କଟକରେ ଯୋଗଦେଲେ ନୂଆ ଜିଲ୍ଲାପାଳ ଏବଂ ବଦଳିଲେ ସିଏମସି କମିଶନର
କଟକ(ଏନ୍.ଏମ୍.): କଟକ ଜିଲ୍ଲାରେ ଦୀର୍ଘ ୧ମାସ ଧରି ଅତିରିକ୍ତ ଜିଲ୍ଲାପାଳ କାର୍ଯ୍ୟ ତୁଲାଉଥିବାବେଳେ ଏବେ ନୂଆ ଜିଲ୍ଲାପାଳ ଯୋଗ ଦେଇଛନ୍ତି। ଏଥି ସହିତ ସିଏମସି କମିଶନରଙ୍କ ମଧ୍ୟ ବଦଳି ହୋଇଛି। ନୂତନ ସରକାର ଆସିବା ପରେ ତତ୍କାଳୀନ ଜିଲ୍ଲାପାଳ ଅରିନ୍ଦମ ଡାକୁଆଙ୍କୁ ବଦଳି କରାଯାଇଥିବାବେଳେ ଅତିରିକ୍ତ ଜିଲ୍ଲାପାଳ ଉକ୍ତ ଦାୟିତ୍ୱରେ ଥିଲେ। ତେବେ ଆଜି ରାଜ୍ୟସରକାରଙ୍କ ପକ୍ଷରୁ ପ୍ରକାଶ ପାଇଥିବା ବିଜ୍ଞପ୍ତି ଅନୁଯାୟୀ ମୟୂରଭଞ୍ଜ ଜିଲ୍ଲାପାଳ ଥବା ୨୦୧୬ ବ୍ୟାଚର ଦତ୍ତାତ୍ରେୟ ସିନ୍ଧେ ଭାନୁସାହେବ କଟକ ଜିଲ୍ଲାପାଳ ଭାବେ ବଦଳି ହୋଇ ଆସିଛନ୍ତି। ସେହିପରି ସିଏମସି କମିଶନର ବିଜୟ ଶଙ୍କର ଦାସଙ୍କୁ ଗଜପତି ଜିଲ୍ଲାପାଳ ଭାବେ ବଦଳି କରାଯାଇଥିବା ଜଣାପଡ଼ିଛି। ତେବେ ତାଙ୍କ ସ୍ଥାନରେ ଉକ୍ତ ପଦବୀରେ କାହାରିକୁ ନିଯୁକ୍ତି ଦିଆଯାଇ ନାହିଁ। ବିଜୟ ଶଙ୍କର ଦାସ କଟକ ମହାନଗର ନିଗମର କମିଶନର ସହ ସିଡିଏ ଉପାଧ୍ୟକ୍ଷ ଭାବେ ଅତିରିକ୍ତ ଦାୟିତ୍ୱ ମଧ୍ୟ ତୁଲାଉ ଥିଲେ।