କେନ୍ଦୁଝରରେ ପୁଲିସ ଇନିସ୍ପେକ୍ଟରସ୍ତରରେ ଅଦଳବଦଳ

#କେନ୍ଦୁଝର(ଏନ୍‌.ଏମ୍‌.): କେନ୍ଦୁଝର ଜିଲ୍ଲାର ନୂତନ ଏସପି ଭାବେ ନିତିନ କୁଶଲକର ଦାୟିତ୍ୱ ନେବା ପରେ ଇନିସ୍ପେକ୍ଟର ସ୍ତରରେ ଅଦଳବଦଳ କରିଛନ୍ତି । ବିଭିନ୍ନ ଥାନାରେ ଖାଲିପିଡ଼ିଥିବା ପଦବୀ ପୂରଣ ନିମନ୍ତେ ଜିଲ୍ଲା ପୁଲିସ ଏଷ୍ଟବ୍ଳସମେଣ୍ଟ ବୋର୍ଡ ନିଷ୍ପତ୍ତି କ୍ରମେ ଏହି ବଦଳି କରାଯାଇଥିବା ନିର୍ଦ୍ଦେଶରେ ଉଲ୍ଲେଖ ଅଛି । ପ୍ରାପ୍ତ ସୂଚନା ଅନୁସାରେ ପୁଲିସ ମୁଖ୍ୟାଳୟରେ ଥିବା ଇନିସ୍ପେକ୍ଟର ଅଞ୍ଜନ କୁମାର ପାତ୍ରଙ୍କୁ ଘଟଗାଁ ଥାନାକୁ ବଦଳି ହୋଇଛି । ସେହିପରି ପୁଲିସ ମୁଖ୍ୟାଳୟରେ ଥିବା ଇନିସ୍ପେକ୍ଟର ରବୀନ୍ଦ୍ର କୁମାର ପାତ୍ରଙ୍କୁ ନନ୍ଦିପଦା ଥାନା, ବିଜୟ କୁମାର ସିଂଙ୍କୁ ରାମଚନ୍ଦ୍ରପୁର ଥାନା, ବିଜୟ କୁମାର ବିହାରୀଙ୍କୁ ତେଲକୋଇ ଥାନାକୁ ବଦଳି କରାଯାଇଛି । ଅନ୍ୟପକ୍ଷରେ ଇନିସ୍ପେକ୍ଟର ଅବିନାଶ ପରିଡାଙ୍କୁ ରାମଚନ୍ଦ୍ରପୁର ଥାନାରୁ ପଣ୍ଡାପଡା ଥାନାକୁ ବଦଳି ହୋଇଥିବାବେଳେ ନନ୍ଦିପଦା ଥାନାରେ ଥିବା ଗଗନ ବିହାରୀ ବିଶ୍ୱାଳଙ୍କୁ ପୁଲିସ ମୁଖ୍ୟାଳୟକୁ ବଦଳି କରାଯାଇଥିବା ଜଣାପଡ଼ିଛି ।