କଂଗ୍ରେସରେ ଯୋଗଦେଲେ ହାଇକୋର୍ଟର ବରିଷ୍ଠ ଆଇନଜୀବୀ ଗୋପାଳକୃଷ୍ଣ ମହାନ୍ତି

#କଟକ(ଏନ୍‌.ଏମ୍‌.): ଦୀର୍ଘ ବର୍ଷ ଧରି ଓଡ଼ିଶାରେ ସତ୍ତା ହରାଇଥିବା କଂଗ୍ରେସ ଏବେ ତୃଣମୂଳସ୍ତରରେ ସଂଗଠନକୁ ମଜଭୁତ କରିବା ପାଇଁ ଅଣ୍ଟା ଭିଡିଛି । ପ୍ରଦେଶ କଂଗ୍ରେସ କମିଟି କର୍ମକର୍ତ୍ତା ପରିବର୍ତ୍ତନ ପରେ ଏବେ ଦଳ ଆଗାମୀ ସାଧାରଣ ନିର୍ବାଚନରେ ଭଲ ପ୍ରଦର୍ଶନ କରିବ ବୋଲି କଂଗ୍ରେସ ପକ୍ଷରୁ ଦୃଢ଼ୋକ୍ତି ପ୍ରକାଶ କରିଛି । ୧୪୭ଟି ବିଧାନସଭା ନିର୍ବାଚନ ମଣ୍ଡଳୀରେ କର୍ମୀମାନେ କିଭଳି ଦଳକୁ ସୁଦୃଢ଼ କରିବେ ସେ ନେଇ ନୂତନ ରଣନୀତି ତିଆରି କରୁଥିବାବେଳେ ବହୁ ବୁଦ୍ଧିଜୀବୀ ଏବେ କଂଗ୍ରେସରେ ସାମିଲ ହେଉଥିବା ଦେଖିବାକୁ ମିଳିଛି । ସୂଚନା ଅନୁଯାୟୀ ଭୁବନେଶ୍ୱର କଂଗ୍ରେସ ଭବନରେ ପ୍ରଦେଶ କଂଗ୍ରେସ ସଭାପତି ଶରତ ପଟ୍ଟନାୟକଙ୍କ ଉପସ୍ଥିତିରେ ଓଡ଼ିଶା ଷ୍ଟେଟ ବାର କାଉନସିଲର ପୂର୍ବତନ ଅଧ୍ୟକ୍ଷ ତଥା ବରିଷ୍ଠ ଆଇନଜୀବୀ ଗୋପାଳକୃଷ୍ଣ ମହାନ୍ତିଙ୍କ ସମେତ ଓଡ଼ିଶା ହାଇକୋର୍ଟର ଅନେକ ଆଇନଜୀବୀ କଂଗ୍ରେସ ଦଳରେ ଯୋଗ ଦେଇଛନ୍ତି । ବରିଷ୍ଠ ଆଇନଜୀବୀ ବିଶ୍ୱରଞ୍ଜନ ମହାରଥାଙ୍କ ଉଦ୍ୟମ ତଥା ନେତୃତ୍ୱରେ ବହୁ ଆଇନଜୀବୀ କଂଗ୍ରେସରେ ସାମିଲ ହୋଇଥିଲେ । ଏହି ଅବସରରେ ଶ୍ରୀ ମହାନ୍ତିଙ୍କର ସାଙ୍ଗଠନିକ ଦକ୍ଷତା ଏବଂ କାର୍ଯ୍ୟଶୈଳୀ ଉପରେ ଶ୍ରୀ ମହାରଥା ଆଲୋକପାତ କରିବା ସହ ସମ୍ପ୍ରତି କେନ୍ଦ୍ର ଓ ରାଜ୍ୟରେ ଥିବା ସରକାର ଗଣତନ୍ତ୍ରକୁ ହତ୍ୟା କରିବାକୁ ପଛାଉନଥିବା ବୋଲି କହିଥିଲେ । ରାଜ୍ୟ ତଥା ଦେଶବାସୀଙ୍କୁ ଭୁଆଁବୁଲାଇ ଉଭୟ ସରକାର କେବଳ ଗଦାଗଦା ମିଥ୍ୟା ପ୍ରତିଶ୍ରୁତି ଦେଇ ଶେଷରେ ପ୍ରତାରିତ କରୁଛନ୍ତି ବୋଲି ଶ୍ରୀ ମହାରଥା କହିଥିଲେ । ଏହି ପରିପ୍ରେକ୍ଷୀରେ ଶ୍ରୀ ମହାନ୍ତି କଂଗ୍ରେସରେ ସାମିଲ ହେବା ପରେ ରାହୁଲ ଗାନ୍ଧୀଙ୍କ ଭାରତ ଯୋଡ ଯାତ୍ରାରେ ଆକର୍ଷିତ ହେବାସହ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଓ ପିସିସି ସଭାପତି ଶ୍ରୀ ପଟ୍ଟନାୟକଙ୍କ ନେତୃତ୍ୱରେ ଆକର୍ଷିତ ହୋଇ ସେ କଂଗ୍ରେସ ଦଳରେ ଯୋଗଦେଇଥିବା ପ୍ରକାଶ କରିଥିଲେ ।