ଓଟିଇଟି ପରୀକ୍ଷାର୍ଥୀଙ୍କ ଆଡମିଟ୍ କାର୍ଡ ସଂଶୋଧନ ପାଇଁ କଣ୍ଟ୍ରୋଲ ରୁମ୍ ଅବଗତ କରିବାକୁ ବୋର୍ଡ଼ର ପରାମର୍ଶ

#କଟକ(ଏନ୍‌.ଏମ୍‌.) : ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ପକ୍ଷରୁ ଜୁଲାଇ ୧ ତାରିଖରେ ହେବାକୁ ଥିବା ଓଡ଼ିଶା ଶିକ୍ଷକ ଯୋଗ୍ୟତା ପରୀକ୍ଷା (ଓଟିଇଟି-୨୦୨୨, ଦ୍ୱିତୀୟ)ର ଅନେକ ପରୀକ୍ଷାର୍ଥୀଙ୍କ ଆଡମିଟ କାର୍ଡରେ ଗୁରୁତର ତ୍ରୁଟି ରହିଥିବା ଜଣାପଡ଼ିଛି । ବହୁ ପରୀକ୍ଷାର୍ଥୀ ପାଇଥିବା ଆଡମିଟ୍ କାର୍ଡରେ ଦୁଇଟି ପେପର୍ ପାଇଁ ଦୁଇଟି ପରୀକ୍ଷା କେନ୍ଦ୍ର ରହିଛି । ଯାହା ଫଳରେ ଗୋଟିଏ ଦିନରେ ଜଣେ ପରୀକ୍ଷାର୍ଥୀ ଦୁଇଟି ଜିଲ୍ଲାରେ ଥିବା ଦୁଇଟି ପରୀକ୍ଷା କେନ୍ଦ୍ରରେ କିପରି ପରୀକ୍ଷା ଦେବେ, ତାହାକୁ ନେଇ ଦ୍ୱନ୍ଦ୍ୱରେ ପଡ଼ିଛନ୍ତି । ଏଭଳି ସ୍ଥିତିରେ ପରୀକ୍ଷାର୍ଥୀମାନଙ୍କୁ ସହାୟତା କରିବା ପାଇଁ ବୋର୍ଡ ପକ୍ଷରୁ କଣ୍ଟ୍ରୋଲ୍ ରୁମ୍ ବ୍ୟବସ୍ଥା କରାଯାଇଛି । ଯେଉଁ ପରୀକ୍ଷାର୍ଥୀମାନଙ୍କ ଦୁଇଟି ପେପର୍ ପାଇଁ ମିଳିଥିବା ଦୁଇ ଆଡମିଟ୍ କାର୍ଡରେ ଦୁଇଟି ଭିନ୍ନ ପରୀକ୍ଷା କେନ୍ଦ୍ର ରହିଛି, ସେମାନେ ବୋର୍ଡ କଣ୍ଟ୍ରୋଲ୍ ରୁମ୍ ନଂ ୦୬୭୧-୨୪୧୨୦୫୯/୨୪୧୨୦୬୦ ସହ ଯୋଗାଯୋଗ ପାଇଁ ବୋର୍ଡ ପକ୍ଷରୁ ପରାମର୍ଶ ଦିଆଯାଇଛି । ଏପର୍ଯ୍ୟନ୍ତ ୨୬୦ଜଣ ପରୀକ୍ଷାର୍ଥୀ ଯୋଗାଯୋଗ କରିଥିବା ବେଳେ ସେମାନଙ୍କ ଅସୁବିଧା ଦୂର କରିବା ପାଇଁ ପଦକ୍ଷେପ ନିଆଯାଇଛି । ଯେଉଁମାନଙ୍କ ଅସୁବିଧା ଦୂର କରାଯାଇପାରିବ ସେମାନଙ୍କ କ୍ଷେତ୍ରରେ ରିଭାଇଜଡ୍ ଆଡମିଟ୍ କାର୍ଡ ବୋର୍ଡ ୱେବସାଇଟ୍ ଅପଲୋଡ୍ କରାଯିବ ବୋଲି ବୋର୍ଡ ଉପ-ସଭାପତି ଡକ୍ଟର ନିହାର ରଞ୍ଜନ ମହାନ୍ତି ସୂଚନା