କାଉନସିଲ ସଭାରେ ଅବାଧ ପ୍ରବେଶ କରି ହଟହଟା ହେଲେ ସ୍ୱାଧୀନ କାଉନସିଲରଙ୍କ ସ୍ୱାମୀ

ଚୌଦ୍ୱାର(ଏନ୍‌.ଏମ୍‌.): ଚୌଦ୍ୱାର ପୌରପାଳିକା ପାଲଟିଛି ଏବେ ମନୋମୁଖୀ କାର୍ଯ୍ୟର ଗନ୍ତାଘର। ଏଠାରେ ଦୁର୍ନୀତିର ଚେର ଲମ୍ବି ଚାଲିଥିବାବେଳେ ଦୁର୍ନୀତିଖୋରଙ୍କ ସଂଖ୍ୟା ମଧ୍ୟ ବଢ଼ିବାରେ ଲାଗିଛି। ତେବେ ନାହିଁ ନାହିଁରେ ଚାଲିଛି ଚୌଦ୍ୱାର ପୌରପାଳିକା। ତଥାପି ଚେତୁନାହାନ୍ତି ପୌର ପରିଷଦ। ଯାହାକୁ ନେଇ ପୌରପାଳିକାରେ କୁହୁଳୁଛି ଅସନ୍ତୋଷ। ନିର୍ବାଚନରେ ବିଜୟ ମୁକୁଟ ପିନ୍ଧିଥିବା କାଉନସିଲରମାନେ ଚଳାଇଛନ୍ତି ମନଇଚ୍ଛା କାମ। ଯେନତେନ ପ୍ରକାର ରାଜସ୍ୱ ଲୁଟିବା ପାଇଁ ଚଳାଇଛନ୍ତି ପ୍ରୟାସ। ଗୋଟିଏ ପଟେ ସରକାର ନିର୍ବାଚନରେ ମହିଳାମାନଙ୍କ ଅନୁପାତ ବୃଦ୍ଧି କରି ମହିଳା ସଶକ୍ତିକରଣର ଡିଣ୍ଡିମ ପିଟୁଥିବାବେଳେ ନିର୍ବାଚିତ ମହିଳାମାନଙ୍କ ସ୍ୱାମୀ, ଭାଇ ତଥା ବାପାମାନେ କ୍ଷମତାକୁ ପ୍ରୟୋଗ କରୁଛନ୍ତି। କେବଳ ନାମକୁ ମାତ୍ର ମହିଳାମାନଙ୍କୁ ଲୋକପ୍ରତିନିଧି ଭାବେ ଗ୍ରହଣ କରାଯାଉଥିଲେ ମଧ୍ୟ ଏମାନଙ୍କ ପରିବାରର ପୁରୁଷମାନେ ପାଲଟି ଯାଉଛନ୍ତି ମାମଲତକାର। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଚୌଦ୍ୱାର ପୌରପାଳିକାରେ। ଗତକାଲି ପୌରପାଳିକାର ଦାୟିତ୍ୱରେ ଥିବା ନିର୍ବାହୀ ଅଧିକାରୀଙ୍କ ବିଦାୟକାଳୀନ ସମ୍ବର୍ଦ୍ଧନା ସଭାରେ ଏଭଳି ଘଟଣା ଦେଖିବାକୁ ମିଳିଛି। ଚୌଦ୍ୱାର ପୌରଧ୍ୟକ୍ଷା ମାନସୀ ସ୍ୱର୍ଣ୍ଣପ୍ରଭା ସାମଲଙ୍କ ଅଧ୍ୟକ୍ଷତାରେ ଏହି ସମ୍ବର୍ଦ୍ଧନା ସଭା ଚାଲିଥିବାବେଳେ ହଠାତ୍ ଜଣେ କାଉନସିଲରଙ୍କ ସ୍ୱାମୀ କୌଣସି ପଦପଦବୀରେ ନଥାଇ ମଧ୍ୟ ସଭାରେ କାଉନସିଲରମାନଙ୍କ ପାଇଁ ଉଦ୍ଦିଷ୍ଟ ଆସନରେ ବସିପଡ଼ିଥିଲେ। ତେବେ ସମ୍ପୃକ୍ତ ମହିଳା କାଉନସିଲରଙ୍କ ପକ୍ଷରୁ କୌଣସି ଲିଖିତ ଅନୁମତି ନଥିଲେ ମଧ୍ୟ ତାଙ୍କ ସ୍ୱାମୀ ସଭାରେ କାଉନସିଲରଙ୍କ ଆସନରେ ବସିବା ନେଇ କିଛି କାଉନସିଲର ଆପତ୍ତି ଉଠାଇଥିଲେ। ଏପରିକି କାଉନସିଲରଙ୍କ ବଦଳରେ ତାଙ୍କ ପ୍ରତିନିଧି କାଉନସିଲର ଆସନରେ ବସିବା ମ୍ୟୁନିସପାଲଟି ଆକ୍ଟର ଖୋଲା ଉଲଙ୍ଘନ ବୋଲି ଚର୍ଚ୍ଚା ହୋଇଥିଲା। ଫଳରେ ସମ୍ବର୍ଦ୍ଧନା ସଭା ସ୍ଥଳରେ ଅସନ୍ତୋଷ ତେଜିବାରେ ଲାଗିଥିଲା। ଏହାପରେ ସମ୍ପୃକ୍ତ ମହିଳା କାଉନସିଲରଙ୍କ ସ୍ୱାମୀ ଆସନରୁ ଉଠି ଚାଲିଯାଇଥିବା ଦେଖିବାକୁ ମିଳିଥିଲା। ତେବେ ପୌରାଧ୍ୟକ୍ଷା ଏ ନେଇ କାହିଁକି ପ୍ରତିବାଦ କଲେନାହିଁ ସେ ସମ୍ପର୍କରେ ମଧ୍ୟ ଆଲୋଚନା ଚାଲିଛି। ତେବେ ମହିଳା କାଉନସିଲରଙ୍କ ସ୍ୱାମୀ କରିଥିବା ଦୃଷ୍ଟତା ପାଇଁ ଶାସକଦଳର କାଉନସିଲରମାନେ ପ୍ରତିବାଦ କରିବା ପାଇଁ ଚାପା ଉତ୍ତେଜନା ମଧ୍ୟ ଦେଖିବାକୁ ମିଳିଥିଲା।