ଅହମଦୀୟା ମୁସଲିମ ପକ୍ଷରୁ ଖିଲାଫତ୍ ଦିବସ: ଖିଲାଫତ ବ୍ୟବସ୍ଥା ଏକ ଐଶ୍ୱରୀୟ ଉପହାର -ମୌଲାନା ଫଜଲ ହକ ଖାନ୍
#କଟକ(ଏନ୍.ଏମ୍.): ସ୍ଥାନୀୟମଙ୍ଗଳାବାଗ ନିକଟସ୍ଥ ମିର କମଲପାଟଣାର ଅହମଦୀୟା ମୁସଲିମ ମିଶନରେ ଖିଲାଫତ୍ ଦିବସ ପାଳିତ ହୋଇଛି । ଏହି ସମ୍ମିଳନୀରେ ପୂର୍ବତନ ସଭାପତି ସୟଦ ତାହିର ଅହମଦ କଲିମ ପୌରହିତ୍ୟ କରିଥିଲେ । ସର୍ବ ପ୍ରଥମେ ସୟଦ ତାହିର ଅହମଦ ପବିତ୍ର କୋରାନ ପାଠ କରିଥିଲେ । ଉର୍ଦ୍ଦୁ ନଜମ ସୟଦ ୟହିୟା ଅହମଦ ପରିବେଷଣ କରିଥିଲେ । ଇଂ. ଫିରୋଜ ଖାନ ଅହମଦୀୟା ଖିଲାଫତର ଶତବାର୍ଷିକୀ ଶପଥପାଠ କରାଇଥିଲେ । ମୁଖ୍ୟବକ୍ତା ଭାବେ ଯୋଗଦେଇ ହଫିଜୁଦ୍ଦିନ ଅହମଦ ଖାଁ ଖିଲାଫତ ଦିବସର ଆବଶ୍ୟକତା, ଉଦ୍ଦେଶ୍ୟ ବିଷୟରେ ଭାଷଣ ଦେଇ କହିଲେ, ଖିଲାଫତର ଅର୍ଥ ହେଲା କୌଣସି ଅବତାର ବା ଯୁଗ ସଂସ୍କାରକ ବା ନବି ଓ ରସୁଲଙ୍କ ମରଣାନ୍ତେ ତାଙ୍କ କାର୍ଯ୍ୟକୁ ଐଶୀ ଆଦେଶାନୁଯାୟୀ ତ୍ୱରାନ୍ୱିତ କରାଇବା । ଯେପରି ପୈଗମ୍ବର ହଜରତ ମୁହମ୍ମଦ ସଲ୍ଲମଙ୍କ ପରେ ଇସଲାମ ଇତିହାସରେ ହଜରତ ଅବୁବକ୍କର, ଉମର ଫାରୁକ, ଉସମାନ ଗନୀ ଓ ହଜରତ ଅଲ୍ଲୀ ଇସଲାମୀୟ ଖିଲାଫତର କାର୍ଯ୍ୟଭାର ତୁଲାଇଥିଲେ । ମୁଖ୍ୟଅତିଥି ଭାବେ ଯୋଗଦେଇ ମୌଲାନା ଫଜଲ ହକ ଖାନ କହିଲେ, ଖିଲାଫତ ବ୍ୟବସ୍ଥା ଏକ ଐଶ୍ୱରୀୟ ଉପହାର । ଖିଲାଫତ ପଦବୀରେ ଅଧିଷ୍ଠିତ ମହାପୁରୁଷଙ୍କୁ ଖଲିଫା କୁହାଯାଏ । ଖଲିଫା କେବଳ ଈଶ୍ୱରଙ୍କ ଆଦେଶ ଓ ମନୋନିତ କ୍ରମେ ଅଧିଷ୍ଠିତ ହୋଇଥାଏ । ଇସଲାମୀୟ ଖିଲାଫତର ପରିସମାପ୍ତି ପରେ ମୁହମ୍ମଦ ସଲ୍ଲମଙ୍କ ଭବିଷ୍ୟତବାଣୀ ଅନୁଯାୟୀ ୧୯୦୮ ମସିହାରୁ ହଜରତ ମିର୍ଜା ଗୁଲାମ ଅହମଦଙ୍କ ବିୟୋଗ ପରେ ଅହମଦୀୟା ଖିଲାଫତର ସୂତ୍ରପାତ ହୋଇଥିଲା । ସର୍ବ ପ୍ରଥମେ ହଜରତ ହକିମ ନୁରୁଦ୍ଦନ ସାହେବ, ଦ୍ୱିତୀୟରେ ମିର୍ଜା ବସିରୁଦ୍ଦିନ ମହମୁଦ ଅହମଦ, ତୃତୀୟରେ ମିର୍ଜା ନାସିର ଅହମଦ, ଚତୁର୍ଥରେ ମିର୍ଜା ତାହେର ଅହମଦଙ୍କ ବିୟୋଗ ପରେ ଏବେ ଅହମଦୀୟା ସଂପ୍ରଦାୟର ୫ମ ଖଲିଫା ହଜରତ ମିର୍ଜା ମସରୁର ଅହମଦ ଖିଲାଫତ କାର୍ଯ୍ୟଭାର ସୁଚାରୁ ରୂପେ ତୁଲାଉଛନ୍ତି । ସଭାପତିତ୍ୱ ଭାଷଣରେ ପୂର୍ବତନ ସଭାପତି ସୟଦ ତାହିର ଅହମଦ କଲିମ କହିଲେ ଯେ, ଏହି ଖିଲାଫତ ସଂସ୍ଥା ଦ୍ୱାରା ସମଗ୍ର ବିଶ୍ୱରେ ମାନବ କଲ୍ୟାଣକାରୀ ଯୋଜନା, ବିଶ୍ୱ ଭାତୃଭାବ ଏବଂ ବିଶ୍ୱ ଶାନ୍ତି ପାଇଁ ମହାନ କାର୍ଯ୍ୟମାନ ସମ୍ପାଦନ କରାଯାଉଛି । ଅହମଦୀୟା ସମ୍ପ୍ରଦାୟର ମାନବ ସମାଜ ପ୍ରତି ସେବା ଓ ଅବଦାନ ବିଷୟରେ ଆଲୋକପାତ କରିଥିବାବେଳେ ଏହି ଉତ୍ସବରେ ମୌଲାନା ନବିଦୁଲ ଫତହ, ମୌଲାନା ସୁଜାତ ଅଲ୍ଲି ଏବଂ ମୌଲାନା ରାସିଦ ଜମାଲଙ୍କ ବ୍ୟତୀତ ଅହମଦୀୟା ମୁସଲିମ ସମ୍ପ୍ରଦାୟର ଅନେକ ଗଣମାନ ବ୍ୟକ୍ତି ଯୋଗ ଦେଇଥିଲେ ।