନ (୪୨) ବର୍ଷ ଗ୍ରାମ- ଅଙ୍ଗଦରାଡିହ, ଚୌଦ୍ୱାର ଏବଂ ଚୌଦ୍ୱାର ବ୍ରାହ୍ମଣ ସାହିର ନବ ସେଠି (୨୨)ଙ୍କୁ ଆଜି ଗିରଫ କରାଯାଇଛି। ସେମାନଙ୍କ ଠାରୁ ୪ଟି ମୋବାଇଲ୍ ଫୋନ୍ ଜବତ କରାଯାଇଛି, ଯେଉଁଥିରେ ଗୋଟିଏ ଆପଲ୍ ଆଇ ଫୋନ୍‌, ଗୋଟିଏ ଲାପଟପ୍ ରହିଛି। ସେମାନେ ଚୌଦ୍ୱାର, କଟକ ଏବଂ ଭୁନନେଶ୍ୱର ଅଞ୍ଚଳରୁ ମଧ୍ୟ ଚୋରି କରିଛନ୍ତି। ଅଭିଯୁକ୍ତମାନେ ସମ୍ପତ୍ତି ଅପରାଧ ମାମଲାରେ ଜଡିତ ଅଛନ୍ତି। ଆଜି ସେମାନଙ୍କୁ କୋର୍ଟ ଚାଲଣ କରାଯାଇଥିବା ଚୌଦ୍ୱାର ଥାନା ଅଧିକାରୀ ବିଶ୍ୱରଞ୍ଜନ ସାହୁ ପ୍ରକାଶ କରିଛନ୍ତି।

By admin

Leave a Reply

Your email address will not be published. Required fields are marked *