ଦେଇଛନ୍ତି । ବୋର୍ଡ ଉପ-ସଭାପତି ଡକ୍ଟର ମହାନ୍ତିଙ୍କ ସୂଚନା ଅନୁସାରେ, ଓଟିଇଟି ପରୀକ୍ଷାର୍ଥୀମାନେ ସେମାନଙ୍କ ଯୋଗ୍ୟତା ଅନୁସାରେ ଗୋଟିଏ ପେପର୍ ବା ଦୁଇଟିଯାକ ପେପର୍ ପରୀକ୍ଷା ଦେଇପାରିବେ । ଫର୍ମପୂରଣ ନିର୍ଦ୍ଦେଶାବଳୀ ଅନୁସାରେ ଯେଉଁମାନେ ଦୁଇଟି ପେପର୍ ପାଇଁ ଫର୍ମପୂରଣ କରିବେ, ସେମାନେ ପ୍ରଥମ ପେପର୍ ଫର୍ମପୂରଣ କରିସାରିବା ପରେ ରେଜିଷ୍ଟ୍ରେସନ୍ ନମ୍ବରଟିଏ ଜେନେରେଟ୍ ହେବ, ସେହି ନମ୍ବରକୁ ସଂପୃକ୍ତ ପରୀକ୍ଷାର୍ଥୀ ଦ୍ୱିତୀୟ ପେପର୍ ଫର୍ମପୂରଣ ବେଳେ ସେଥିରେ ଦର୍ଶାଇବେ । ଯଦି ପ୍ରଥମେ ଦ୍ୱିତୀୟ ପେପର୍ ପାଇଁ ଫର୍ମପୂରଣ କରିବେ, ତେବେ ସଂପୃକ୍ତ ରେଜିଷ୍ଟ୍ରେସନ୍ ନମ୍ବରକୁ ପ୍ରଥମ ପେପର୍ ଫର୍ମପୂରଣ ବେଳେ ଦର୍ଶାଇବେ । ଏଥିରୁ ଜଣାପଡ଼ିବ, ଜଣେ ପରୀକ୍ଷାର୍ଥୀ ଦୁଇଟି ଯାକ ପେପର୍ ଦେଉଛନ୍ତି ଓ ତାଙ୍କ ପାଇଁ ଗୋଟିଏ ପରୀକ୍ଷା କେନ୍ଦ୍ର ନିର୍ଦ୍ଧାରିତ ହେବ । ନିର୍ଦ୍ଦେଶାବଳୀ ଅନୁସାରେ, ଫର୍ମପୂରଣ କରିଥିବା ପାଖାପାଖି ୩୧ହଜାର ପରୀକ୍ଷାର୍ଥୀ ଦୁଇଟି ପେପର ପରୀକ୍ଷା ଦେଉଥିବା ବେଳେ ସେମାନଙ୍କର ଗୋଟିଏ ପରୀକ୍ଷା କେନ୍ଦ୍ର ହୋଇଛି । ଯେଉଁ ପରୀକ୍ଷାର୍ଥୀମାନେ ନିର୍ଦ୍ଦେଶାବଳୀ ଅନୁସାରେ ଫର୍ମପୂରଣ କରିନାହାନ୍ତି, ଅର୍ଥାତ୍ ପ୍ରଥମ ପେପର ରେଜିଷ୍ଟ୍ରେସନ୍ ନମ୍ବରକୁ ଦ୍ୱିତୀୟ ପେପରରେ ବା ଦ୍ୱିତୀୟ ପେପର୍ର ରେଜିଷ୍ଟ୍ରେସନ୍ ନମ୍ବରକୁ ପ୍ରଥମ ପେପରେ ବ୍ୟବହାର କରି ନାହାନ୍ତି, ସେମାନଙ୍କ କ୍ଷେତ୍ରରେ ଏଭଳି ଅସୁବିଧା ହୋଇଛି ବୋଲି ଉପ-ସଭାପତି ଡକ୍ଟର୍ ମହାନ୍ତି କହିଛନ୍ତି । ଏଥିରେ ବୋର୍ଡ ଦ୍ୱାରା କୌଣସି ତ୍ରୁଟି କରାଯାଇନାହିଁ ବୋଲି ବୋର୍ଡ ପକ୍ଷରୁ କୁହାଯାଇଛି ।