କଟକ ଜିଲ୍ଲାସ୍ତରୀୟ ନିପୁଣ ଓଡିଶା ମିଶନ ୨୦୨୪ର ଶୁଭାରମ୍ଭ
#କଟକ(ଏନ୍.ଏମ୍.): ଜିଲ୍ଲାସ୍ତରୀୟ ନିପୁଣ ଓଡିଶା ମିଶନ ୨୦୨୪ର ଶୁଭାରମ୍ଭ ଏକ ବର୍ଣ୍ଣାଢ଼୍ୟ ପରିବେଶରେ ଅନୁଷ୍ଠିତ ହୋଇଯାଇଛି। ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲା ଶିକ୍ଷା କାର୍ଯ୍ୟାଳୟ ଆନୁକୂଲ୍ୟରେ ଜିଲ୍ଲାପାଳଙ୍କ ସମ୍ମିଳନୀ କକ୍ଷ ଠାରେ ଜିଲ୍ଲା ସମଗ୍ର ଶିକ୍ଷା ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ଆଜି ନିପୁଣ ଓଡିଶା ମିଶନର ଲୋଗୋ ଓ ସଂଗୀତ ଉନ୍ମୋଚନ କରାଯାଇଥିଲା। ଜିଲ୍ଲାପାଳ ତଥା କଟକ ନିପୁଣ ଓଡ଼ିଶା ମିଶନ ସଭାପତି ଦତ୍ତାତ୍ରୟ ଭାଉସାହେବ ଶିନ୍ଦେଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥିଭାବେ ଜିଲ୍ଲା ପରିଷଦ ସଭାପତି କିଶୋର ଚନ୍ଦ୍ର ମିଶ୍ର ଯୋଗଦେଇ ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ ଦକ୍ଷତାର ବିକାଶ ସହ ଶିକ୍ଷଣ ପଦ୍ଦତିରେ ମାନନିର୍ଦ୍ଧରଣ କରାଯିବା ସମ୍ବନ୍ଧରେ ନିଜର ମତାମତ ରଖି ଏହି ମିଶନଦ୍ୱାରା ଲକ୍ଷ୍ୟ ରଖାଯାଇଥିବା ପ୍ରଥମ ଶ୍ରେଣୀରୁ ତୃତୀୟ ଶ୍ରେଣୀ ପାଠ ପଢୁଥିବା ପିଲା ମାନଙ୍କର ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ ଦକ୍ଷତା ବଜାୟ ରହିବା ନିମନ୍ତେ ଶିକ୍ଷଣ ତଥା ଗୁଣବତ୍ତା ଶିକ୍ଷାଦାନ ଉପରେ ଗୁରୁତ୍ୱାରୋପ କରିଥିଲେ ଏବଂ ଆଗାମୀ ଦିନରେ ଏହି ମିଶନ ଜରିଆରେ ପିଲାମାନଙ୍କର ମୂଳଦୁଆ ଗଢ଼ିବା ତଥା ଦକ୍ଷତା ହାସଲ କରିବା ସହ ମାନସିକ ବିକାଶ ମଧ୍ୟ ଘଟିବ ବୋଲି ମତ ପ୍ରକାଶ କରିଥିଲେ।
ଜିଲ୍ଲାପାଳ ଶ୍ରୀ ଶିନ୍ଦେ ଏହି ଅବସରରେ କହିଲେ ଯେ, ଲକ୍ଷ୍ୟ ରଖା ଯାଇଥିବା ପିଲାମାନଙ୍କର ମୌଳିକ ସାକ୍ଷରତା ହେଉଛି ସେମାନଙ୍କର ମୌଳିକ ଅଧିକାର। ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ ଦକ୍ଷତା ବଜାୟ ରଖିବା ନିମନ୍ତେ ସରକାରୀ ପ୍ରୋତ୍ସାହନ ସହ ସମାଜର ସମସ୍ତଙ୍କ ମଧ୍ୟରେ ଖୋଲା ଧାରଣା ରହିବା ଉଚିତ। ଶିକ୍ଷାଦାନ କ୍ଷେତ୍ରରେ ଲକ୍ଷ୍ୟ ରଖାଯାଇଥିବା ପ୍ରଥମ ଶ୍ରେଣୀ ଠାରୁ ତୃତୀୟ ଶ୍ରେଣୀ ପିଲାମାନଙ୍କ ମଧ୍ୟରେ ଆଗ୍ରହ ସୃଷ୍ଟି କରିବା ସହ ମାନସିକସ୍ତରରେ ସେମାନଙ୍କୁ ପ୍ରସ୍ତୁତ କରିବା ଏବଂ ଏଥିନିମନ୍ତେ ବୃଦ୍ଧିକର ପଦକ୍ଷେପ ଗ୍ରହଣ କରିବାର ଆବଶ୍ୟକତା ଅଛି ବୋଲି ନିଜର ମତବ୍ୟକ୍ତ କରିଥିଲେ। ଏଥିପାଇଁ ସମୟ ସମୟରେ ସମୀକ୍ଷା କରାଯିବା ଉଚିତ୍ ବୋଲି ମଧ୍ୟ ସେ କହିଥିଲେ। ସୂଚନାଯୋଗ୍ୟ ଭାରତ ସରକାରଙ୍କ ଶିକ୍ଷାପଦ୍ଧତିର ଏହି ମିଶନକୁ ସାକାର କରିବା ପାଇଁ ଓଡ଼ିଶା ସରକାର ଚଳିତ ମାସ ସେପ୍େଟମ୍ବର ୫ତାରିଖ ଗୁରୁ ଦିବସ ଠାରୁ ନିପୁଣ ଓଡ଼ିଶା ମିଶନ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି। ଜିଲ୍ଲା ଶିକ୍ଷା ଅଧିକାରୀ ତଥା ସମଗ୍ର ଶିକ୍ଷା ଜିଲ୍ଲା ପ୍ରକଳ୍ପ ସଂଯୋଜକ ଡଃ ସନ୍ତୋଷ କୁମାର ରାଉତ ନିପୁଣ ଓଡ଼ିଶା ମିଶନ କାର୍ଯ୍ୟକ୍ରମ ସମ୍ବନ୍ଧରେ ସୂଚନା ପ୍ରଦାନ କରିବା ସହ ସମଗ୍ର ଜିଲ୍ଲାରେ ନିପୁଣ ଓଡ଼ିଶା ମିଶନ ଜରିଆରେ ଲକ୍ଷ୍ୟ ରଖାଯାଇଥିବା ମୌଳିକ ସାକ୍ଷରତା ଓ ସଂଖ୍ୟାଜ୍ଞାନ କାର୍ଯ୍ୟକ୍ରମରେ ଅନ୍ତର୍ଭୁକ୍ତ ସମସ୍ତ ପିଲାମାନଙ୍କର ଯଥାର୍ଥରେ କିପରି ଦକ୍ଷତା ବିକାଶ ହୋଇପାରିବ ସେଥିପାଇଁ ଜିଲ୍ଲା ସମଗ୍ର ଶିକ୍ଷା ତତ୍ପରତାର ସହ କାର୍ଯ୍ୟ କରିବ ବୋଲି ପ୍ରତିଶୃତି ଦେଇଥିଲେ। ଆଜି ଏହି କାର୍ଯ୍ୟକ୍ରମର ଶୁଭାରମ୍ଭ ଓ ଶୁଭ ଉନ୍ମୋଚନ ଅବସରରେ ଡି. ଆଇ. ଇ. ଟି, ଅଧ୍ୟକ୍ଷ ନିରଞ୍ଜନ ସାହୁ, ଜିଲ୍ଲା ମଙ୍ଗଳ ଅଧିକାରୀ ମଧୁସ୍ମିତା ମହାପାତ୍ର, ଜିଲ୍ଲା ଶିଶୁ ସୁରକ୍ଷା ଅଧିକାରୀ, ପ୍ରଗତି ମହାନ୍ତିଙ୍କ ସମେତ ବିଭିନ୍ନ ବ୍ଲକ ଶିକ୍ଷା ଅଧିକାରୀ, ପାଠ୍ୟକ୍ରମ କର୍ତ୍ତୃପକ୍ଷ ପ୍ରମୁଖ ଯୋଗଦେଇଥିଲେ। ଏହି ଅବସରରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ସୋନାମିକା ରାୟ ନିପୁଣ ଓଡ଼ିଶା କାର୍ଯ୍ୟକ୍ରମ ଅନ୍ତର୍ଗତ ଲକ୍ଷ୍ୟ ହାସଲ କରିବା ପାଇଁ ବିଭିନ୍ନ ବିଭାଗର ସଂପୃକ୍ତି ତଥା ଦକ୍ଷତାବିକାଶ ନିମନ୍ତେ ପର୍ଯ୍ୟାୟଭିତ୍ତିକ ମାନନିର୍ଦ୍ଧାରଣ ସମ୍ବନ୍ଧରେ ମତାମତ ରଖି ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ସମଗ୍ର ଶିକ୍ଷା ଜିଲ୍ଲା ଶିକ୍ଷଣ ସଂଯୋଜିକା ସରିତା ଶତପଥି କାର୍ଯ୍ୟକ୍ରମ ପରିଚାଳନା କରିବା ସହ ଏହି ମିଶନ ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ।